Read KapsikiDC Ɛzayi 51 Bible Online

Ɛzayi 51 - KapsikiDC bible

Ɛzayi 51

¹Ma ke Mahwətə: «Fa mə ghena ta ɗa, gheyɛ nyi keɗe mbele, gheyɛ nyi kezele ɗa. Newema mə gela nya tseheke ŋayɛ mbeli shave mbe, ki nya fəakame ŋayɛ mbeli same kwa.

²Newema mə Abraham, yiteyɛ ŋayɛ ba'a Sara nya keyake ŋayɛ. Wəzege va Abraham te və nya hekakɛ ŋkɛ 'ya we. Ama nahe 'ya kewəpikɛ ŋkɛ, kezhɛrete ŋkɛ kayiteyɛa mbeli kwele kwele.»

³Katezhɛ heli Mahwətə yitea Siyon, katezhɛ heli ŋkɛ yitea kwəfia ŋkɛ. Katezhɛre ɓerama ta ŋkɛ ŋkɛ kala Ɛdɛn ba'a gamba ta ŋkɛ kala ntsa ta Mahwətə. Katesləyi zlama, farefa, yɛ cimə ketsa hana ba'a tsa ta wəshi mbeli kwa.

⁴Fa mə ghena ta ɗa megela, gheyɛ mbelia ɗa, ghwene mə sleme megela, gheyɛ hwelefefia ɗa. Kwa nza ŋkɛ ne, va 'ya tese wəsə mahalegə. Katenca wəsə nya kehi 'ya kezha nza kawaŋe ta mbeli.

⁵Nahe tiɗiɗia ɗa kenza takwa takwa, nca yatenca mbele ta ɗa. Kateme dzeve ta ɗa te kweci hwelefefi, kateve ghə mbeli nyi cakeɗa cakeɗa te 'ya ba'a kateve zəzə hɛ te berete ta ɗa.

⁶Kafe mə kema dzeme yitea ghweme, kwa sebe ta ŋkɛ, newe mə ŋkwa nya kwake te hɛɗi: kateza ghweme kala n'yia ghwə, katehale hɛɗi kala lekwesa, katempə mbeli nyi te kala yɛ zhiwə. Ama katenza tiɗiɗia ɗa kaghala ghala, katekiɗi mbele ta ɗa we.

⁷Fa mə ghena ta ɗa, gheyɛ nyi keɗepe nza tiɗiɗi, gheyɛ nyi keve wəsə mahalegəa ɗa kwa wənəa ŋayɛ. Ghazlənəma yɛ va yɛ ŋele ta mbeli ma, teŋweslema mehele ta ŋayɛ va yiɗə ŋkwa ta nci ma.

⁸Kwa nza ŋkɛ ne, katezeme hɛ yɛ lema kala lekwesa, katezeme tetəhwə kala shintia təmə. Ama katenza tiɗiɗia ɗa kaghala ghala, katenza mbele ta ɗa keshi keshi.

⁹Mahwətə yawe, feɗeghe ŋa, feɗeghe ŋa gi! Ncɛte berete ta ŋa gi! Feɗeghe ŋa kala nya vəashi, kala nya te və nya heca. Ashɛ gha nde ncɛhwemte Rahab, nde mpahwemte shishi meŋele nya kwa ndərə wəka?

¹⁰Ashɛ gha nde hasemte ndərə, yɛmə nya kwa ndərə nya wəba wəka? Ashɛ gha nde perawate hweŋkwa te ndərə kezha jive mbeli nyi mbeɗeke na kwa wəka?

¹¹Katezhɛne geva mbeli nyi mbeɗeke Mahwətə kase, katedzembe Siyon hɛ le gaghwe. Katewaŋe kema ta nci zlama nya kaghala ghala, katezlama hɛ ba'a katenza hɛ fare fare, katehwɛnji yɛ yaka ba'a yɛ ŋələvə.

¹²Ma ke Shala: «Deke 'ya nde gweɗakwe ŋayɛ. Gheyɛ nza kawa nda ghazlənə yɛ va wəndə nya kemte, va mbeli nyi kekiɗi kala gwəzə wa?

¹³Kazaghə Mahwətə nya kepate ŋa nya kepeleyi ghweme ba'a nya keveyi hɛɗi na. Kabare bare na kevə kevə va beze ta wənəa nde ghwərə ghwərəa ntsə, kala wəsə nya se ŋkɛ ɗeke ɗeke kapesle ŋa. Tema lənyɛ beze ta wənəa nde ghwərə ghwərəa ntsə gɛ wa?

¹⁴Temə vireɗi ne, katepele wəndə nya kedene dene mbeli same kwa daŋgayɛ. Katemte ŋkɛ kwa daŋgayɛ nya we, katezhɛne ŋkɛ kanza ndaŋe te ɗafa we.

¹⁵'Ya ya kaMahwətə Shala ta ŋa, nya kegwezləɓə yɛmə yitea gaŋkeɓe ŋkɛ. 'Ya yanza sləa ɗa ‹kaMahwətə nde berete.›

¹⁶'Ya nde peleyi ghweme, 'ya nde veyi hɛɗi, ma 'ya gezete nda ke Siyon: Gha ya kahwelefe ta ɗa, nahe 'ya kevate ghena ta ɗa te ghɛnia ŋa, nahe 'ya kewəfərəakɛ ŋa yitea shenaŋkwe ta dzeve ta ɗa.»

¹⁷Feɗeghe gɛ Zhɛrəzalɛm! Feɗeghe ba'a sate meslete gɛ! Nahe Mahwətə kesahwe ŋa zlerekwe ta hwepe wənəa ŋkɛ, nahe na kesahwe ŋkɛ hwa'a te medeŋeshili ta ŋkɛ, nahe ŋkɛ keghwəyimte ŋa hwa'a te dɛwərə ta ghə.

¹⁸Hwa pɛtɛa ŋwale nyi yake na ne, kwete shɛ kese kancɛ ŋa hweŋkwa we. Hwa pɛtɛa ŋwale nyi kelete na ne, kwete shɛ kese kakese ŋa te dzeve we.

¹⁹Vitsə vitsə senji ndiremi kadzete gha: beze ba'a ŋzla, ma ba'a mpa. Ama wa nde teŋgaɗe ghə yitea gha wa? Wa nde tegweɗakwe ŋa wənə wa?

²⁰Ɓeɓelayɛ ŋwalea ŋa hwa hɛɗi dzeyi mɛa pɛtɛa bela ta hweŋkwa. Kanza hɛ kedene dene tagha kala kwakweshala nya keseve dagalawe, tewəmbəreke hwepe ta wənəa Mahwətə, tewəmbəreke ɗa ta Shala ta ŋa.

²¹Ama tsetsenya ne, fate megela gha meleme nya mbe ndiremi: keghwəyi ghwəyi na, ama va tɛ we.

²²Wa nya ghena nya geze Shala Mahwətə ta ŋa, nya kesleke ŋa, nya kekelehwe ghena nya te mbelia ŋkɛ nya: «'Ya katekele zlerekwe ta dɛwərə ta ghə zlerekwe ta hwepe wənəa ɗa seyi mɛa dzeve ta ŋa. Katezhɛne na kasa wəsə nya kwa we.

²³Kateve ŋkɛ 'ya mbe dzeve ta ka sa ŋa yaka, ma ke hɛ sha se kageze ŋa: ‹Bərəɓə ŋa kezha dzeghwa n'yɛ te gha.› Tagha gɛ, pa na veyi wəmbəa ŋa kahɛɗi, kahweŋkwa ta mbeli nyi kedzeghwa.»