Read KapsikiDC Ka Lɛvi 1 Bible Online

Ka Lɛvi 1 - KapsikiDC bible

Ka Lɛvi 1

¹Daŋe Mahwətə hekakɛ Moyize. Shave mbe cɛ lekwesa kebegeme geva ne, ma ke shɛ:

²«Geze nda ghena ke ka Israyɛl, ma pa na sha tegeze nda ke hɛ: Ma keɗe kwete wəndəa ŋayɛ kadzeghe nda melɛ ke Mahwətə ne, katekese wəsə ŋkɛ hwa wəshi keseɗa nyi jama jama keɗema nyi ɓɛhwɛ ɓɛhwɛ.

³Ma kenza ŋkɛ wəsə keseɗa nya wəba yaɗe ŋkɛ kadzeghe melɛ kwa tere tere le ne, mca nya ɗema beze te yakese ŋkɛ. Kateŋka ŋkɛ ŋkɛ kase kadzemɛa cɛ lekwesa kebegeme geva kezha nza nde zeɗehwe nda ke Mahwətə.

⁴Katedape dzeve ŋkɛ kwa ghəa wəsə keseɗa shɛ. Ma tsagha ne, kateyɛ melɛa ŋkɛ ŋkɛ ba'a katekelemte jaɗafa ta ŋkɛ ŋkɛ te wənə.

⁵Katesla ghə ŋkɛ te mca shɛ mɛa cɛ lekwesa kebegeme geva. Tagha gɛ, kateve nda mimia ŋkɛ ka dzeghe Shala nyi kaŋwale tezhilia Aron ke Mahwətə, kwa sebe ta ŋkɛ, kateyisə mimia shɛ hɛ dzeyi vare yɛ bela ta reghwetɛ nya mɛa ŋkwa kedzembe cɛ lekwesa kebegeme geva.

⁶Katekwaɓe hweta wəndəa shɛ seyi te mca shɛ ba'a katesla ŋkɛ ŋkɛ kezhɛzhi kezhɛzhi.

⁷Katemeha ghwə ka dzeghe Shala te reghwetɛ ba'a katebete sheghwə hɛ mɛ.

⁸Katebete zhɛzhi nyighɛ hɛ te sheghwə nyi mɛa ghwə nya te reghwetɛ zlaɓe le ghə ba'a merege.

⁹Kateyaɓe yɛ heli ba'a yɛ jajɛghwa ta wəsə keseɗa shɛ wəndəa shɛ. Katetere pɛtɛa wəshia shɛhɛ nde dzeghe Shala te reghwetɛ. Kamelɛ kwa tere tere, wəsə nya nza zəŋwəa ŋkɛ zeɗehwe nda ke Mahwətə tenza ŋkɛ.

¹⁰Ma keɗe ŋkɛ kadzeghe melɛ kwa tere tere le wəsə keseɗa nya ɓɛhwɛ ne, game keɗema zhɛfa nya ɗema beze te yakese ŋkɛ.

¹¹Katesla ghə ŋkɛ yite kwa kema ta Mahwətə, laka bela kwa gwela ta reghwetɛ. Kateyisə mimia ŋkɛ ka dzeghe Shala nyi kaŋwale tezhilia Aron dzeyi vare yɛ bela ta reghwetɛ.

¹²Katesla wəsə keseɗa ŋkɛ kezhɛzhi kezhɛzhi, zlaɓe le ghə ba'a merege. Katebete hɛ nde dzeghe Shala te sheghwə nyi mɛa ghwə nya te reghwetɛ.

¹³Kateyaɓe yɛ heli ba'a yɛ jajɛghwa ŋkɛ. Kwa sebe ta ŋkɛ, kateve nda hɛ nde dzeghe Shala ke Mahwətə ba'a katetere hɛ ŋkɛ pɛtɛ te reghwetɛ. Kamelɛ kwa tere tere, wəsə nya nza zəŋwəa ŋkɛ zeɗehwe nda ke Mahwətə tenza ŋkɛ.

¹⁴Ma keɗe wəndə kadzeghe nda melɛ kwa tere tere ke Mahwətə le 'yɛ ne, gheɗepe keɗema ghwəɗəŋkwə yakele ŋkɛ.

¹⁵Katekele 'yɛa shɛ nde dzeghe Shala kase kadzete reghwetɛ, katendaɗe welɛ ŋkɛ te ba'a katetere ghəa ŋkɛ ŋkɛ te reghwetɛ. Kwa sebe ta ŋkɛ ne, kateyisə mimia ŋkɛ ŋkɛ dzeyi vare yɛ bela ta reghwetɛ.

¹⁶Katekelemte wədanaka le wəshi nyi kwa ŋkɛ kezha negha laka ŋkwa kesame ta veci yitea reghwetɛ, te ŋkwa nya nza pəsəɗə nyi kededənə.

¹⁷Kateperawe 'yɛa shɛ ŋkɛ bake mbe, kaɗema kenehe hɛ rakatse. Kwa sebe ta ŋkɛ ne, katetere ŋkɛ ŋkɛ te ghwə nya te reghwetɛ. Kamelɛ kwa tere tere, wəsə nya nza zəŋwəa ŋkɛ zeɗehwe nda ke Mahwətə tenza ŋkɛ.»