Read KapsikiDC Ka Lɛvi 7 Bible Online

Ka Lɛvi 7 - KapsikiDC bible

Ka Lɛvi 7

¹Wa nya tsetse hi mbeli kadzeghe melɛ kedimə ghə: wəsə gəmə nyi keveyi geva tekeleke ŋkɛ.

²Pa mbeli sleyite ghə yitea wəsə keseɗa te ŋkwa nya sla ghə mbeli te wəshi keseɗa kedzeghe melɛ kwa tere tere, kwa sebe ta ŋkɛ, pa nde dzeghe Shala yisəyi mimia ŋkɛ dzasle dzeyi vare reghwetɛ.

³Pa ŋkɛ fəke nda bela nyi nza merege te ke Mahwətə: dəŋərə, merege nya kənəa heli,

⁴ghwelese bake nci le merege nya kənəa hɛ, merege nya dzate te teɓa. Ma bela ta mene nya ganyɛ ne, kanya kwetɛŋe sla hɛ mbeli le yɛ ghwelese.

⁵Pa nde dzeghe Shala teremte hɛ pɛtɛ te reghwetɛ. Gheŋkɛ ya kamelɛ kedimə ghə nya teremte nda geva ke Mahwətə.

⁶Deke zhili nyi ki ghɛa ka dzeghe Shala ka tezeme slia wəsə keseɗa shɛ. Mbe ŋkwa nya keveyi geva tekeleke tezeme slia shɛ hɛ, va nya nza ŋkɛ kawəsə nya keveyi geva tekeleke.

⁷Kanya kwetɛŋe nza wəshi nyi kegezete geva te ghəa melɛ kedimə ghə ba'a melɛ keyaɓe jaɗafa. Kaŋa nde dzeghe Shala nya kedzeghekɛ melɛ keyaɓe jaɗafa nza slia wəsə keseɗa shɛ.

⁸Ma vəa ŋkwa dzeghekɛ melɛ kwa tere tere kwete wəndə ne, kaŋa nde dzeghe Shala nya keɓelate gəsəkə nza hweta ta wəsə keseɗa shɛ.

⁹Ma wəshi gəməa wəshi nyi kese te wəve nyi ketakɛ geva kwa dəghwəa keɗema nyi keserekɛ te kələ ne, kaŋa nde dzeghe Shala nya keɓelate gəsəkə nza hɛ perə.

¹⁰Ama wəshi gəmə nyi kesema te ghwə nyi kehwaɗe hwaɗe le n'yi keɗema nyi keɗema kehwaɗe ne, yipə yipə nehe hɛ ka dzeghe Shala.

¹¹Wa nya tsetse hi mbeli kadzeghe nda melɛ kejikə ghə ke Mahwətə:

¹²Ma kenza kwete wəndə kadzeghe melɛ kejikə ghə kezha beghe cimə ketsa hana ne, pa tseheke gatewe n'yi nyi ketakɛ geva kaɗema tenjɛne hwe, gatewe nyi ɗema tenjɛne hwe nyi keɓete mbeli le n'yi ba'a gatewe nyi takɛ mbeli le hə nya kehwaɗe hwaɗe le n'yi yitea wəsə keseɗa.

¹³Pa ŋkɛ keleke ɗafa kwalekwala kadzevare yɛ gatewe yitea melɛ kejikə ghə ketsa hana.

¹⁴Pa ŋkɛ ɗave yayata wəsə gəməa shɛ kezha Mahwətə. Kaŋa nde dzeghe Shala nya keyisəate mimi te reghwetɛ nza gatewe nyi ketene.

¹⁵Ma kaŋa slia wəsə keseɗa nya dzeghekɛ melɛ kejikə ghə mbeli le ne, pɛtɛ zeme mbeli te vecia shɛ. Wəsə shɛ katene mbeli kahendɛ we.

¹⁶Ma nda melɛ keyipə meɗe mɛ keɗema melɛ kejikə ghə yadzeghekɛ kwete wəndə ne, wərə mbeli kazehwe kwete bela ta sli te vecia shɛ. Wərə mbeli kazeme nya ketene te hendɛ ta ŋkwa.

¹⁷Ma ketene ŋkɛ kavatahebezle ne, pa mbeli teremte.

¹⁸Ma kezehwe slia melɛ kejikə ghəa shɛ wəndə te kwa mahekene ta hɛ ne, kakele ɗafa melɛa wəndəa shɛ we. Zləvə te melɛ nya dzeghekɛ ŋkɛ we, kwa nza ŋkɛ ne, nahe slia shɛ kezhɛrenyɛ wale wale. Ma wəndə nya kezehwe ne, fete yamenete ŋkɛ.

