Read KapsikiDC Ɛzayi 40 Bible Online

Ɛzayi 40 - KapsikiDC bible

Ɛzayi 40

¹Gweɗakwe mə, gweɗakwe mə mbelia ɗa, wa'a ke Shala ta ŋayɛ.

²Gweɗakwe nda mə wənə ke Zhɛrəzalɛm. Ma pe yɛ shɛ le berete: «Nahe slene berete kekiɗi kaŋa ŋa, nahe na kediməkɛ ghə te fete ta ŋa. Kwa nza ŋkɛ ne, nahe Mahwətə keŋkikɛ ŋa zhɛme ta pɛtɛa jaɗafa nyi menete na.

³Ma ke kwete wəndə zlapete ghena: Kwamte te ɓerama ne, hele nda mə hweŋkwa ke Mahwətə. Te ŋkwa nya dɛrɛŋe rɛŋe ne, perawe nda mə hweŋkwa ke Shala ta ɓəmə.

⁴Zhiɓəmte geva yayata zlərə, tsehwəmte geva yayata ghweme ba'a yayata wəmbə. Zhɛremte geva ŋkwa nya dzawa vare wəmbə kaŋwela ba'a yɛ kələŋə kadeɓa.

⁵Tagha gɛ, katencɛ geva zləvəa Mahwətə ba'a katenewe zləvəa shɛ mbeli pɛtɛ. Nya ya kaghena nya gezete Mahwətə.»

⁶Ma ke kwete wəndə sha 'ya: «Zlape!» Ma 'ya zhɛnete nda «Wa yazlape 'ya wa?» Ma ke zhɛnete ɗa: «Ghena nya: Kala temə ta gwəzə temə ta wəndə ŋelɛ, kenza ŋkɛ temə ma ke ghwə ta wəfe nyi hwa gamba we.

⁷Kaghwele gwəzə, katiwɛɗi ghwə ta wəfe vəa ŋkwa nya vɛke sefə Mahwətə kadzeghəa hɛ. Kaganda ne, kala temə ta gwəzə temə ta wəndə ŋelɛ.

⁸Kaghwele gwəzə, katiwɛɗi ghwə ta wəfe, ama kaghala ghala tenza ghena ta Shala ta ɓəmə.»

⁹Gha gɛ Siyon, dzeme ghweme nya biya, gha gɛ Zhɛrəzalɛm, zlape le pɛtɛa berete ta ŋa. Ma gha nya kekele ghena mɛnɛfɛ nya ganyɛ kase ne, mbake ŋwələ, ghazlənəma na ma. Ma pa na sha meleme nyi mbe Zhəwda: «Wa nya Shala ta ŋayɛ nya.

¹⁰Wa nya Shala Mahwətə nya. Se yase ŋkɛ le berete, berete ya ve kezha sleke ŋkwa. Zhɛme ta ŋkɛ yakele ŋkɛ kase, meleɓe ta ŋkɛ yakele ŋkɛ kase.

¹¹Kala nde ya wəshi ya wəshi keseɗa ta ŋkɛ ŋkɛ, kaɓake hɛ ŋkɛ le dzeve ta ŋkɛ kezha tsene hɛ. Kafə zhɛgwəa lɛməa timɛti ŋkɛ mɛa hwə. Kaŋka timɛti nyi nza zhɛgwəa lɛmə yitea hɛ ŋkɛ le mehele.»

¹²Wa nde dzeghete yɛmə nya kwa ndərə te hwə dzeve ta ŋkɛ, nde dzeghete ghweme te dzeve ta ŋkɛ, nde dzeghete hɛɗi kwa 'yɛmbe ba'a nde dzeghete ɗaŋeɗa ta yɛ ghweme keɗema yɛ wəmbə te kiləwə wa?

¹³Wa nde dzeghete mehele ta Mahwətə ba'a nde ncɛ nda ntsehwele wa?

¹⁴Wa wəndə nya se ŋkɛ shɛ kafa ghena, kateke hweŋkwa ta meha ghwə, kateke ɗepe mene wəsə ba'a kateke hweŋkwa ta ntsehwele wa?

¹⁵Kala yɛmə nya ketɛakwe yitea kwapɛ hwelefefi, kala ndaleghe kwetɛŋe te kiləwə ɗaŋeɗa ta nci. Kala kɛfekɛ ta keləwə mbeli nyi cakeɗa cakeɗa.

