Read KapsikiDC Ɛzayi 5 Bible Online

Ɛzayi 5 - KapsikiDC bible

Ɛzayi 5

¹Sərəakɛ ɗa mə kagha nda cimə ke mcɛ ɗa. Te ghəa mcɛ ɗa ba'a te ghəa wəvea rɛzɛŋea ŋkɛ gha geva ŋkɛ: Nahe wəvea rɛzɛŋe kese va mcɛ ɗa pelɛ wəmbə nya mene wəshi hɛɗia ŋkɛ.

²Pa ŋkɛ wəzakɛ hɛɗia ŋkɛ, lamte pelɛ shave mbe ba'a mɓete rɛzɛŋe ganji mbe wəvea shɛ. Pa ŋkɛ ŋate ŋkwa keya ŋkwa te tepe ta ŋkɛ ba'a late ŋkwa keŋkeɗe ya ta rɛzɛŋe. Ya ganji yase ŋkɛ kaneghe te hɛ, ama ya nyi ndiremi ndiremi yakemave ŋkɛ.

³Tagha gɛ, ma ke mcɛ ɗa: «Gheyɛ mbeli nyi mbe Zhɛrəzalɛm, gheyɛ ka Zhəwda, nza mə kaka meha ghwə kwelɛ 'ya le wəvea rɛzɛŋea ɗa.

⁴Wərə 'ya kamenete nda ke wəvea rɛzɛŋea ɗa za ma ke nya menete nda nya 'ya na? Ya ganji yase 'ya kaneghe se te, ama va wa yate ya nyi ndiremi ndiremi ŋkɛ wa?

⁵Ma tsetsenya ne, 'ya kategeze ŋayɛ wəsə nya temene nda 'ya ke wəvea rɛzɛŋea ɗa: 'ya katempə hwele nyi dzeyi yite kezha zehwe slekea nci wəshi keseɗa. 'Ya kateŋa ŋkwa te zli nya yite yitea ŋkeɗe ŋkɛ mbeli nyi kedzeghwa.

⁶'Ya katezhɛre ŋkɛ kawəmbə nya gəmə. Wəndə shɛ katesahwe yɛ dzeve ta ŋkɛ we, wəndə shɛ katekwahə ŋkɛ we. Katepese yɛ tigə dzeyi mbe ba'a katefɛa ləmbə 'ya keme nda va.»

⁷Ma wəvea rɛzɛŋea Mahwətə nde berete ne, gheŋkɛ hwelefe ta Israyɛl. Ma wəfe nyi ɗehwe ŋkɛ kwele kwele ne, ghenci ka Zhəwda. Nza tiɗiɗi yaneghe ŋkɛ va hɛ, ama mbəɗəkwə yanakɛ ŋkɛ, nza le hweŋkwa ta ŋkɛ yaneghe ŋkɛ, ama lewela ta ka sa yaka yafa ŋkɛ.

⁸Wa nya ndiremi te mbeli nyi kembake ghɛ kadzevare kwete ba'a nyi kemtsehe wəve kadzevare kwete gɛ! Ma keɗaŋe ta ŋkɛ ne, pɛtɛ tehərəhwe ŋkwa hɛ ba'a deke ghenci ka tenza te hɛɗi.

⁹Nahe 'ya kefate kageze gheci gheci Mahwətə nde berete, ma ke: «Kazeme 'ya kafela, kateŋzlamte pɛtɛa ghɛ nyi. Ma ghɛ nyi jama jama ba'a nyi ganji ganji nyi ne, katenza mbeli mbe hɛ we.

¹⁰Ma mbe wəve nyi jama jama mahekene ne, katekemave litrəa tɛ mcɛfemsə mbeli we. Ma wəndə nya ketsawete kiləwəa ha gwəmsə ne, deke kiləwə meŋe temene ŋkɛ se te wəve.»

¹¹Wa nya ndiremi te mbeli nyi kesate te ŋkwa masheke masheke kezha zele wəshi kesa nyi keghwəyi ŋkwa ba'a nyi kederanji hetɛhwɛɗi va ghwəyi gɛ!

¹²Kasa wəshi hɛ kwele kwele yitea gaka ta yɛ getsepele, yɛ ŋgwəleŋə, yɛ dɛŋwə ba'a yɛ shela. Ama kanewe wəsə nya mene Mahwətə hɛ we, kave ntsə hɛ te wəshi nyi mene dzeve ta ŋkɛ we.

¹³Vatse gɛ ne, ma ke Shala: «'Ya katefəmte mbelia ɗa va nya ɗema hɛ keɗe kafa ghena. Katempə mbelia nci nyi nza zləvə te va ma, katepahe kweci mbelia nci va ndere.»

¹⁴Vatse teghwene geva mɛa ghɛa mbelia kwahɛɗi beŋweke, kateghwene geva mɛa ŋkɛ fate fate. Katedzawa mbeli nyi nza zləvə te hɛ ba'a kweci mbeli mbe tepe ta zlama ta gəsəkə.

