Read KapsikiDC Ɛzayi 21 Bible Online

Ɛzayi 21 - KapsikiDC bible

Ɛzayi 21

¹Ghena te ghəa ɓerama nya mɛa ndərə. Kala masefafele nyi kejive mbe Nɛgɛv ne, se yase nde ghema te ɓerama, hɛɗi nya ghazlənə mbeli ve.

²Wəsə nya ghazlənə mbeli nde ncɛte ɗa geva: kapa ŋkwa nde pamte ŋkwa, kaŋzla ŋkwa nde ŋzla ŋkwa. Ma ke Shala: «Ka Ɛlam, kwiɗi mə yitea mpa! Ka Mɛdi, kelehwe melemea shɛ. 'Ya katetereke kele ghəa nci.»

³Vatse zhɛ ɗa dəŋəa ɗa va yaka. Geva nde zhɛ ɗa kala male nya keheha va ya. Kewəba tazenyɛ mehele ta ɗa kefa ghena, kewəba ghazlənə ɗa 'ya kenewe ŋkwa.

⁴Kwetɛ kwetɛŋe mehele ta ɗa ketazenyɛ, bare bare yabare bare 'ya va ghazlənə. Nahe lɛnɛa ta tɛhwɛɗi nya se 'ya kamawe kezhɛrenyɛ kawəsə keve ɗa ghazlənə.

⁵Nahe mbeli keneheyi wəshi kezeme, nahe mbeli keweleyi yɛ keshi, wəshi kezeme yazeme mbeli ba'a wəshi kesa yasa mbeli. Taghanyɛ ne, ma ke kwete wəndə tsate lewela: «Sate mə, gheyɛ mbeli nyi te ghəa ka sewajɛ! Pisə mə yɛmə te geləa ŋayɛ!»

⁶Wa nya ghena nya gezete ɗa Mahwətə nya: «Kwiɗi, veyi wəndə nya kenewe ŋkwa, kategeze wəsə nya tenewe ŋkɛ.

⁷Ma kenakɛ wəmata kempa nya ntsehe gədəwəa lɛmə bake, zəɗəa kwara lɛmə keɗema zəɗəa zlegweməa lɛmə ŋkɛ ne, ntsehwele ŋkɛ, ntsehwele ŋkɛ tsape tsape!»

⁸Kwa sebe ta ŋkɛ, ma ke nde newe ŋkwa sha lewela: «Nde sleke ŋkwa, veci veci slete ɗa 'ya te ŋkwa kenewe ŋkwa ta ɗa, hwencɛke ncɛke ghereŋe ɗa 'ya te ŋkwa keya ŋkwa ta ɗa.

⁹Newema mə! Wa nya kwete wəndə kase. Kwa wəmata kempa nya ntsehe gədəwəa lɛmə bake ŋkɛ. Tagha gɛ, ma ke tsate lewela: ‹Nahe Babilone keŋzla, nahe Babilone keŋzla! Pɛtɛ yɛ pa ta wəshi nyi zhɛrete hɛ kashala kempə mpə hwa hɛɗi.›»

¹⁰Hwelefe ta ɗa, ma gha nya kese kala ha nya keleke leke te lane ne, nya ya kawəsə nya fate 'ya va Mahwətə nde berete, Shala ta ka Israyɛl. Gheŋkɛ ya kaghena nya geze ŋa 'ya.

¹¹Ghena te ghəa Dəwma. Ma ke lewela tsake ɗa geva se mbe Sɛyir: «Nde newe ŋkwa, wa pa sha geze te viɗi tse wa? Nde newe ŋkwa, hweŋkwa tekiɗi ŋkwa tse wa?»

¹²Ma ke nde newe ŋkwa zhɛnete: «Kiɗi yakiɗi ŋkwa, ama katezhɛne viɗi kase. Ma keɗe yɛ ka'yɛwe ghena zhɛkwa ne, 'yɛwe mə, kwa sebe ta ŋkɛ, zhɛne mə geva kase te kwete hɛ.»

¹³Ghena te ghəa Arabi. Katehɛ yɛ mbe ghɛa wəfe nya mbe Arabi gheyɛ ka Dɛdan nyi kedzeghwa kwa zəɗə.

¹⁴Gheyɛ mbeli nyi mbe Tɛma, gəghe nda mə yɛmə ke mbeli nyi shewə va ndere, ɗaghe nda mə wəshi kezeme ke mbeli nyi kehwɛ.

¹⁵Kwa nza ŋkɛ hwɛ yahwɛ hɛ va kafayɛ, va kafayɛ nya yitea ghweme, va rəgi nya tepenake va ghyana ta mpa.

¹⁶Kwa nza ŋkɛ ne, wa nya ghena nya gezete ɗa Mahwətə nya: «Tene va kwetɛŋe kape kape ne, rayɛ tenza sebe te zləvəa Kɛdar.

¹⁷Deke ɓɛhwɛ mbarave tetene ka he have hwa mbeli nyi mbe Kɛdar.» Nya ya kaghena nya gezete Shala Mahwətə ta ka Israyɛl.