Read KapsikiDC Ka Lɛvi 10 Bible Online

Ka Lɛvi 10 - KapsikiDC bible

Ka Lɛvi 10

¹Lelaŋe yɛ Nadab le Abihəw, ŋwale tezhilia Aron te wəsə ketere 'wərdəa nci. Pa hɛ beteyi laɗe ta ghwə kwa hɛ ba'a kwərə kwərəaghe 'wərdə kənə. Tsagha ne, pa hɛ veveyi wəsə gəməa 'wərdə nya keɗema kehi kwa kema ta Mahwətə, kaɗema kala nya kegezave nda geva ke hɛ.

²Tagha gɛ, deɗamə ghwə tsete geva kwa kema ta Mahwətə ba'a teremte hɛ. Mɛke hɛ mpənji kwa kema ta Mahwətə.

³Ma ke Moyize sha Aron: «Ma ke Mahwətə meɗekɛ ŋayɛ: ‹Ma mbeli nyi kehende ɗa geva ne, kaɗe 'ya kaɗepete ɗa hɛ kaShala nya kaganda. Kaɗe 'ya kave zləvə hɛ te 'ya kwa kema ta mbeli pɛtɛ.›» Tikə tikə Aron nzanyɛ.

⁴Pa Moyize hekake yɛ Mishayɛl le Ɛlisafan, ŋwalea Əwziyɛl, wəzege ta wəza yitenyɛa Aron. Ma ke sha hɛ: «Kwiɗi mə kadzeki kafə geva ta ka menəhɛ ŋayɛ shave mbe ŋkwa nya keveyi geva tekeleke kajive pelɛ te wəmbəa ghedəkwə.»

⁵Pa hɛ menete kala nya gezete Moyize ba'a fəmte hɛ shave mbe ghedəkwə mbe lekwesa ta nci.

⁶Ma ke Moyize sha yɛ Aron le kweci ŋwale tezhilia ŋkɛ nyi bake, yɛ Ɛlazar le Itamar: «Mba yɛ kesərə shintia ghəa ŋayɛ kwəshivərəŋə ba'a mba yɛ keŋkwahe lekwesa ta ŋayɛ va mte ta wəndə, yagha yɛ kampə ba'a kahekake nda hwepe wənəa Shala ke mbeli pɛtɛ. Sərəakɛ mə ka menəhɛ ŋayɛ nyi kaka Israyɛl kanehwene mbeli nyi mpəmte Mahwətə le ghwə.

⁷Ma gheyɛ le ŋa ŋayɛ ne, mba yɛ keslə mɛa ŋkwa kedzembe cɛ lekwesa kebegeme geva, yagha yɛ kampə. Kwa nza ŋkɛ ne, nahe n'yi keve ŋkwa tekeleke nya shekeyi ŋayɛ mbeli kwa ghə keveyi ŋayɛ tekeleke kezha slene ta Mahwətə.» Pa yɛ Aron le ŋwalea ŋkɛ menete kala ghena nya gezave nda Moyize ke hɛ.

⁸Ma ke Mahwətə sha Aron:

⁹«Ma gheyɛ le ŋwale tezhilia ŋa ne, sama tɛ, ya kwete wəsə nya keghwəyi ŋkwa yɛ, vəa ŋkwa nya dzembe cɛ lekwesa kebegeme geva yɛ ma. Ma tsagha ne, katempə yɛ we. Wəsə mahalegə nya keɗema kazhɛremte geva ŋkɛ, kandimə ndimə tenza ŋkɛ sha gheyɛ.

¹⁰Mba yɛ kesa wəsə nya keghwəyi ŋkwa. Ma tsagha ne, wəsə kaneheve wəsə nya keveyi geva tekeleke le nya ɗema keveyi geva tekeleke, wəsə nya wɛŋe le nya wale wale.

¹¹Wərə yɛ kateke nda wəshi mahalegə nyi gezete nda 'ya ke ka Israyɛl laka Moyize ke hɛ perə.»