¹⁵Nda mbeli pɛtɛ kagwəɗəŋə, nda mbeli kashifə geva, ba'a nda ka kele ghə kakweshame ntsə.

¹⁶Kateve geva zləvə te Mahwətə nde berete laka nza le hweŋkwa ta ŋkɛ, katencɛ ghəa ŋkɛ Shala kaShala nya kaganda kwetɛŋenyɛ laka tiɗiɗia ŋkɛ.

¹⁷Katezeme gwəzə zhɛgwəa lɛməa timɛti mbe kala nya te ŋkwa kezeme gwəzə ta nci, katekemave wəshi kezeme ta nci zhɛgwəa lɛməa kwi nyi kele hɛ mbeli dɛɓe dɛɓe mbe.

¹⁸Wa nya ndiremi te mbeli nyi kehwepe hwepe nyi te fete ta nci le yɛ zewe ta tseŋwə gɛ! Jaɗafa ta nci yantsehe hɛ kala nya ntsehe wəmata wəshi keseɗa.

¹⁹Ma ke hɛ sha geze: «Menete slene ta ŋkɛ Shala kahe kahe kezha nakɛ ghen'yɛ. Menete geva wəsə nya zəzəte Shala ta Israyɛl kezha ɗepete ŋkɛ ghen'yɛ.»

²⁰Wa nya ndiremi te mbeli nyi kegeze kawəsə ganyɛ wəsə nya ndiremi ba'a kawəsə nya ndiremi wəsə ganyɛ gɛ! Kazhɛre ŋkwesle hɛ kawaŋe ba'a waŋe kaŋkwesle. Kazhɛre wəsə nya 'yaghwa hɛ kawəsə nya zeɗe wəsə nya zeɗe kawəsə nya 'yaghwa.

²¹Wa nya ndiremi te mbeli nyi keveyi ghəa nci kaka ntsehwele ntsehwele ba'a nyi kenewe ghəa nci kaka keɗepe wəshi gɛ!

²²Wa nya ndiremi te ka katsala kɛfi kesa wəshi kesa ba'a te ka meyidala kɛfi nyi kegweɗə wəshi nyi keghwəyi ŋkwa gɛ!

²³Kazhɛre nde beze ghena hɛ kawəndə nya tiɗiɗi te wəshi gəmə, ama kameha nda ghwə hɛ tiɗiɗi ke wəndə nya ɗema fete ve we.

²⁴Vatse tenza hɛ kala mezaɗe nya teremte ghwə keɗema kala gwəzə nyi keghwele ghwele nyi tse ghwə. Katedaɗə hɛ se te slərə ba'a katetələ ghwə ta nci kala keləwə. Kwa nza ŋkɛ ne, nahe hɛ keɗema wəsə mahalegəa Mahwətə nde berete ba'a keɓelama ghena ta Shala ta Israyɛl nya kaganda.

²⁵Vatse hwepete wənə Mahwətə va mbelia ŋkɛ. Nahe ŋkɛ kekafete dzeve kezha ɗa hɛ. Kagaŋkəɗə yɛ ghweme, təɗəmə təɗəmə mbeli nyi kempə mpə dzeyi kwa yɛ hweŋkwa kala kəsə. Ya tsagha shɛ ŋkɛ ne, kegweɗakwe wənəa Mahwətə ba'a kekelakawa dzeve ta ŋkɛ ŋkɛ we.

²⁶Nahe ŋkɛ kesletete drape kezha hwelefefi nyi cakeɗa cakeɗa. Nahe ŋkɛ kevɛte wəsə kezha heka mbeli se te mendɛkwe ta hɛɗi. Wa nyi hɛ nyi kawədə geva kase kahe kahe.

²⁷Ma hwa mbelia shɛhɛ ne, wəndə shɛ keleɓe we, wəndə shɛ katseheɗe we, wəndə shɛ nya zhɛ nda hɛ ba'a wəndə shɛ yitea hɛ we. Kepelemte geva hətə nyi hwa hwə we, keŋslemte geva zewe nyi mbe tsahwa we.

²⁸Kelɛmelɛa lɛmelɛanji have ta nci, kentsə ntsə rəgia nci pɛtɛ. Kala pelɛ ntɛaŋentɛa cɛpea gədəwəa lɛməa nci, kala masefafele zhɛre geva seɗa ta yɛ wəmata gədəwə.

²⁹Kala nivɛrə ghwəghwə ka sewajɛa nci, kala ŋwalea nivɛrə gaka hɛ. Kaghwəghwə hɛ, kancɛhɛape wəshi nyi keseve hɛ hɛ ba'a kaslə hɛ le hɛ. Wəndə shɛ kazləgwəke hɛ va hɛ we.

³⁰Ama te vecia shɛ ne, kategaka kwete wəsə kənəa hɛ kala gaka ta ndərə. Katenewe hɛɗia shɛ mbeli, ama ŋkwesle ba'a yaka nde tenza kənə, zhiɓə tenza waŋe va ləmbə nya zhikwətəkwə.