Read KapsikiDC Ɛzayi 43 Bible Online

Ɛzayi 43 - KapsikiDC bible

Ɛzayi 43

¹Hwelefe ta Zhakob, ma tsetsenya ne, wa nya ghena nya geze ŋa Mahwətə, gheŋkɛ nya kepate ŋa, gha Israyɛl nya: «Ghazlənəma na ma, nahe 'ya kembelete ŋa, nahe 'ya kehekakɛ ŋa le sləa ŋa, ŋa ɗa na.

²Ma vəa ŋkwa nya tejive na te yɛ ghwa ne, le gha tenza 'ya, vəa ŋkwa nya tejive na te yɛ hələ ne, katekelehwe ŋa hɛ we. Ma vəa ŋkwa nya tedzeghwa na hwa ghwə ne, katendə ŋa ŋkɛ we, katetere ŋa ghɛnia ghwə we.

³Kwa nza ŋkɛ 'ya ya kaMahwətə Shala ta ŋayɛ, Shala ta Israyɛl nya keveyi geva tekeleke, 'ya ya kande mbele ŋa. 'Ya kave Ɛzhipte kezha mbele ŋa, Ɛtiyopi ba'a Sɛba kezha mbeɗe ŋa.

⁴Ma va nya nza zləvə te gha kwa ntsə ta ɗa, nya nza na ɗaŋe ɗaŋe ba'a nya ɗe ŋa 'ya ne, 'ya kave hwelefefi te zhia ŋa, mbeli kezha mbeɗe mpia ŋa.

⁵Ghazlənəma na ma, kwa nza ŋkɛ ne, le gha 'ya. Se te ŋkwa kesame ta veci ne, katezhɛne ŋwalea ŋa 'ya kase, se te ŋkwa nya pəkwə ŋkɛ ne, katetsene hɛ 'ya.

⁶‹Fəakawa hɛ›, a 'ya sha tegeze nda ke bela kwa gwela, ‹Keseyima hɛ na ma› a 'ya sha bela kwa zeme. Zhɛneke mə ŋwale tezhilia ɗa se te hɛɗi nya cakeɗake ba'a ŋwalea kwɛa ɗa se te mendɛkwe ta hɛɗi.

⁷Zhɛneke mə pɛtɛa mbeli nyi nza sləa ɗa te hɛ, pɛtɛa mbeli nyi pate 'ya, nyi ŋate 'ya ba'a nyi menete 'ya kezha ncɛ zləvəa ɗa.»

⁸Fəakave mə mbeli nyi yitea meha ghwə, ntsə ya kwa hɛ, ama kaka ghwələa kɛfi hɛ, sleme ya te hɛ, ama kaka mədəŋəa kɛfi hɛ.

⁹Tsenete geva pɛtɛa hwelefefi, rəkwəte geva mbeli. Nyama nde nza kagezete wəshi nyi ketemene geva hwa yɛ shala ta nci wa? Wa nde gezete wəsə nya kemene geva hwa hɛ wa? Wa nde gezete ɓəmə wəsə nya kemenete geva hwa hɛ wa? Ncɛte ka negha fete ta nci ba'a kaganda ta nci hɛ gi ga! Fate ghena ta nci mbeli ba'a ndeke nda kaganda mbeli ke hɛ ga!

¹⁰Ma ke Mahwətə: «Ma ka negha fete ta ɗa ne, gheyɛ mbelia ɗa, gheyɛ ya kaka mene slene ta ɗa nyi ntave 'ya. Kaɗe 'ya kezha ndeke ɗa ghəa ŋayɛ yɛ, keza ɗepete yɛ ba'a kezha fave yɛ 'ya ya kaShala. Kwete shala shɛ kese mpelɛa ke 'ya we, kwete shɛ katenza kwa sebe ta ɗa we.

¹¹Deke 'ya kwetɛŋe ɗa ya kaMahwətə, nde mbele ŋkwa shɛ keɗema 'ya we.

¹²'Ya nde kele mbele kase, nde geze ŋkɛ ba'a nde ncɛ nda ŋkɛ ke mbeli. Kenza kakwete shala nya hwa gheyɛ we. Gheyɛ ya kaka negha fete ta ɗa yitea nza ta ɗa kaShala, 'ya Mahwətə nde gezete.

