Read KapsikiDC Ɛzayi 36 Bible Online

Ɛzayi 36 - KapsikiDC bible

Ɛzayi 36

¹Ma mbe kwa meŋe wəfaɗeghəmbe ta va ta Ɛzɛkiyas te meghe ne, hwa'a Sɛnakɛrib, meghe nya mbe Asiri kezha ha nda mpa ke meleme nyi berete berete nyi mbe Zhəwda, pa fəhwe hɛ.

²Pa meghe nya mbe Asiri ghweneghe nda wəndə nya te ghəa ka sewajɛa ŋkɛ ba'a ka sewajɛ kwele kwele ke Ɛzɛkiyas, se mbe Lakish kadzembe Zhɛrəzalɛm. Pa ŋkɛ ghereŋenyɛ terasle yitea ŋkwa kehwɛ ta yɛmə kadzawa ŋkwa ketsene yɛmə nya pelɛghə, kwa hweŋkwa kelə kadzembe wəvea ka tsewe lekwesa.

³Pa Ɛliyakim nya te ghə ghɛa meghe, wəzege ta Hilkiya shave shɛ. Shebna, nde rafe wəshi ba'a Yowa, wəzege ta Asaf ba'a nde geze ghena ta meghe ya yite.

⁴Ma ke wəndə nya te ghəa ka sewajɛ sha hɛ: «Ma pe yɛ sha Ɛzɛkiyas: Wa nya ghena nya geze Meghe nya Wəba, meghe nya mbe Asiri nya: Te wa vate ghə na tse wa?

⁵Ma zəzə na ne, ghena kwada ya te ŋkwa ntsehwelea mpa ba'a berete kempa na? Te wa vate ghə na nda fama ghena ta ɗa na wa?

⁶Te Ɛzhipte, ghwəvərə kwa ɓele ɓele nya kempahwe dzeve ta yayata wəndə nya kedɛŋe geva te vate ghə na. Tsetse nza ta Farawon, meghea ka Ɛzhipte kaŋa mbeli nyi kevate ghə te.

⁷Ya kwete ma pa na tezhɛne ɗa: ‹Te Shala Mahwətə ta n'yɛ vate ghə n'yɛ.› Ndagwara gha Ɛzɛkiyas nde zamte sebe te ŋkwa ŋkɛ nyi keveyi geva tekeleke ba'a te yɛ reghwetɛa ŋkɛ. Ma pa na sha ka Zhəwda ba'a ka Zhɛrəzalɛm: ‹Deke mbe kema ta reghwetɛ nya mbe Zhɛrəzalɛm nya tegwəɗəŋə yɛ ntiŋə ghə mbe hɛɗi.›

⁸Ma tsetsenya ne, kelete mbɛaza ta nde sleke ɗa, meghe nya mbe Asiri: katefə ŋa gədəwəa lɛmə 'ya 2.000, kenza ŋkɛ wərə na kakemave ka zleɗe gədəwəa lɛmə kezha dzeme hɛ.

⁹Tsema nza na kaŋkamte nde mene slene kwetɛŋe hwa mbeli nyi ɓɛhwɛ ɓɛhwɛ ma ta nde sleke ɗa, gha nya kevate ghə te Ɛzhipte kezha kemave yɛ wəmata kempa ba'a ka zleɗe gədəwəa lɛmə wa?

¹⁰Ɓiyitsa ne, kaɗema le ɗe ta Mahwətə nda same nde sleke kaza sebe te hɛɗi nya na? Mahwətə nde gezete nda kasame kaha nda mpa ke hɛɗi nya ba'a kaza sebe te.»

¹¹Ma ke Ɛliyakim, Shebna ba'a Yowa sha wəndə nya te ghəa ka sewajɛ: «Təhwə təhwə geze n'yɛ ghena le ghena ta ka Aram, kwa nza ŋkɛ kafa ghena shɛ ghen'yɛ. Ama gezema n'yɛ ghena na le ghena ta ka Ɛbrə, kafefa mbeli nyi dzeyi te zli nyi ma.»

