Read KapsikiDC Ka Lɛvi 15 Bible Online

Ka Lɛvi 15 - KapsikiDC bible

Ka Lɛvi 15

¹Ma ke Mahwətə sha yɛ Moyize le Aron:

²«Ma pe yɛ sha ka Israyɛl: Ma yayata za nya hwɛ wəshi sawa mbe kwala ve ne, wale wale nza ŋkɛ va wəshia shɛhɛ.

³Ya wəshia shɛhɛ nza kahwɛ sawa mbe kwala ta ŋkɛ ba'a zhiɓəmte ne, za nya wale wale za shɛ.

⁴Ma yayata ŋkwa nya se za shɛ meɓelahe ba'a mentishɛ te ne, wale wale nza ŋkɛ.

⁵Ma wəndə nya kekwaɗakɛ ŋkwa keɓelahea shɛ ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

⁶Ma wəndə nya kentishɛnyɛ te ŋkwa nya se za nya shewəa shɛ mentishɛ ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

⁷Ma wəndə nya kekwaɗakɛ wəndə nya shewəa shɛ ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

⁸Ma kentifəate ndɛghwɛɗɛ wəndə nya shiwəa shɛ te wəndə nya wɛŋe ne, katetsewe lekwesa ta ŋkɛ wəndəa shɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

⁹Ma yayata serede nya se za shɛ kadzeghwa te ne, wale wale nza ŋkɛ.

¹⁰Ma yayata wəndə nya kekwaɗakɛ wəsə nya kese yitea wəndə nya shewəa shɛ ne, wale wale nza ŋkɛ pa va tɛhwɛɗi. Ma wəndə nya kekelete wəsə nya kala nyagha ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

¹¹Ma yayata wəndə nya kwaɗakɛ wəndə nya shewəa shɛ kaɗema ŋkɛ kepɛkɛ dzeve ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

¹²Ma yayata wəsə rekɛ nya kwaɗakɛ wəndə nya shewəa shɛ ne, katempə mbeli. Ma yayata wəsə sheghwə ne, kateyaɓe mbeli hwa yɛmə nya bəzləvə.

¹³Ma vəa ŋkwa nya kiɗi hwɛ ta wəshi nyi keveyi ŋkɛ wale wale yitea wəndəa shɛ ne, katemene hɛ ŋkɛ mberefaŋe nda tenza ŋkɛ wɛŋe. Katetsewe yɛ lekwesa ta ŋkɛ ŋkɛ ba'a katepɛ ŋkɛ le yɛməa ɗasle. Ma kwa sebe ta ŋkɛ ne, katenza ŋkɛ wɛŋe.

¹⁴Ma te kwa deghese ta hɛ ne, katekese ghwəɗəŋkwə bake keɗema gheɗepe bake ŋkɛ kase ba'a katefə nda hɛ ŋkɛ ke nde dzeghe Shala, kwa kema ta Mahwətə, mɛa ŋkwa kedzembe cɛ lekwesa kebegeme geva.

¹⁵Katedzeghe melɛ keyaɓe jaɗafa nde dzeghe Shala le kwete hwa 'yɛa shɛhɛ. Ma kwete ne, kezha melɛ kwa tere tere. Kwa sebe ta ŋkɛ, kateɓela gəsəkəa yaɓe wəshi nyi kese kahwɛ yitea wəndəa shɛ ŋkɛ kənə kwa kema ta Mahwətə.

¹⁶Ma kese kameya kahwɛ yitea za ne, katepɛ geva ta ŋkɛ ŋkɛ pɛtɛ. Ama wale wale nza ŋkɛ pa va tɛhwɛɗi.

¹⁷Ma yayata lekwesa keɗema gwada nya kwaɗakɛ kameya shɛ ne, katetsewe mbeli le yɛmə. Ama wale wale nza ŋkɛ pa va tɛhwɛɗi.