¹⁹Ma kekwaɗakɛ wəsə nya wale wale slia shɛ ne, kazhɛne mbeli kazeme we, pa mbeli teremte ŋkɛ le ghwə. Nda wəndə nya wɛŋe nde zeme slia wəsə melɛ.

²⁰Ma kenza ŋkɛ wale wale wəndə nda zehwe slia melɛ kejikə ghə nya dzeghekɛ nda mbeli ke Mahwətə ŋkɛ ne, pa mbeli ŋkamte ŋkɛ mbe hwelefe ta ŋkɛ.

²¹Ma wəndə nya kekwaɗakɛ wəsə nya wale wale, wəndə nya wale wale, wəsə keseɗa nya wale wale keɗema yayata wəsə nya wale wale, nda zehwe slia wəsə keseɗa nya dzeghekɛ nda melɛ kejikə ghə mbeli le ke Mahwətə ne, kateŋkamte geva wəndəa shɛ shave mbe hwelefe ta ŋkɛ.

²²Ma ke Mahwətə sha Moyize:

²³«Ma pa na sha ka Israyɛl: Katezeme merege ta sla, təmə keɗema kwe yɛ we.

²⁴Ma merege ta wəsə kwa mte mte keɗema nya peslekɛ wəshi keseɗa nyi hwa gamba ne, zemema yɛ ma, ama wərə yɛ kamene kweci wəshi le.

²⁵Ma kezehwe merege ta wəsə keseɗa nya teremte nda mbeli ke Mahwətə wəndə ne, kateŋkamte geva ŋkɛ shave mbe hwelefe ta ŋkɛ.

²⁶Zemema mimia 'yɛ keɗema ŋa wəsə keseɗa yɛ, te yayata ŋkwa nya nza yɛ ma.

²⁷Ma yayata wəndə nya kezehwe mimi ne, kateŋkamte geva ŋkɛ shave mbe hwelefe ta ŋkɛ.»

²⁸Ma ke Mahwətə sha Moyize:

²⁹«Ma pa na sha ka Israyɛl: Ma kenza wəndə kadzeghe melɛ kejikə ghə ne, pa keleke nda zhigə ŋa ŋkɛ bela ke Mahwətə.

³⁰Gheŋkɛ le ghəa ŋkɛ nde fə nda ŋa Mahwətə kase, geze ta ŋkɛ, bela nyi nza merege te ba'a medzeŋezle ta wəsə keseɗa. Ma kenza ŋkɛ kave nda medzeŋezle ke Mahwətə ne, pa ɓelate gəsəkə ve nda wəsə.

³¹Pa nde dzeghe Shala teremte bela nyi nza merege te te reghwetɛ. Ama medzeŋezle le ŋa ŋkɛ ne, kaŋa yɛ Aron le ŋwalea ŋkɛ tenza ŋkɛ.

³²Pa yɛ kelete seɗa kwa zeme ta wəsə keseɗa nya dzeghekɛ melɛ mbeli le kezha ve nda ke nde dzeghe Shala.

³³Seɗa kwa zeme ya kaŋa wəzege ta Aron nya kekeleghe mimi ba'a bela nyi nza merege te va wəsə keseɗa kadzete reghwetɛ.

³⁴Mahwətə le ghəa ŋkɛ nde geze ŋayɛ, gheyɛ ka Israyɛl kezha bete yɛ medzeŋezle le seɗa ta wəshi keseɗa nyi dzeghekɛ melɛ kejikə ghə mbeli le te ŋa nci ŋkwa. Ke yɛ nde dzeghe Shala Aron le ŋwalea ŋkɛ fə nda hɛ yɛ, kwa nza ŋkɛ kaŋa nci tenza bela shɛhɛ kaghala ghala.»

³⁵Nyi ya kaŋa yɛ Aron le ŋwalea ŋkɛ bela hwa wəshi melɛ nyi dzeghekɛ nda mbeli ke Mahwətə, ɗa ma ta mbeli kebeteyi hɛ te slene ta dzeghe nda melɛ ke Mahwətə.

³⁶Nahe Mahwətə kegezave nda ke ka Israyɛl kave nda hɛ ke hɛ, te veci nya veyi hɛ ŋkɛ tekeleke. Wəsə mahalegə nya keɗema kazhɛremte geva ŋkɛ kaŋa nci, keshi keshi tenza ŋkɛ.

³⁷Nyi ya kawəshi nyi kehi kezha melɛ kwa tere tere, wəshi gəməa wəshi nyi kese te wəve, melɛ keyaɓe jaɗafa, melɛ kedimə ghə, melɛ keve ŋkwa te slene ba'a melɛ kejikə ghə.

³⁸Mahwətə nde gezave nda wəshia shɛhɛ ke Moyize pelɛ ghweme ta Sinay, te ɓerama, te veci nya gezave nda ŋkɛ ke ka Israyɛl kafə nda wəshi gəmə kase.