Read KapsikiDC Ɛzayi 6 Bible Online

Ɛzayi 6 - KapsikiDC bible

Ɛzayi 6

¹Ma te va nya mtenyɛ meghe Oziyas ne, pa 'ya nakɛ Mahwətə mentishɛ pelɛ pasla nya biya tsape. Viɗi ŋkwa nya mbe ghɛa Shala va gəzəɓə ta lekwesa ta ŋkɛ.

²Kənəa ghəa ŋkɛ ka sɛrafɛŋe nyi ketse kala ghwə. Bidzə ya ŋkwaŋe te yayata ŋkɛ: bidzə bake kezha dəpə kema ta ŋkɛ, bidzə bake kezha dəpə seɗa ta ŋkɛ ba'a bidzə bake kezha zlə.

³Ma ke hɛ sha zlape nda ke ghəa nci: «Tekeleke, tekeleke, tekeleke veyi geva Mahwətə nde berete, viɗi hɛɗi lema va zləvəa ŋkɛ!»

⁴Kagərə gərə sheghwə nyi dzeme va yɛ gelembe va gaka ta ŋwələa nci, pa ghɛa Shala viɗinyɛ va n'yia ghwə.

⁵Tagha gɛ, ma 'ya gezete: «Wa nya ndiremi te 'ya gɛ! Nahe ŋa ɗa gɛ! Kwa nza ŋkɛ ne, wəndə nya nza bəzhia mɛa ŋkɛ wale wale 'ya, hwa mbeli nyi nza bəzhia mɛa nci wale wale 'ya. Ama pa ntsə ta ɗa nakɛ meghe, Mahwətə nde berete.»

⁶Ama pa kwete wəndəa ka ghwene nyi ketse nyi kala ghwə zləke geva kashave sha 'ya le laɗe nya kelete ŋkɛ le mekese te reghwetɛ yitea dzeve.

⁷Pa ŋkɛ kwaɗakɛ mɛa ɗa le, ma ke: «Kwaɗakɛma ta ŋkɛ ke bəzhia mɛa ŋa ne, nahe fete ta ŋa kekelemte geva, nahe jaɗafa ta ŋa keyaɓemte geva.»

⁸Tagha gɛ, pa 'ya fate ŋwələa Mahwətə, ma ke: «Wa wəndə nya teghwene 'ya tse wa? Wa wəndə nya ketelə te ŋkwa ɓəmə wa?» Ma 'ya zhɛnete: «Wa nya 'ya nya, ghwenakɛ ɗa!»

⁹Ma ke Shala gezete zhɛkwa: «Kwiɗi, ma pa na sha tegeze nda ke mbeli nyi: Katefa yɛ megela, ama katefave ghena nya mbe yɛ we. Katenewe yɛ megela, ama kateneweve yɛ we.

¹⁰Zhɛrete mehele ta nci ntɛaŋe ntɛaŋe, zhiɓəte sleme ta nci ba'a ŋzlete ntsə ta nci. Shɛma ntsə ta nci newe ŋkwa, shɛma sleme ta nci fa ghena ba'a shɛma mehele ta nci fave ghena. Ma tsagha ne, katezhɛne geva hɛ kase sha 'ya ba'a katembele hɛ we.»

¹¹Tagha gɛ, ma 'ya 'yɛwete: «Pa te nyama və wa Shala?» Ma ke zhɛnete: «Pa te və nya tetazemte geva yɛ meleme ba'a nya teɗema mbeli mbe hɛ, nya tenza yɛ ghɛ shaka shaka ba'a nya tezhɛre yɛ wəve kaɓerama nya dɛrɛŋe rɛŋe.»

¹²Kaganda ne, kateŋkamte mbeli nyi te hɛɗi nya Mahwətə cakeɗake. Katenza yɛ wəve kwele kwele kewəfə wəfə.

¹³Ma ketene kwa meŋe ta bela ta mbeli te hɛɗi ne, kateteremte geva ŋkɛ le ghwə kala nya tere cɛana keɗema hwemeke nya ketsasle tsasle mbeli. Deke dəŋwə ba'a yɛ slərə ka tetene. Ama kateɗəkwə hwelefe nya ɗehwe Shala dəŋwəa shɛ.