¹⁸Ma kese yɛ za le male kaɓelahe ne, katepɛ hɛ bake nci. Ama wale wale nza hɛ pa va tɛhwɛɗi.

¹⁹Ma kenza male kafə wəshi, ma kenza mimi kasawa yite ne, wale wale tenza nde kashikwə təhə. Ma yayata wəndə nya kekwaɗakɛ ŋkɛ ne, wale wale nza ŋkɛ pa va tɛhwɛɗi.

²⁰Ma yayata ŋkwa nya se nde meɓelahe te ba'a yayata wəsə nya se nde mentishɛ te vəa ŋkwa nya nza wəshi yite ne, wale wale nza nde.

²¹Ma yayata wəndə nya kekwaɗakɛ ŋkwa keɓelahe ta nta ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

²²Ma yayata wəndə nya kekwaɗakɛ wəsə nya se nde mentishɛ te ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

²³Ma kenza kwete wəsə te ŋkwa keɓelahea shɛ keɗema te ŋkwa nya se nde mentishɛ, nda kwaɗakɛ wəsəa shɛ wəndə ne, wale wale nza wəndəa shɛ pa va tɛhwɛɗi

²⁴Ma kenza za kaɓelahe le malea shɛ, nda kwaɗakɛ ŋkɛ kadaŋwa ne, wale wale nza za shɛ kashikwə təhə. Ma yayata gezle nya meɓelahe ŋkɛ te ne, wale wale nza ŋkɛ.

²⁵Ma kenza mimi kasawa yitea male kahɛ kwele kwele kaɗema kavəa fə wəshia nta keɗema kezlakemte vəa fə wəshi ta nta sawa ta mimia shɛ ne, wale wale nza nde kala temə ta sawa ta mimia shɛ. Wale wale nza nde kala nya te hɛ nyi nza wəshi yite.

²⁶Ma yayata gezle nya se nde kaɓelahe te keɗema yayata tsəkwələ nya se nde mentishɛ ne, wale wale nza nde kala nya te və nya nza wəshi yite.

²⁷Ma yayata wəndə nya kekwaɗakɛ gezlea shɛ keɗema tsəkwələa shɛ ne, katetsewe lekwesa ta ŋkɛ ŋkɛ ba'a katepɛ ŋkɛ. Ama wale wale nza ŋkɛ pa va tɛhwɛɗi.

²⁸Ma kekiɗi sawa ta mimi yite ne, kateɓela hɛ nde mberefaŋe. Kwa sebe ta ŋkɛ ne, wɛŋe tenza nde.

²⁹Ma te kwa deghese ta hɛ ne, katefə nda ghwəɗəŋkwə bake keɗema gheɗepe bake nde kase ke nde dzeghe Shala, mɛa ŋkwa kedzembe cɛ lekwesa kebegeme geva.

³⁰Katedzeghe melɛ keyaɓe jaɗafa nde dzeghe Shala le kwete hwa 'yɛa shɛhɛ. Ma kwete ne, kezha melɛ kwa tere tere. Kwa sebe ta ŋkɛ, kateɓela gəsəkəa yaɓe ta mimia nta ŋkɛ kənəa malea shɛ kwa kema ta Mahwətə.

³¹Kategeze nda yɛ ke ka Israyɛl kanza cakeɗake, vəa ŋkwa nya nza hɛ wale wale. Ma tsagha ne, katempə va nza ta nci wale wale, geze ta ŋkɛ, va nya zhɛrete cɛ lekwesa ta ɗa nya keveyi geva tekeleke nya te tepe ta nci nya hɛ wale wale we.»

³²Nyi ya kaghena nyi kegezete geva te ghəa za nya se wəshi keɗema kameya nyi kezhɛre ŋkɛ wale wale kasawa mbe kwala ve,

³³male nya kese wale wale va wəshi nyi kese yite, geze ta ŋkɛ, za keɗema male nya se wəshi kasawa yite, tsagha za nya keɓelahe le male vəa ŋkwa nya nza nde wale wale.