Read KapsikiDC Ka Lɛvi 6 Bible Online

Ka Lɛvi 6 - KapsikiDC bible

Ka Lɛvi 6

¹Ma ke Mahwətə sha Moyize:

²«Ma pa na sha yɛ Aron le ŋwalea ŋkɛ: Wa nya ghena nya kegezete geva te ghəa melɛ kwa tere tere: hwencɛke ncɛke nza wəsə melɛa shɛ te ghwə te reghwetɛ nya hehende ghwə mbeli yite.

³Ma kwa sebe ta ŋkɛ ne, kateseɗe lekwesa pawa ba'a kwampi pawa nde dzeghe Shala. Katefə pəsəɗə nya kededənə ta wəsə keseɗa nya keteremte geva ŋkɛ same kwa reghwetɛ ba'a katebete ŋkɛ dzawa vare reghwetɛa shɛ.

⁴Ma kwa sebe ta ŋkɛ, kateseɗemte lekwesa ta ŋkɛ kezha seɗe kweci lekwesa. Katefə pəsəɗə nya kededənə ŋkɛ shave mbe ghedəkwə kadzete ŋkwa nya wɛŋe.

⁵Ma ghwə nya ketse te reghwetɛ ne, katemte ŋkɛ tɛape we. Kala kiɗi ta ŋkwa ne, katebete təkwə nde dzeghe Shala mɛ ba'a kateve wəsə keseɗa kedzeghe melɛ kwa tere tere ŋkɛ te. Kwa sebe ta ŋkɛ ne, katetere bela nyi nza merege te ŋkɛ kamelɛ kejikə ghə.

⁶Keveci keveci tetse ghwə te reghwetɛ kaɗema kamte.»

⁷Wa nya tsetse hi ŋkɛ le wəsə gəməa wəshi nyi kese te wəve: Ŋwale tezhilia Aron ka hi kabete hɛ te reghwetɛ kwa kema ta Mahwətə.

⁸Pa kwete wəndəa ka dzeghe Shala ntave hə nya kehwaɗe hwaɗe le n'yi demake mbe dzeve ba'a pɛtɛa 'wərdə kwa hə hə nya kənəa wəsə gəmə. Pa ŋkɛ teremte hɛ te reghwetɛ kawəsə gəmə nya heka mbeli “kawəsə kezəzə”. Zeɗehwe nda tenza n'yia ŋkɛ nya kezəŋwə megela ke Mahwətə.

⁹Ma wəshi nyi ketene ne, katezeme hɛ yɛ Aron le ŋwalea ŋkɛ. Kaɗema tenjɛne hwe tezeme hɛ te ŋkwa nya keveyi geva tekeleke, te ŋwela ta cɛ lekwesa kebegeme geva.

¹⁰Kata wəsə gəmə nya ketenea shɛ mbeli le tenjɛne we. Kwa nza ŋkɛ ne, bela nya ve nda Mahwətə ke ka dzeghe Shala ŋkɛ, nya kese mbe wəshi nyi dzeghe nda melɛ mbeli le. Wəsə nya keveyi geva tekeleke kaŋa Mahwətə ŋkɛ, kala bela nya ketene yitea melɛ keyaɓe jaɗafa keɗema yitea melɛ kedimə ghə.

¹¹Deke ka shihɛnyɛa Aron nyi kazhili ka tezeme, kwa nza ŋkɛ kaŋa nci veyi geva nyagha bela ta wəshi gəmə nyi fəke nda mbeli ke Mahwətə tekeleke kaghala ghala. Vatse gɛ, ma yayata wəndə nya ketekwaɗe wəsəa shɛ ne, kateme ɗa nya dzawe te.

¹²Ma ke Mahwətə sha Moyize:

¹³«Ma kwa sebe ta veyi geva yɛ Aron le ŋwale ŋkɛ tekeleke ne, hə kakiləwə mahekene yave nda hɛ ke Mahwətə mbe vəghwə, kamasheke kwete bela ta ŋkɛ, katɛhwɛɗi kwete bela nya ketene.

¹⁴Pa mbeli hwaɗete həa shɛ megela le n'yi nda tesere ŋkɛ mbeli te kələ. Kwa sebe ta ŋkɛ, pa mbeli ncɛncɛhweve gatewea shɛ mbe nda teve nda mbeli ke Mahwətə. Zeɗehwe nda tenza n'yia ŋkɛ nya kezəzə megela ke Mahwətə.

¹⁵Ma vəa ŋkwa teveyi geva kwete hwa ŋwalea Aron tekeleke kawəndə kwelea ka dzeghe Shala ne, tsagha shɛ temene ŋkɛ: gheŋkɛ ya kawəsə gəmə nya kaghala ghala nya tere nda mbeli pɛtɛ ke Mahwətə.

¹⁶Ma kenza ŋkɛ nde dzeghe Shala nde keleke wəsə gəməa wəshi nyi kese te wəve ne, pɛtɛ ve ŋkɛ: wəsə shɛ kazeme mbeli mbe we.»

¹⁷Ma ke Mahwətə sha Moyize:

¹⁸«Ma pa na sha yɛ Aron le ŋwalea ŋkɛ: Wa nya tsetse hi mbeli kadzeghe melɛ keyaɓe jaɗafa: Pa mbeli sleyite ghə yite wəsə keseɗa shɛ kwa kema ta Mahwətə, te ŋkwa nya sla ghə te wəshi keseɗa kedzeghe melɛ kwa tere tere. Gheŋkɛ ya kawəsə nya keveyi geva tekeleke.

¹⁹Nda nde dzeghe Shala nya ketedzeghe melɛa shɛ nde nza kazehwe. Mbe ŋkwa nya keveyi geva tekeleke zeme geva ŋkɛ, te ŋwela ta cɛ lekwesa kebegeme geva.

²⁰Ma yayata wəsə nya ketekwaɗe slia wəsə melɛa shɛ ne, kateme ɗa nya dzawe te: ma keyisəate geva mimia wəsə keseɗa shɛ te lekwesa ne, te ŋkwa nya keveyi geva tekeleke tsewe ŋkwa nya kwaɗakɛ mimia shɛ mbeli te.

²¹Ma nda kwa shaga rekɛ takɛ slia shɛ mbeli ne, pa mbeli mpəmte shaga shɛ. Ma nda kwa shaga lɛ takɛ geva nde ne, pa mbeli yaɓemte ba'a yaghelemte le yɛmə.

²²Deke zhili nyi ki ghɛa ka dzeghe Shala ka tezeme slia shɛ, va nya nza ŋkɛ kawəsə nya keveyi geva tekeleke.

²³Ama kekeleke geva mimia wəsə keseɗa nya dzeghekɛ melɛ mbeli le kase kadzembe cɛ lekwesa kebegeme geva ba'a kemenete slene mbeli le mbe ŋkwa nya keveyi geva tekeleke kezha kele jaɗafa seyi te wənə ne, kazeme slia wəsə keseɗa shɛ mbeli we. Pa mbeli teremte ŋkɛ le ghwə.»