Read KapsikiDC Ɛzayi 35 Bible Online

Ɛzayi 35 - KapsikiDC bible

Ɛzayi 35

¹Katezlama ɓerama ba'a hɛɗi nya keghwele ghwele, katenza gamba fare fare ba'a katebete ghwə.

²Katebete ghwə ŋkɛ, kateŋsle bale, katewetse ba'a katetsa gaghwe ŋkɛ. Nahe zləvəa Liban kendeke nda geva, tsagha ndeɗea Karmɛl ba'a Saron. Katenewe zləvəa Mahwətə mbeli, tsagha ndeɗea Shala ta ɓəmə.

³Ntsə nda mə berete ke dzeve nyi keleɓenji, mtsehe nda mə ghəa shene nyi kebare bare.

⁴Ma pe yɛ sha mbeli nyi keghazlənənji: «Nza mə bereteke, ghazlənəma yɛ ma. Wa nya Shala ta ŋayɛ nya. Katese ŋkɛ kawa dewa ba'a kave nda zhɛme ta nci ke ka ghema ta ŋayɛ, Katese ŋkɛ le ghəa ŋkɛ kambele ŋayɛ.»

⁵Tagha gɛ, katenewe ŋkwa ka ghwələa kɛfi, katefa ghena ka mədəŋəa kɛfi.

⁶Kateŋsle bale ka gwadarea kɛfi kala le, Katetsa gaghwe mbeli nyi keshɛma geze ghena. Kwa nza ŋkɛ ne, katentsa yɛmə te ɓerama, katehwɛ ghwa dzeyi te hɛɗi nya keghwele ghwele.

⁷Katezhɛre ndaleghe nya kenefe nefe kandərə, hɛɗi nya keghwele ghwele kahɛɗia yɛ ɗasle. Te ŋkwa nya se yɛ kelɛ gamba kanza ne, katepese yɛ ghwəvərə ba'a yɛ mahawa.

⁸Katenza hweŋkwa nya teheka mbeli kahweŋkwa nya keveyi geva tekeleke te. Katedzeghwa wəndə nya wale wale kwa we. Deke kaŋa mbelia Shala tenza ŋkɛ. Kateza ka gezhia kɛfi kwa we.

⁹Katebegeme mbeli le nivɛrə kwa we, katedzeghwa wəshi keseɗa nyi ghyana ghyana kwa we, katesləyi hɛ mbeli kwa we. Deke mbeli nyi mbelete Mahwətə ka tedzeghwa kwa.

¹⁰Tsagha ne, katezhɛne geva mbeli nyi mbelete Mahwətə kase. Katentsehe hɛ mbe Siyon le gaghwe. Katenza zlama nya kaghala ghala kwa kema ta nci, katese zlama ba'a farefa sha hɛ, katehwɛnji yɛ yaka ba'a yɛ ŋələvə.