¹³'Ya ya kagheŋkɛ se kaghate, wəndə shɛ kazləgwəke wəndə mbe dzeve ta ɗa we. Wa nde nza kazhɛremte wəsə nya mene 'ya wa?»

¹⁴Wa nya ghena nya geze Mahwətə, gheŋkɛ nya kembeɗe ŋayɛ, Shala ta Israyɛl nya keveyi geva tekeleke nya: «Kezha gheyɛ ne, 'ya kaghwene wəndə kampa le Babilone, katebebelaŋe gelembe nyi mɛ 'ya. Ma sha ka Babilone tsagha gɛ ne, katezhɛre gaghwe kanehwene.

¹⁵'Ya ya kaMahwətə Shala ta ŋayɛ nya keveyi geva tekeleke, 'ya nya kepate Israyɛl ya kameghea ŋayɛ.»

¹⁶Ma vəashi ne, nahe Mahwətə keŋate hweŋkwa te ndərə, kentate hweŋkwa dzeyi te yɛmə nya lɛame.

¹⁷Nahe ŋkɛ kefəakave yɛ wəmata kempa ba'a yɛ gədəwə, ka sewajɛ ba'a ka katsala ka sewajɛ zlaɓe. Nahe hɛ kebetenji kezha zhɛnema kasate te ŋkwa, nahe hɛ kempənji ba'a keterenji kala zlave ta paterela.

¹⁸Ma ke Shala tsetsenya: «Zhɛnema yɛ kazəzə te wəshi nyi vəashi ma, zhɛnema yɛ kave mehele te wəshi nyi heca ma.

¹⁹Kwa nza ŋkɛ ne, 'ya katemene wəsə mɛnɛfɛ, kele yakele ŋkɛ se tsetsenya. Kateɗepete wəsəa shɛ yɛ tse yi? Kateve hweŋkwa 'ya te ɓerama ba'a yɛ hələ te hɛɗi nya dɛrɛŋe rɛŋe.

²⁰Kateve zləvə wəshi keseɗa nyi hwa gamba te 'ya, yɛ kelɛ gamba ba'a zhenɛgə, kwa nza ŋkɛ nahe 'ya keveyi yɛmə te ɓerama, yɛ hələ te hɛɗi nya keghwele ghwele kezha sa mbelia ɗa, mbeli nyi ntave 'ya.

²¹Ma mbeli nyi pate nyi 'ya kaŋa ɗa ne, katetsahe ɗa hɛ.»

²²Ma ke Shala: «Israyɛl, 'ya yase na katsa ɗa lewela we. Ama leɓakwe na va 'ya, hwelefe ta Zhakob!

²³Kese na kadzeghe ɗa melɛ kwa tere tere le zhɛgwəa lɛməa timɛti we, kese na kave zləvə te 'ya laka dzeghe melɛ le hɛ we. Kese 'ya kazhɛre ŋa kamava laka 'yɛwe wəshi we, kese 'ya kaleɓe ŋa le 'yɛwe 'wərdə kwa hə hə we.

²⁴Kese na kabeze cɛdɛa ŋa yitea pa ɗa gwəzə nya kezəŋwə we, kese na kabehe ɗa le merege ta wəshi keseɗa nyi dzeghekɛ melɛ na le hɛ we. Ama nahe na keveyi ɗa kamava ta ŋa laka fete nyi mene na, nahe na keleɓekɛ ɗa laka yɛ jaɗafa ta ŋa.

²⁵Deke 'ya kwetɛŋe ɗa nde yaɓe yɛ jaɗafa ta ŋa, va nya ɗete ghəa ɗa. Katezhɛne 'ya kazəzə fete nyi menete yɛ we.

²⁶Geze ɗa ghena nya kebeze va 'ya, dzete ɓə ghwə kanya kwetɛŋe. Ncɛ ɗa ghena nyi keve ŋa kaganda.

²⁷Nahe nde ghate ta shia ŋa kemenete jaɗafa, nahe ka geze ŋa ghena keɗema ghena ta ɗa.

²⁸Tagha gɛ, pa 'ya kelemte zləvə te mbeli nyi te ghəa ŋkwa nya keveyi geva tekeleke, pa 'ya pelave nda hwelefe ta Zhakob ke za ba'a wəfəyite nda Israyɛl ke ka jaga nyi keŋele ŋkɛ.»