Read KapsikiDC Ka Lɛvi 3 Bible Online

Ka Lɛvi 3 - KapsikiDC bible

Ka Lɛvi 3

¹Ma keɗe wəndə kadzeghe melɛ kejikə ghə le wəsə keseɗa nya wəba ne, pa keseke mca keɗema mbəkwə nya ɗema beze te kase kadzawa kema ta Mahwətə.

²Pa ŋkɛ dapeyi dzeve ta ŋkɛ kwa ghəa wəsə keseɗa shɛ ba'a sleyite ghə yite mɛa ŋkwa kedzembe cɛ lekwesa kebegeme geva. Tagha gɛ, kateyisə mimia ŋkɛ ka dzeghe Shala nyi kaŋwale tezhilia Aron dzeyi vare yɛ bela ta reghwetɛ.

³Wa nyi bela nyi teve nda ba'a nyi tetere nda mbeli ke Mahwətə nyi te wəsə keseɗa shɛ: merege nya dzate te heli ba'a nya kənəa wəshi nyi kwa hwə,

⁴ghwelese bake nci ba'a merege nya kənəa hɛ, merege nya dzate te yɛ slerepe. Ma bela ta mene nya ganyɛ ne, zlaɓe sla hɛ mbeli le yɛ ghwelese.

⁵Pa ka dzeghe Shala teremte pɛtɛa wəshia shɛhɛ te reghwetɛ, kanya kwetɛŋe le melɛ kwa tere tere nya te sheghwə nyi mɛa ghwə. Kamelɛ kwa tere tere nya nza zəŋwəa ŋkɛ zeɗehwe nda ke Mahwətə tenza ŋkɛ.

⁶Ma keɗe wəndə kadzeghe nda melɛ kejikə ghə ke Mahwətə le wəsə keseɗa nya ɓɛhwɛ ne, ŋeza keɗema ŋemalea wəsə nya ɗema beze te yakese ŋkɛ.

⁷Ma kenza ŋkɛ katəmə ne, pa keseke kase kadzawa kema ta Mahwətə.

⁸Pa ŋkɛ dapeyi dzeve kwa ghəa ŋkɛ ba'a sleyite ghə yite mɛa cɛ lekwesa kebegeme geva. Tagha gɛ, kateyisə mimia ŋkɛ ŋwale tezhilia Aron dzeyi vare yɛ bela ta reghwetɛ.

⁹Wa nyi bela nyi nza merege te nyi ve nda mbeli ke Mahwətə te wəsə keseɗa shɛ nyi: pɛtɛa dəŋərə nya slamte mbeli mɛa zezərəa wəmbə, pɛtɛa merege nya dzate te heli ba'a nya kənəa wəshi nyi kwa hwə,

¹⁰ghwelese bake nci le merege nya kənəa hɛ ba'a merege nya dzate te slerepe. Ma bela ta mene nya ganyɛ ne, zlaɓe sla hɛ mbeli le yɛ ghwelese.

¹¹Pa nde dzeghe Shala teremte wəshi nyi pɛtɛ te reghwetɛ. Wəsə kezeme nya teremte nda mbeli ke Mahwətə ŋkɛ.

¹²Ma keɗe wəndə kadzeghe melɛ le kwe ne, pa keleghe kase kadzawa kema ta Mahwətə.

¹³Pa dapeyi dzeve kwa ghəa ŋkɛ ba'a sleyite ghə yite mɛa cɛ lekwesa kebegeme geva. Tagha gɛ, kateyisə mimia ŋkɛ ŋwale tezhilia Aron dzeyi vare yɛ bela ta reghwetɛ.

¹⁴Wa nyi wəshi nyi teve nda ba'a nyi tetere nda mbeli ke Mahwətə nyi te wəsə keseɗa shɛ: pɛtɛa merege nyi dzate te heli ba'a nyi kənəa wəshi kwa hwə,

¹⁵ghwelese bake nci le merege nya kənəa hɛ ba'a merege nya dzate te slerepe. Ma bela ta mene nya ganyɛ ne, zlaɓe sla hɛ mbeli le yɛ ghwelese.

¹⁶Pa nde dzeghe Shala teremte wəshi nyi pɛtɛ te reghwetɛ. Wəsə kezeme nya teremte nda mbeli ke Mahwətə ba'a nya kezəŋwə nda megela ŋkɛ. Pɛtɛa merege kaŋa Mahwətə.

¹⁷Vatse nza ŋkɛ kawəsə mahalegə nya kaghala ghala sha gheyɛ keshi keshi, te yayata ŋkwa nya nza yɛ: katezeme merege, ya mimi yɛ we