Read KapsikiDC Ɛzayi 45 Bible Online

Ɛzayi 45 - KapsikiDC bible

Ɛzayi 45

¹Wa nya ghena nya geze nda Mahwətə ke meghe Sirəs, nya veyi ŋkɛ tekeleke: «'Ya kakemane ŋa kezha nza hwelefefi mbe dzeve ta ŋa, kezha kekelehwe berete ta nci va ka meghea kɛfi ba'a kezha ghweghwenemte geva yɛ gelembe nyi teŋzle mɛa yɛ meleme.

²'Ya le ghəa ɗa nde tedzeghwa mbe kema ta ŋa kezha dedase ŋkwa nyi dzəgwəɗəmə dzəgwəɗəmə, kezha ɓeɓele yɛ gelembe mze kwa ghwə ghwə ba'a kezha kwekweraɗe yɛ wəbəzli lɛ.

³Katefə ŋa wəshi nyi nza zləvə te hɛ, nyi kebeteyi geva mbe ŋkwesle ba'a mcɛlə nyi tewəfərə 'ya. Ma tsagha, kateɗepete na 'ya ya kaMahwətə, nya keheka ŋa le sləa ŋa, Shala nya mbe Israyɛl.

⁴Tewəmbəreke nde mene slene ta ɗa Zhakob, Israyɛl nya ntave 'ya, hekakɛ ŋa 'ya le sləa ŋa. Nahe 'ya kendeke ŋa zləvə, ndagwara kaɗepe ɗa na we.

⁵'Ya ya kaMahwətə, kwete shɛ we. Keɗema 'ya ne, kwete shala shɛ we. Nahe 'ya kendeke ŋa berete, ndagwara kaɗepe ɗa na we.

⁶Ma tsagha kateɗepete mbeli deke 'ya ya shɛ se laka ŋkwa kesame ta veci hwa'a te nya pəkwə ŋkɛ. Kwetere wəmbəa ɗa ne, shalala ŋkwa! 'Ya ya kaMahwətə, kwete shɛ we.

⁷'Ya nde mene waŋe ba'a 'ya nde pa ŋkwesle, 'ya nde mene zeɗe nza ba'a 'ya nde mene ndiremi. 'Ya Mahwətə nde mene pɛtɛa wəshia shɛhɛ.

⁸Ghweme, bete kaganda ta ŋa kala mɛnɛ sawa pelɛagha, me ŋkɛ ləmbə kala va, ghwene geva hɛɗi kezha pese mbele, kele kaganda te vəa shɛnyɛ. 'Ya Mahwətə nde pate pɛtɛa wəshia shɛhɛ.»

⁹Wa nya ndiremi te wəndə nya keghəpə le nde pate ŋkɛ gɛ! Yipə wəndə ŋelɛ le ghwelepe rekɛ hwa kweci ghwelepe. Kategeze nda rekɛ ghene ke wəndə nya keve nda pa: «Wa yamene na wa», ke shɛ na? Keɗema ne, kategeze nda helape ke nde ŋa: «Wa nya mezhizhi wa», ke shɛ na?

¹⁰Wa nya ndiremi te wəndə nya kegeze nda ke yita: «Wa nya wəzege yake na wa», keɗema ke ma: «Wa nya wəsə yake na wa», ke shɛ gɛ!

¹¹Wa nya ghena nya geze Mahwətə, Shala nya keveyi geva tekeleke mbe Israyɛl, gheŋkɛ nya kepate mbelia ŋkɛ nya: «Tsema 'yɛwe ghena gheyɛ va 'ya te ŋwalea ɗa ba'a geze ɗa wəsə nya temene 'ya gheyɛ wa?

¹²'Ya nde pate hɛɗi ba'a nde pate mbeli nyi te. 'Ya nde pelakeyi ghweme le dzeve ta ɗa ba'a nde sleke pɛtɛa saseregwa nyi pelɛ.

¹³Laka nza tiɗiɗia ɗa ne, 'ya nde veyi wəndə nya ɗepe nya yɛ kwa hweŋkwa. Dekwede teve nda mene pɛtɛa wəshi nyi temene ŋkɛ 'ya. Gheŋkɛ nde tezhɛne kaŋa meleme ta ɗa ba'a nde tepele nda hweŋkwa ke mbelia ɗa nyi fəhwe mbeli kadzete kwete hɛɗi, wəsə shɛ kateŋki keɗema kateve hɛ we wa'a ke Mahwətə nde berete.»

