Read KapsikiDC Ɛzayi 57 Bible Online

Ɛzayi 57 - KapsikiDC bible

Ɛzayi 57

¹Kampə mbeli nyi tiɗiɗi kaɗema katsakɛ ŋkwa. Kaza sebe te mbeli ganji kaɗema mbeli keɗepe. Kaganda ne, kaza sebe te mbeli nyi tiɗiɗi va 'yaghwa mehele ta ka ndiremia mehele.

²Ama katese kwelɛŋe, tagha gɛ, kateɓelahe mbeli nyi tiɗiɗi te gezle ta nci gwezlayɛ.

³Hende mə geva kase teke, gheyɛ ŋwalea male kwa mene ghwɛ, hwelefe nya kesawa mbe vale tahe ba'a mene mefətekwə.

⁴Wa wəndə nya yiɗə yɛ wa? Wa wəndə nya kweraslɛ nda veŋwe yɛ ba'a nya nɛalɛame nda ghɛni yɛ wa? Ashɛ ŋwale nyi kefama ghena, hwelefe ta ka sla tseŋwə yɛ wəka?

⁵Kaheheka nda gwaya yɛ ke ghəa ŋayɛ dzeyi yitea yɛ hwemeke, dzeyi yitea yayata wəfe nya gwəzləmə. Kadzeghe melɛ yɛ le ŋwale dzeyi mɛa yɛ hələ ba'a dzeyi mbe yɛ gezlɛŋə.

⁶Nahe pelɛ nyi shɛanɛa shɛanɛa nyi kwa hələ kenza kaŋa ŋa, ghenci ya kaŋa ŋa wəsə, gha Israyɛl. Ke ghenci ɓasle nda tɛ na ba'a fə nda wəshi na. Kashɛ 'ya nza gweɗakwe va wəshia shɛhɛ na?

⁷Pelɛ ghweme nya biya veyi gezle ta ŋa na. Pelɛagha dzeme ŋa na kezha dzeghe yɛ melɛ.

⁸Nahe na keseɗeyi zlera ta ŋa dzeme wəmbəa gelembe. Kaseɗemte lekwesa na tewəfərə va 'ya, kadzete gezlea ŋa nya bezle na. Katsa ghena na le ka meghwateshia ŋa nyi ɗe ɓelahe na le hɛ. Kamare ŋkwa nya yitea hwə na va hɛ.

⁹Kafi n'yi na kezha lə sha shala Mɛlɛk, kayisə 'wərdə na dzeyi te geva. Kaghwene ka ghwene ta ŋa na kalə cakeɗake, kadzawa na hwa'a kwa ghɛa mbelia kwahɛɗi.

¹⁰Ma va nya dzeghwave dzeghwa na ne, nahe na keleɓe ŋa. Ama kegeze na: «Gəmə ntsə geva 'ya», pa we. Nahe na kekemave berete, tagha gɛ, kenza na laŋase ŋase we.

¹¹Wa wəndə nya kedakemte ŋa nda sla tseŋwə na, nda zaghə ɗa na ba'a nda ɗema na mba kazəzə ɗa wa? Divə ɗa nza ɗa 'ya se vəashi. Vatse zhɛnema na kahawe va 'ya.

¹²'Ya katencɛ nza ta ŋa ba'a yɛ slene ta ŋa. Katefa deme na te hɛ we.

¹³Ma te və nya tetsa lewela na ne, mbelete ŋa pɛtɛa yɛ shala tseŋwəa ŋa gɛ! Katefə hɛ sefə pɛtɛ, katetsale hɛ vɛ ta sefə. Ama mbeli nyi kenzanji kwa ghwədərəa ɗa ne, katenza hɛɗi kaŋa nci, katenza pelɛ ghweme ta ɗa nya keveyi geva tekeleke kaŋa nci.

¹⁴Ma ke Shala gezete: «Hite mə hweŋkwa, perawete mə hweŋkwa kahe kahe, lamte mə yɛ tehene kwa hweŋkwa ta mbelia ɗa.»

¹⁵Wa nya ghena nya geze Shala nya pelɛ ghweme, nya nza ŋkwa kenza ta ŋkɛ kaghala ghala ba'a veyi geva sləa ŋkɛ tekeleke nya: «Ma 'ya nya kaShala nya kaganda ne, pelɛ ghweme ŋkwa kenza ta ɗa. Ama nahe 'ya kenza le mbeli nyi kesa yaka ba'a le mbeli nyi keshifə ghəa nci, kezha ve nda mpi ke ka shifə ghəa nci ba'a kezha ve nda mpi ke ka sa yaka.

¹⁶Kwa nza ŋkɛ ne, kateghəpə 'ya kaghala ghala keɗema katebeze wənə 'ya kevə kevə we. Ma keɗema ŋkɛ tsagha ne, 'ya katempə pɛtɛa wəshi nyi nza mpi hwe nyi pate 'ya.

¹⁷Va fete ta dzeghwama ntsə ta Israyɛl ne, nahe 'ya kehwepete wənə, nahe 'ya keɗate ŋkɛ le wənə le wənə, kese 'ya kaɗe kazhɛne kanewe ŋkɛ we. Ama pa nzanyɛ mbe ntɛaŋentɛa ghəa ŋkɛ, pa zelete wəsə nya ɗe wənəa ŋkɛ.

¹⁸Nahe 'ya keɗepete dzeghwa ta ŋkɛ megela, ama katembe ŋkɛ 'ya, katebeghe ŋkɛ ba'a katentsə nda berete 'ya. Ma kaŋa mbeli nyi mbe nehwene ne,

¹⁹kateve cimə zlama 'ya kwa mɛa nci.» Ma ke Mahwətə gezete: «Kwelɛŋe ke wəndə nya cakeɗa ba'a kwelɛŋe ke wəndə nya dekwe. Kaganda ne, katembe mbelia ɗa 'ya.»

²⁰Ama nahe ka 'yaghwa mehele kenza kala ndərə nya kegaŋkeɓe, nya keɗema kanza gweɗakwe ba'a nya gwəɓə mama ta reɗa yɛməa ŋkɛ kasame.

²¹Ma ke Shala ta ɗa gezete: «Kwelɛŋe shɛ va ka 'yaghwa mehele we.»