¹⁶Kenza wəfe nyi Liban wərə kezha meha ghwə we, kenza wəshi keseɗa nyi mbe wərə kezha dzeghe melɛ kwa tere tere we.

¹⁷Gəmə pɛtɛa hwelefefi kwa kema ta ŋkɛ. Zləvə te hɛ shɛ we, gəmə hɛ.

¹⁸Wa wəndə nya yipə Shala yɛ le tse wa? Nyama wəsə yanza pa ta ŋkɛ yipə le tse wa?

¹⁹Nde vɛsə mze nde vɛsə pa ta wəsə, nde mene slene ta mze kwa tere tere nde fi mze kwa tere tere kənə ba'a nde ndeɓe livə nyi le mze kwa tɛawetɛa dzeyi te.

²⁰Ma nde titikwə lagana kezha kele wəsə nya kala nya kase ne, sheghwə nya keɗema kafehwe yanta ŋkɛ. Kwa sebe ta ŋkɛ ne, kazele nde feɗe wəshi nya kecaŋa ŋkɛ kezha feɗe nda shala nya keɗema kagaŋkəɗə.

²¹Nahe yɛ keɗepe wəsəa shɛ tse yi? Nahe yɛ kefate wəsəa shɛ tse yi? Nahe yɛ wəsəa shɛ se vəashi tse yi? Nahe yɛ kefave yɛ shihəa hɛɗi lema tse yi?

²²Gheŋkɛ yanza pasla ta ŋkɛ kənəa hɛɗi, kala hegi nza ta mbeli kwa kema ta ŋkɛ. Nahe ŋkɛ kepelakeyi ghweme kala zlave, nahe ŋkɛ kepeleyi ŋkɛ kala cɛ lekwesa kezha nza pelɛ.

²³Kakele zləvə ŋkɛ te mbeli nyi te ghəa hɛɗi lema, kawəshi gəmə zhɛre ka meha ghwə nyi te hɛɗi ŋkɛ.

²⁴Kwatemɓete geva hɛ, kwatetsawete geva hɛ ba'a kwatehate slərə hɛ, nda vɛke sefə ŋkɛ kadzeghəa hɛ. Tagha gɛ, kaghwele hɛ, kafə hɛ sefə nya wəba kala shekwəli.

²⁵Ma ke Shala nya keveyi geva tekeleke: «Wa yayipə ɗa yɛ le tse wa? Wa wəndə nya yipə le 'ya tse wa?»

²⁶Kafe mə kema yitea ghweme ba'a newe mə ŋkwa: Wa nde pate yɛ saseregwa wa? Gheŋkɛ nde fə hɛ kashave wəpə wəpəslə kala ka sewajɛ ba'a nde heka hɛ pɛtɛ le sləa nci. Laka wəba ta kwelea ŋkɛ ba'a wəba ta berete ta ŋkɛ ne, kwete shɛ kaɗema kase we.

²⁷Israyɛl, hwelefe ta Zhakob, va wa ŋgaɗe ghə na wa? Ma pa na gezete: «Nahe hweŋkwa ta ɗa kewəfərəakɛ va Mahwətə, nahe nza tiɗiɗia ɗa kembelenyɛ va Shala ta ɗa.»

²⁸Nahe na keɗepe tse yi? Nahe na kefate tse yi? Mahwətə ya kaShala nya kaghala ghala, gheŋkɛ nde pate yɛ ghala ta hɛɗi lema. Kadene ŋkɛ ba'a kaleɓe ŋkɛ we. Wəndə kadzeghete ɗepe wəsə ta ŋkɛ we.

²⁹Kave nda berete ŋkɛ ke nde dewə berete, kave nda hwepe ghə ŋkɛ ke wəndə nya kedene dene.

³⁰Kaleɓe ba'a kadene ka mempɛhwetɛti. Ya ka katsala kɛfi ne, kabete hɛ te hɛɗi.

³¹Ama mbeli nyi keve ghə te Mahwətə ne, kaŋ'we berete mɛnɛfɛ hɛ. Kazlə hɛ kala zele, kahwɛ kaɗema kaleɓe ba'a kadzeghwa hɛ kaɗema kadene.