¹⁴Wa nya ghena nya geze Mahwətə nya: «Ma zhɛme ta ka Ɛzhipte, fəlia ka Ɛtiyopi ba'a ka Sɛba nyi bebiya bebiya nyi ne, pɛtɛ tese hɛ sha gha ba'a kaŋa ŋa tenza hɛ. Katezare ŋa hɛ tehwepe kwa yɛ zewe lɛ. Pɛtɛ tegwəɗəŋə hɛ kwa kema ta ŋa, ma ke hɛ sha tesəkwə ŋa: ‹Deke mbe gha nza Shala, kwete shɛ we.›»

¹⁵Kaganda ne, Shala nya tewəfərə, gha Shala nya mbe Israyɛl, nya kembele ŋkwa na.

¹⁶Nyi hɛ nyi pɛtɛ kanya kwetɛŋe shewə va hawe, kwekweshame va ŋele, yitə yayitə hɛ le ghə teŋa teŋa, ghenci ka mene wəshi nyi zhɛre mbeli kashala.

¹⁷Ama Israyɛl ne, va Mahwətə se mbele ta ŋkɛ, kaghala ghala mbelea shɛ. Ma gheyɛ ne, katenza hawe ba'a ŋele te gheyɛ kajive kajive kaghala ghala we.

¹⁸Nahe Mahwətə kepate ghweme. Gheŋkɛ ya kaShala nya kemenete hɛɗi, nahe ŋkɛ kendeke nda pa ba'a kezhɛrete ŋkɛ ntɛaŋe ntɛaŋe. Kepate ŋkɛ shalala we, ama nahe ŋkɛ kemenete ŋkɛ kezha nza mbeli te. Wa nya ghena nya geze ŋkɛ nya: «'Ya ya kaMahwətə, kwete shɛ we.

¹⁹Kegezete ghena 'ya tewəfərə, te ŋkwa nya diŋwədi te hɛɗi we, kegezete nda 'ya ke hwelefefia Zhakob kezha sepa ɗa hɛ te ŋkwa nya shalala we. 'Ya nya kaMahwətə ne, ghena nya tiɗiɗi yageze 'ya, kaganda yazlape 'ya.»

²⁰Tsenete mə geva shɛ yɛ se, hende mə geva kase kanya kwetɛŋe, gheyɛ hwelefefi nyi ketene teghweme. Wəsə shɛ keɗepe mbeli nyi keve zləvə te shala sheghwəa nci, nyi kesəkwə shala nya keɗema kambele ŋkwa we.

²¹Geze mə ghena ta ŋayɛ, wədə mə degha ta meghe, tseɓa mə ghena kanya kwetɛŋe. Wa nde kencɛte vəashi wəsə nya kemene geva ɓeshi wa? Wa nde gezete se vəashi wa? Ashɛ 'ya, 'ya Mahwətə wəka? Kwete shala shɛ keɗema 'ya we. Shala nya tiɗiɗi, shala nya kembele ŋkwa shɛ we, deke 'ya.

²²Gheyɛ nyi te yɛ mendɛkwe ta hɛɗi, zhɛrave ɗa mə geva, katenza yɛ kembele mbele. Kwa nza ŋkɛ ne, 'ya ya kaShala, kwete shɛ we.

²³Ya 'ya nza kaShala ne, kageze 'ya, tiɗiɗi ghena nya kesame kwa mɛa ɗa. Wa nya ghena nya ɗema 'ya katezhɛremte nya: «Pɛtɛa ghəa shene kategwəɗəŋə kwa kema ta ɗa ba'a ma ke yayata ghɛni sha tezeme fela:

²⁴‹Deke vare Mahwətə nza wəndə kasləyi nza tiɗiɗi ba'a berete.›» Katese hɛ shɛ ba'a katenza hɛ shewə va hawe, pɛtɛa mbeli nyi kese kahwepe wənə ve.

²⁵Ama te zlaɓa ta Mahwətə ne, pɛtɛa hwelefefia Israyɛl katekemave nza tiɗiɗi ba'a fare fare tenza hɛ te.