Read KapsikiDC Ka Lɛvi 26 Bible Online

Ka Lɛvi 26 - KapsikiDC bible

Ka Lɛvi 26

¹Menema kweci shala yɛ ma, mɓema wəshi nyi feɗete mbeli keɗema yɛ gɛaŋa yɛ ma, vema pelɛ nyi pesakɛ mbeli yɛ te hɛɗia ŋayɛ kezha hawe va hɛ ma. Kwa nza ŋkɛ ne, 'ya ya kaMahwətə Shala ta ŋayɛ.

²Ya mə veci kezhɛne mpi ba'a hawe mə va ŋkwa nya keveyi ɗa geva tekeleke. 'Ya ya kaMahwətə.

³Ma keyate wəshi mahalegəa ɗa yɛ, ma kenza yɛ kamene slene megela le ghena nyi gezete 'ya ne,

⁴kateme ŋayɛ va 'ya te vəa ŋkɛ. Ma tsagha gɛ, katemene wəshi te hɛɗi ba'a kateya yɛ wəfe.

⁵Ma te hɛɗia ŋayɛ ne, katetemə leke ta ha pa te və nya tenda yɛ rɛzɛŋe mbeli, katenda yɛ rɛzɛŋe yɛ pa te və nya tsawe wəshi yɛ. Kwele kwele tenza wəshi kezeme va gheyɛ ba'a gwezlayɛ tenza yɛ te hɛɗia ŋayɛ.

⁶Kateve kwelɛŋe 'ya te hɛɗi. Ma vəa ŋkwa nya teɓelahe yɛ ne, wəsə shɛ kateghakɛ ŋayɛ we. Kateza sebe 'ya te wəshi keseɗa nyi ghyana ghyana te hɛɗi. Katezhɛne mpa kadzete hɛɗia ŋayɛ we.

⁷Katekeka ka ghema ta ŋayɛ yɛ, katebete hɛ te kema ta ŋayɛ va kafayɛ.

⁸Katekeka ka ghema gwəmsə mbelia ŋayɛ mcɛfe, katekeka ka ghema 10.000 mbelia ŋayɛ gwəmsə, katebete ka ghema ta ŋayɛ te kema ta ŋayɛ va kafayɛ.

⁹Katezhɛre geva 'ya kase sha gheyɛ, kateve ŋayɛ ŋwale 'ya kwele kwele ba'a katekese jikə geva ta ɗa 'ya le gheyɛ.

¹⁰Katezeme meghweme ta wəshi yɛ, katefəmte meghweme yɛ kezha bete mɛnɛfɛ te ŋkwa ŋkɛ.

¹¹Kateve ŋkwa kenza ta ɗa 'ya te tepe ta ŋayɛ, katezhɛne 'ya kazhɛre ŋayɛ wəmbə we.

¹²Katedzeghwa 'ya te tepe ta ŋayɛ. Katenza 'ya kaShala ta ŋayɛ ba'a ketenza yɛ kambelia ɗa.

¹³'Ya ya kaMahwətə Shala ta ŋayɛ nya kefəakame ŋayɛ same kwa Ɛzhipte yitea ɗema yɛ kanza kaka mavashia nci. Ma se mɛa nya ŋslemte berete ta Ɛzhipte nya kehwepete ŋayɛ 'ya ne, wərə yɛ kadzeghwa le kema hwa ghweme.

¹⁴Ma keɗema yɛ kahawe va 'ya ba'a kamene slene le ghena nyi gezete 'ya,

¹⁵ma kenehemte jikə geva ta ɗa yɛ laka hawema va wəshi mahalegəa ɗa, laka zhɛre nda wəmbə ke wəshi nyi gezete 'ya ba'a laka menema slene le ghena nyi gezete 'ya ne,

¹⁶wa nya tsetse temene ŋayɛ 'ya: Kateghwene ŋayɛ ndiremi nyi ghazlənə mbeli ve, zereghwe nyi keɗema kakiɗi ba'a ɗawa 'ya. Kateghare ntsə hɛ te gheyɛ ba'a katetɛtini ŋayɛ hɛ pa te mte. Katetsawe wəshi yɛ te wəve gəmə, kwa nza ŋkɛ ne, ka ghema ta ŋayɛ ka tezeme hɛ.