¹²Ma ke Moyize sha yɛ Aron le ŋwale tezhilia ŋkɛ nyi ketene bake, yɛ Ɛlazar le Itamar: «Kelete mə wəsə gəməa hə nya ketene, kwa sebe ta nya ntave nya keveyi geva kezha Mahwətə mbeli seyi kənə ne, takɛ mə ɗafa kwalekwala le ba'a zehwe mə yitea reghwetɛ, va nya nza ŋkɛ kawəsə nya keveyi geva tekeleke.

¹³Mbe ŋkwa nya keveyi geva tekeleke tezeme yɛ, kwa nza ŋkɛ gheŋkɛ ya kaŋa ŋayɛ bela le ŋwale tezhilia ŋa hwa wəshi gəmə nyi tere nda mbeli ke Mahwətə. Nya ya kaghena nya kegezete ɗa geva.

¹⁴Ma yɛ medzeŋezle le seɗa ta wəshi keseɗa nyi dzeghekɛ melɛ kejikə ghə ka Israyɛl le ba'a nyi keveyi geva kwa kema ta Mahwətə le ɓela gəsəkəa ve nda wəsə ne, te ŋkwa nya wɛŋe zeme geva hɛ. Katezeme zhɛzhia shɛhɛ yɛ le ŋwale tezhili ba'a ŋwalea kwɛa ŋa, kwa nza ŋkɛ ne, ŋa ŋayɛ hɛ.

¹⁵Katekele seɗa ba'a medzeŋezle ka Israyɛl kase yitea bela nyi nza merege te nyi tere mbeli te reghwetɛ. Ma kwa sebe ta ɓela ta gəsəkəa ve nda wəsə ke Mahwətə ne, kaŋa ŋayɛ nza zhɛzhia shɛhɛ, kwa nza ŋkɛ ghenci ya kaŋa ŋayɛ bela kaghala ghala, kala ghena nya gezete Mahwətə.»

¹⁶Pa Moyize 'yɛwakɛ ghena te ghəa zhɛfa melɛ keyaɓe jaɗafa mbeli le. Ma fa ŋkɛ ne, nahe mbeli keteremte ŋkɛ. Mɓɛke ŋkɛ hwepete wənə va yɛ Ɛlazar le Itamar, ŋwale tezhilia Aron nyi ketene bake, ma ke sha hɛ:

¹⁷«Wa raberə ɗema yɛ zeme slia wəsə melɛ nya mbe ŋkwa nya keveyi geva tekeleke, va nya nza ŋkɛ kawəsə nya keveyi geva tekeleke wa? Mahwətə nde ndeke ŋayɛ wəsə keseɗa shɛ kezha kelemte jaɗafa ta pɛtɛa ka Israyɛl ba'a kezha ɓela gəsəkəa kele jaɗafa seyi te wənə kənəa hɛ kwa kema ta Mahwətə.

¹⁸Ma kwa ɗema mimia ŋkɛ kekeleghe geva kadzembe ŋkwa nya keveyi geva tekeleke ne, te ŋkwa nya keveyi geva tekeleke hi yɛ kazeme slia wəsə keseɗa shɛ, kala nya gezave ŋayɛ 'ya.»

¹⁹Ma ke Aron zhɛnete nda ke Moyize: «Fatema, ma te veci nya dzeghekɛ nda melɛ keyaɓe jaɗafa ba'a melɛ kwa tere tere ŋwalea ɗa ke Mahwətə ne, nahe na keɗepe wəsə nya kemenete ɗa geva. Zeɗehwe nda tenza ŋkɛ ke Mahwətə kezehwe slia wəsə keseɗa nya dzeghekɛ melɛ keyaɓe jaɗafa mbeli le 'ya te vecia shɛ na?»

²⁰Pa Moyize fave megela zhɛnete ŋkɛ.