¹²Ma ke wəndə nya te ghəa ka sewajɛ zhɛnete: «Ma zəzə yɛ ne, deke kaŋa nde sleke ŋayɛ ba'a kaŋa ŋayɛ gezete geva ghena nde sleke ɗa na? Kaɗema ŋkɛ kaŋa mbeli nyi dzeyi te zli nyi, nyi ketezeme wevɛa nci nyi ba'a nyi ketesa hwencia nci nyi kala gheyɛ perə na?»

¹³Kwa sebe ta ŋkɛ ne, pelɛhetɛme wəndə nya te ghəa ka sewajɛ sate te ŋkwa, ma ke tsate lewela le ghena ta ka Ɛbrə: «Fa mə ghena ta Meghe nya Wəba, meghe nya mbe Asiri.

¹⁴Ma ke meghe: Ghwetema ŋayɛ Ɛzɛkiyas ma, kwa nza ŋkɛ ne, katembelete ŋayɛ ŋkɛ we.

¹⁵Mba Ɛzɛkiyas ketsəkwə ŋayɛ kezha ve nda ghə yɛ ke Mahwətə, ma ke sha geze: Kaganda tembele ɓəmə Mahwətə. Kateve nda geva meleme nya ke meghe nya mbe Asiri we.

¹⁶Fa nda ma ŋa Ɛzɛkiyas yɛ ma, kwa nza ŋkɛ ne, wa nya ghena nya geze nya meghe nya mbe Asiri nya: Kese mə mcɛ le 'ya, ndeke ɗa mə ghəa ŋayɛ. Ma tsagha ne, katefa deme yayata wəndə te rɛzɛŋea ŋkɛ ba'a te dasekwa ta ŋkɛ. Katesa yɛmə yayata wəndə kwa ghwa ta ŋkɛ.

¹⁷Kwa sebe ta ŋkɛ ne, katese 'ya kezha fə ŋayɛ kadzete hɛɗi nya kala hɛɗia ŋayɛ, hɛɗi nya nza ha ba'a yɛ rɛzɛŋe te, hɛɗi nya nza ɗafa ba'a tɛ te.

¹⁸Ghwetema ŋayɛ Ɛzɛkiyas ma, ma ke sha geze: ‹Katembele ɓəmə Mahwətə.› Nahe yɛ shala ta kweci hwelefefi kembelemte hɛɗia nci shave mbe dzeve ta meghe nya mbe Asiri na?

¹⁹Wa yamenete yɛ shala ta Hamat ba'a ŋa Arpad wa? Tema yɛ shala ta Sefarvayim wa? Nahe ŋkɛ kembelemte Samari shave mbe dzeve ta ɗa na?

²⁰Hwa pɛtɛa shala nyi te hɛɗi nyi ne, nyama shala nde mbelemte hɛɗia ŋkɛ shave mbe dzeve ta ɗa wa? Katembelemte Zhɛrəzalɛm Mahwətə shave mbe dzeve ta ɗa tse gɛ na?»

²¹Pɛtɛ mbeli nyi tagha nzanji tikə tikə. Ghena shɛ kezhɛnete nda hɛ we. Kwa nza ŋkɛ ne, nahe meghe kegezave nda ke hɛ kezha nza tikə tikə.

²²Pa Ɛliyakim, wəzege ta Hilkiya ba'a wəndə nya te ghəa ghɛa meghe, Shebna nya kande rafe wəshi ba'a Yowa, wəzege ta Asaf ba'a nde geze ghena ta meghe zhɛneghe geva kalə sha Ɛzɛkiyas le lekwesa keŋkwahe ŋkwahe. Pa hɛ ɓelate nda ghena nyi gezete wəndə nya te ghəa ka sewajɛ.