¹⁷Kateme 'ya te gheyɛ ba'a katehərə ŋayɛ ka ghema ta ŋayɛ. Katesleke ŋayɛ mbeli nyi keɗema ntsə ta ŋayɛ ba'a katehwɛ yɛ kaɗema wəndə kakeka ŋayɛ.

¹⁸Ma keɗema yɛ kafa ɗa ŋa ɗa shanda ne, kateve ɗa 'ya mberefaŋe zhigə te gheyɛ tewəmbəreke yɛ jaɗafa ta ŋayɛ.

¹⁹Kateŋsle berete nya keve ŋayɛ kele ghə nya 'ya, katezhɛre ghweme ta ŋayɛ 'ya ntɛaŋe ntɛaŋe kala lɛ kənəa gheyɛ ba'a hɛɗia ŋayɛ ntɛaŋe ntɛaŋe kala mze kwa ghwə ghwə.

²⁰Katekiɗi berete ta ŋayɛ gəmə, katezhɛne hɛɗi kamene wəshi ba'a yɛ wəfe kaya we.

²¹Ma kenza yɛ kazhɛne ɗa ghə ba'a keɗema yɛ kaɗe kafa ɗa ŋa ɗa ne, kateve ɗa 'ya te gheyɛ mberefaŋe zhigə kala yɛ jaɗafa ta ŋayɛ.

²²Kateghwene ŋayɛ wəshi keseɗa nyi hwa gamba 'ya kase. Katempə ŋwalea ŋayɛ hɛ, kateza sebe hɛ te wəshi keseɗa ta ŋayɛ ba'a katempə ŋayɛ yitea zhɛrenji hweŋkwa ta ŋayɛ kaɓerama.

²³Ma keshaŋe wəshi nyi ka'yɛte ŋayɛ, ma mba yɛ kazhɛne ɗa ghə,

²⁴ma 'ya le ŋa ɗa perə ne, katezhɛne ŋayɛ ghə 'ya, kateve ɗa 'ya te gheyɛ mberefaŋe zhigə tewəmbəreke yɛ jaɗafa ta ŋayɛ.

²⁵Katekele mpa 'ya kase kadzehwa gheyɛ, va nya nehemte jikə geva ta ɗa le gheyɛ yɛ. Katewəfərə yɛ dzeyi mbe yɛ meleme ta ŋayɛ. Ama kateghwene ba 'ya kase kadzehwa gheyɛ ba'a kateve geva yɛ mbe dzeve ta ka ghema ta ŋayɛ.

²⁶Ma vəa ŋkwa nya tendaŋe ŋayɛ 'ya te ɗafa ne, wərə mi meŋe katakɛ ŋayɛ ɗafa kwa dəghwə nya kwetɛŋe. Ɗafa ɓɛhwɛ yatekele ŋayɛ hɛ kase. Katezeme ɗafa shɛ yɛ kaɗema ŋkɛ kaŋkakɛ ŋayɛ ma.

²⁷Ma keɗema yɛ kafa ɗa ŋa ɗa kwa sebe ta wəshi nyi, ma mba yɛ kazhɛne ɗa ghə,

²⁸ma 'ya le ŋa ɗa mbe hwepe ta wənəa ɗa ne, katezhɛne ŋayɛ ghə 'ya. Kateve ɗa 'ya te gheyɛ mberefaŋe zhigə tewəmbəreke jaɗafa ta ŋayɛ.

²⁹Katezeme slia ŋwalea ŋayɛ yɛ.

³⁰Kateza sebe 'ya te ŋkwa ŋayɛ nyi keveyi geva tekeleke, katempə yɛ reghwetɛ ketere 'wərdəa ŋayɛ 'ya. Katetsene mbeli nyi kempə mpəa ŋayɛ 'ya kənəa wəshi nyi kempə mpə nyi zhɛrete nyi yɛ kashala ba'a kateɗema ŋayɛ 'ya.

³¹Katezhɛre yɛ meleme ta ŋayɛ 'ya kakwəfi ba'a kateŋzla ŋkwa ŋayɛ nyi keveyi geva tekeleke 'ya. Katezhɛne 'ya kafa zeɗea zəŋwəa 'wərdəa ŋayɛ we.

³²Katebeze hɛɗia ŋayɛ 'ya le ghəa ɗa. Katenza ka jaga ta ŋayɛ nyi ketese kanza te heheɓake.

