Read KapsikiDC Ɛzayi 47 Bible Online

Ɛzayi 47 - KapsikiDC bible

Ɛzayi 47

¹Ma ke Shala: «Wəzha ta ka Babilone, sawa pelɛ pasla ta meghea ŋa, ntishɛ ŋa hwa keləwə. Kaganda ne, ntishɛ ŋa hwa hɛɗi, kaɗema pelɛ pasla ta wəzha ta ka Babilone. Katezhɛne mbeli kaheka ŋa ‹kaBabilone nya ndeɗe› keɗema ‹kaBabilone nya ganyɛ› we.

²Fəte pelɛ vena bake ba'a həkɛ hə. Kelemte wəsə kənəa ghəa ŋa, ŋwasakame rewebe ŋa ba'a jive ŋa te yɛ hələ le ghwela te ŋwela.

³Derelɛŋe lɛŋe tenza na kwa kema ta mbeli, katenewe zeweve ta ŋa mbeli. 'Ya katewa dewa ta ɗa, wəndə shɛ katefɛa ɗa yite we.

⁴Ma Nde mbeɗe n'yɛ ne, Mahwətə nde berete sləa ŋkɛ, Shala nya kaganda ta Israyɛl.

⁵Ntishɛ ŋa divə wəzha ta ka Babilone, dzembe ŋa mbe ŋkwesle. Kwa nza ŋkɛ katezhɛne mbeli heka ŋa ‹kaNde sleke yɛ hɛɗia ka meghe› tɛape we.

⁶Kebeze beze se wənəa ɗa va mbelia ɗa, nahe 'ya kekelemte zləvə te mbelia ɗa, nahe 'ya kepeleyi hɛ mbe dzeve ta ŋa. Ama kese na kazhɛ heli yitea hɛ we, nahe na kesahwe nda yaka ke meha za le ɗaŋeɗa ta sheghwəa ŋa nya te welɛ ve.

⁷Ma pa na gezete: ‹Kaghala ghala ne, katenza 'ya kande sleke hɛɗi lema.› Ama kepele ntsə ta ŋa yitea wəshi nyi kemenete geva we, kese na kazəzə te wəsə nya ketemene geva we.

⁸Ama tsetsenya gɛ ne, fate ghena nya, gha nya keɗe ɗe ta geva. Ma kwa nza na gwezlayɛ ne, ma pa na sha se kazəzə: ‹Wəndə shɛ kala 'ya we, katenza 'ya kamale wede tɛape we, katempə ŋwalea ɗa we.›

⁹Yawa kateseke ŋa se ndiremi nyi bake nyi mbe veci nya kwetɛŋe: mpə ta ŋwalea ŋa ba'a nza kamale wede. Kateme hɛ te gha tsape tsape. Ya kaɓe kaɓe ta ka mene ghwɛ ba'a ka nteɗe wəshi ne, katefɛake wəshia shɛhɛ hɛ we.

¹⁰Nahe na kendeke nda mehele ke wəshi nyi ndiremi ndiremi nyi mene na. ‹Wəndə shɛ kanakɛ ɗa we›, a pa gezete mbe ghəa ŋa. Ntsehwelea ŋa ba'a ɗepe wəsə ta ŋa ka ghwetete ŋa. ‹Wəndə shɛ kala 'ya we›, a pa sha zəzə mbe ghəa ŋa.

¹¹Kaganda ne, kateme ndiremi te gha, kateɗepe wesle ta ŋkɛ na we. Kateme dɛdiwəɓa te gha, kateyakɛ ghəa ŋa na ve we. Kateme ɗa nya wəba vəkə te gha kaɗema na keɗepe ŋkwa nya se nde te.

¹²Ntsə geva yitea mene ghwɛa ŋa ba'a yitea pɛtɛa wəshi nyi kaɓe kaɓe na. Leɓakwe na va mene hɛ se kawəzege, ya kwete wərə hɛ kakemanakɛ ŋa, ya kwete wərə hɛ kandeke ŋa dake ŋkwa.

¹³Leɓakwe na va 'yɛwe ghena. Ncɛke ghəa nci hɛ ba'a mbelete ŋa ka ɓela saseregwa nyi te ghweme, ncɛte wəsə nya ketemene ŋa geva ketere ketere hɛ.

¹⁴Katenza hɛ kala vegheme, katetere hɛ ghwə, katembele hɛ va tse ta ghwə we. Katenza nde kalaɗe ta ghwə keta ɗafa, ya kaghwə nya meha mbeli kezha slene we.

¹⁵Wa nya wəsə nya keteneghe ka mene ghwɛ nyi leɓekɛ ghə na yitea hɛ se kawəzege nya: katendendeŋe hɛ, yayata wəndə laka ŋa ŋkɛ bela. Wəndə shɛ katembelete ŋa we!»