Read KapsikiDC Ɛzayi 46 Bible Online

Ɛzayi 46 - KapsikiDC bible

Ɛzayi 46

¹Nahe shala Bɛl kenza meyiŋwə, nahe shala Nɛbo kenza mevereŋwe. Nahe yɛ pa ta nci kebeteyi geva pelɛ wəshi keseɗa. Nahe wəshi nyi se nyi gheyɛ kakafe yitea ghweme kenza kawəshi nyi ɗaŋeɗa ɗaŋeɗa sha wəshi keseɗa kefə wəshi nyi kedene dene.

²Nahe shala shɛhɛ kenza mevereŋwe ba'a meyiŋwə kanya kwetɛŋe. Shaŋe hɛ va mbele yɛ pa ta nci, kaslə hɛ le ghəa nci kadzete kwete hɛɗi kala mbeli nyi fəhwe mbeli.

³Fa ɗa mə ŋa ɗa, ka Israyɛl, mbelia Zhakob nyi ketene teghweme, gheyɛ nyi nene 'ya yite sawama ta ŋayɛ kwa hwə, gheyɛ nyi fəte 'ya yama ta ŋayɛ.

⁴Hwa'a mbe meha ta ŋayɛ ne, tsetse tenza 'ya. Hwa'a mbe və nya tenza ghəa ŋayɛ təwə təwə ne, katetawe ŋayɛ 'ya. 'Ya nde menete ŋayɛ, 'ya nde tefə ŋayɛ. Kaganda ne, katenewe ghweme 'ya te gheyɛ, katembele ŋayɛ 'ya.

⁵Wa wəndə nya nza yɛ kayipəte ɗa le tse wa? Wa wəndə nya yipə yipə le 'ya tse wa? Wa wəndə nya yipə ɗa yɛ le yitea nza n'yɛ yipə yipə tse wa?

⁶Kwele kwele fə mze kwa tere tere kweci mbeli same kwa slibəa nci. Kadzeghe mze kwa tɛawetɛa hɛ te kiləwə. Kaheka nde vɛsə mze hɛ kezha vɛsə nda shala ke hɛ. Kwa sebe ta ŋkɛ, kagwəɗəŋə hɛ kwa kema ta shala shɛ kezha hawe ve.

⁷Kwetere wəmbəa ŋkɛ, kakele ŋkɛ hɛ te paslɛ paslɛa, nda tezhɛne hɛ ŋkɛ te ŋkwa ŋkɛ. Kave ŋkɛ hɛ dəŋwəzlərəŋwə, kagaŋkəɗə ŋkɛ te ŋkwa nya nza ŋkɛ we. Ya mbeli tsave nda lewela ne, kazhɛne ŋkɛ we. Kambelete ŋkwa ŋkɛ va ndiremi we.

⁸Zəzəve mə wəsəa shɛ ba'a hwepe mə ghə, ka fama ghena, zəzəve mə ndeɗekə.

⁹Zəzəve mə wəshi nyi kemenete geva vəashi. Kaganda ne, 'ya ya kaShala, kwete shɛ we. Kwete shala shɛ kala 'ya we.

¹⁰Se kaghate ne, nahe 'ya kegezete wəsə nya ketemene geva. Warakenyɛ ne, nahe 'ya kegezete wəsə nya kenakama kamenete geva. Ma 'ya gezete: kateyipə geva zəzə ta ɗa. Yayata wəsə nya ɗe 'ya yatemene 'ya.

¹¹Same kwa ŋkwa nya same veci ne, 'ya kaheka 'yɛ nya kezeme sli, se te hɛɗi nya cakeɗa ne, wəndə nya keteyipə zəzə ta ɗa. Gheŋkɛ nde temene wəsə nya ɗe 'ya. Katemene wəsə nya gezete 'ya 'ya, kateyipə wəsə nya zəzəte 'ya 'ya.

¹²Fa ɗa mə ŋa ɗa, ka ntɛaŋentɛa ghə, gheyɛ nyi kenza ŋayɛ cakeɗake yitea mbele.

¹³'Ya katehende nza tiɗiɗia ɗa kase, kenza ŋkɛ mba cakeɗake we, katezhɛne mbele ta ɗa kadera we. Ke Siyon teve nda mbele 'ya, ke Israyɛl teve nda zləvəa ɗa 'ya.