³³Katekele mpa 'ya kase kadzeghwa gheyɛ ba'a katetaze ŋayɛ 'ya dzeyi hwa kweci hwelefefi. Katezhɛre hɛɗia ŋayɛ kaɓerama ba'a yɛ meleme ta ŋayɛ kakwəfi.

³⁴Tagha gɛ, katezhɛne mpi hɛɗia ŋayɛ, mbe və nya tenza nya nde kewəfə wəfə ba'a nya tenza nya yɛ te hɛɗia ka ghema ta ŋayɛ. Katenza ŋkɛ te ŋkwa vəa zhɛne mpi nyi keɗema nyi kemenete geva.

³⁵Kaganda ne, katezhɛne mpi hɛɗi kezha wa və nyi sema nyi yɛ kazhɛne nda mpi, vəa ŋkwa nya nza yɛ te.

³⁶Ma kaŋa mbelia ŋayɛ nyi ketetene teghweme te yɛ hɛɗia ka ghema ta nci ne, kateta geva ta nci 'ya. Gaka ta sleke nya keteɗe nde tekeka hɛ. Katehwɛ hɛ kala nya hwɛ mbeli va kafayɛ ba'a katebete geva hɛ te hɛɗi kaɗema mbeli kakeka hɛ.

³⁷Kateteɗe hɛ te wəndə te wəndə kala nya hwɛ mbeli va kafayɛ. Ndagwara wəndə shɛ katekeka hɛ we. Kateghereŋe hɛ kwa kema ta ka ghema ta nci we.

³⁸Katempə hɛ te kweci hɛɗi. Yɛ hɛɗia ka ghema ta nci ka tezeme hɛ.

³⁹Ma mbelia ŋayɛ nyi mba teghweme te hɛɗia ka ghema ta ŋayɛ ne, katezeza hɛ tewəmbəreke jaɗafa ta nci ba'a tewəmbəreke jaɗafa ta ka shihɛ nci.

⁴⁰Ama mbeli nyi ketetenea shɛhɛ teghweme ne, kateɗepete fete ta nci ba'a fete ta ka shihɛ nci hɛ. Ma ke hɛ sha tegeze: Nahe n'yɛ kemenete nda fete nyi dzawe ke Shala ba'a nahe n'yɛ kezhɛnete nda ghə.

⁴¹Katefave hɛ 'ya nde zhɛnete nda ghə ke hɛ ba'a nde fəghe hɛ kadzete hɛɗia ka ghema ta nci. Tagha gɛ, kateshifə ghəa nci hɛ kwa kema ta ɗa laka ɗepe beze ghena nyi menete ɗa hɛ. Kateyɛ hɛ kaɗa hɛ 'ya te fete ta nci.

⁴²Tagha gɛ, katezəzə jikə geva nyi menete 'ya le ka shihɛ nci 'ya: Zhakob, Izak ba'a Abraham. Katezəzə meɗe mɛ nya meɗeyi nda 'ya ke hɛ te ghəa hɛɗi 'ya perə.

⁴³Ma vəa ŋkwa nya teɗema hɛ te hɛɗia shɛ ne, katezhɛne mpi ŋkɛ. Ma mbe vəa shɛ ne, kateyɛ hɛ kaɗa hɛ 'ya, va nya betemte wəshi mahalegəa ɗa hɛ ba'a nya ɗema wəshi nyi gezete 'ya hɛ.

⁴⁴Ndagwara ma vəa ŋkwa nya tenza hɛ te hɛɗia ka ghema ta nci ne, katebete hɛ 'ya we, katezhɛre nda wəmbə 'ya ke hɛ we, kateza sebe 'ya te hɛ ba'a katenehe jikə geva ta ɗa 'ya le hɛ we, kwa nza ŋkɛ ne, 'ya ya kaMahwətə Shala ta nci.

⁴⁵Kezha hɛ ne, katezəzə jikə geva nya menete 'ya le ka shihɛ nci nyi fəakame nyi 'ya same kwa Ɛzhipte te ntsə ta kweci hwelefefi 'ya, yitea nza 'ya kaShala ta nci. 'Ya ya kaMahwətə.

⁴⁶Nyi ya kawəshi mahalegə, wəshi nyi kegezete geva ba'a wəshi nyi ketekete geva nyi veyi Mahwətə kwelɛ ghəa ŋkɛ le ka Israyɛl, pelɛ ghweme ta Sinay, laka Moyize.