Read KapsikiDC Ɛzayi 56 Bible Online

Ɛzayi 56 - KapsikiDC bible

Ɛzayi 56

¹Wa nya ghena nya geze Mahwətə nya: «Hawe mə va wəsə nya kehi ba'a mene mə wəsə nya tiɗiɗi. Kwa nza ŋkɛ ne, takwa takwa mbele kase ba'a tiɗiɗia ɗa kancɛ geva.

²Zlama ya va wəndə nya kemene wəsə nya geze 'ya, va wəndə ŋelɛ nya keghereŋe te, nya kehawe va veci kezhɛne mpi ba'a nya keya dzeve ta ŋkɛ va mene yayata wəsə kwa ndiremi.»

³Gezema mentiɓə nya kendeke ghəa ke Mahwətə: «Kaganda tenehe ɗa Mahwətə le mbelia ŋkɛ», ke ma. Gezema nde tsewe tsewe: «Deke wəfe nya keghwele ghwele 'ya», ke ma.

⁴Kwa nza ŋkɛ wa nya ghena nya geze Mahwətə nya: «Ma kenza nde tsewe tsewe kahawe va yɛ veci kezhɛne mpia ɗa, kentave mene wəsə nya zeɗehwe ɗa ŋkɛ ba'a kedɛŋate geva ŋkɛ te jikə geva ta ɗa ne,

⁵katewəmbə nda pelɛ kerafe sləa ŋkɛ 'ya mbe zli nya yitea ghɛa ɗa. Za ma tenza ŋkɛ kaŋa ŋkɛ ke ŋwale tezhili ba'a ŋwalea kwɛ. Kateve nda slə nya kaghala ghala nya keɗema kazamte geva 'ya.»

⁶Ma kaŋa ka mentiɓə nyi kendeke nda ghə ke Mahwətə kezha mene slene ta ŋkɛ ba'a kezha ɗe ŋkɛ, kezha nza kaka mene slene ta ŋkɛ ne, ma ke Mahwətə gezete: «Ma kenza hɛ kahawe megela va veci kezhɛne mpi, kenzanji hɛ dɛŋe dɛŋe te jikə geva ta ɗa ne,

⁷Katefə hɛ 'ya kadzeme ghweme ta ɗa nya keveyi geva tekeleke, kateviɗi hɛ 'ya le zlama mbe ghɛ nya səkwə ɗa mbeli, kateyɛ yɛ melɛ kwa tere tere ba'a kweci melɛ nyi dzeghe ɗa hɛ te reghwetɛ 'ya. Kwa nza ŋkɛ kateheka ghɛa ɗa mbeli ‹Kaghɛ kesəkwə ghə kezha mbeli pɛtɛ.›»

⁸Ma ke Shala Mahwətə nya ketsene ka Israyɛl nyi fəhwe mbeli: «Nahe 'ya ketsenete kweci mbeli kadzevare hɛ, katetsene kweci mbeli 'ya kadzevare hɛ zhɛkwa.»

⁹Gheyɛ wəshi keseɗa pɛtɛ nyi hwa gamba ba'a gheyɛ wəshi keseɗa nyi mbe ghɛa wəfe, se mə yitea wəsə kezeme gɛ ga!

¹⁰Nahe ka ya Israyɛl kenza kaka ghwələa kɛfi, wəsə shɛ keɗepe hɛ we. Nahe hɛ kenza kakelɛketi nyi kembɛhwɛ ma. Kanza hɛ meɓelahe, kashiwə hɛ ba'a kaɗe hɛ hɛ.

¹¹Nahe hɛ kenza kakelɛketi nyi keɓerawe, keɗepe geze hɛ: «Wərə n'yɛ», ke hɛ we. Ama ghenci ya kaka ya mbelia ɗa. Keɗepe nta helɛ hɛ kwa ghena we, deke mawe ta nci yazele hɛ. Deke mene ghəa ŋkɛ yazele yayata wəndəa nci.

¹²Ma ke hɛ sha geze: «Nde mə, ngara ɓəmə kalə kazele tɛ. Katesa wəshi kesa nyi ghyana ghyana gheɓəmə. Katenza hendɛ kala veci nya ɓeshi, kwele kwele tene wəshi kesa.»