Read KapsikiDC Zhɛrɛmi 10 Bible Online

Zhɛrɛmi 10 - KapsikiDC bible

Zhɛrɛmi 10

¹Ka Israyɛl, fate mə ghena nya geze ŋayɛ Mahwətə.

²Wa nya ghena nya geze ŋkɛ nya: «Mba yɛ keteke wəshi nyi mene kweci hwelefefi. Mba yɛ keghazlənə va wəshi kencɛ wəshi nyi pelɛ ghweme. Kweci hwelefefi ka ghazlənə va hɛ.

³Gəmə hweŋkwa kezele Shala ta kweci mbeli. Pa mbeli tsasleve sheghwə mbe ghɛa wəfe, pa nde feɗe wəshi feɗete wəsə nya zhɛre mbeli kashala.

⁴Kapesakɛ le mze kwa ghwə ghwə keɗema le mze kwa tere tere, kabaŋeyi vare ŋkwa le kwesa ba'a le ndevele kezha ɗema ŋkɛ kagaŋkəɗə.

⁵Kala wəsə kedake 'yɛ nya menate mbeli te ŋ'wene yɛ shala shɛhɛ, kageze ghena hɛ we. Nda mbeli kakelete hɛ, kwa shɛma hɛ dzeghwa le ghəa nci. Ghazlənəma yɛ va hɛ ma: kaɗa ŋkwa hɛ we, kakemanakɛ ŋkwa hɛ we.»

⁶Wəndə shɛ kala gha we Mahwətə we, kewəba ŋa na, wəbake zləvəa sləa ŋa.

⁷Wa nde ɗema kaghazlənə va gha wa meghea mbeli pɛtɛ? Hwa ka ntsehwele ntsehwele nyi mbe kweci hwelefefi ba'a mbe yayata hɛɗi ne, wəndə shɛ kala gha we.

⁸Mbeli nyi pɛtɛ ne, ka gezhia kɛfi hɛ: katekete nda wəshi shala ta ncia shɛhɛ ke hɛ we, kasheghwə hɛ.

⁹Ma shala shɛhɛ ne, mze kwa tɛawetɛa nyi vɛsəte hɛ, nyi fəke mbeli se mbe Tarsis keɗema mze kwa tere tere nyi fəke mbeli mbe Əwfaz. Yɛ nde feɗe wəshi le nde vɛsə mze ka menete hɛ, pa mbeli seɗete nda lekwesa kwa ghɛmɛ keɗema kwa ndereme ndereme ke hɛ. Pɛtɛa wəshi nyi zhɛrete nyi mbeli kashala ne, deke slene ta ka caŋa caŋa hɛ.

¹⁰Ama Shala nya kaganda Mahwətə, Shala teghweme, meghe nya kaghala ghala. Ma kehwepete wənə ŋkɛ ne, kagaŋkəɗə hɛɗi, kazereghete hwepe wənəa ŋkɛ kweci hwelefefi we.

¹¹Wa nya ghena nya tegeze nda yɛ ke hɛ nya: Nahe shala nyi keɗema kepate yɛ ghweme le hɛɗi keŋkamte geva te hɛɗi, ŋkwa kenza ta nci shɛ kwake te hɛɗi we.

¹²Nahe Mahwətə kencɛte berete ta ŋkɛ kwa pate hɛɗi ŋkɛ, nahe ŋkɛ kencɛte ntsehwelea ŋkɛ kwa veyi shihəa hɛɗi lema ŋkɛ, laka ɗepe wəsəa ŋkɛ pelakeyi ghweme ŋkɛ.

¹³Ma kegezete ghena ŋkɛ, katsene geva yɛmə pelɛ ghweme, katsene geva ləmbə kwele kwele same kwa zeweve ta ghweme, gheŋkɛ nde mene slesla ta va nda teme ŋkɛ, gheŋkɛ nde ntsa sefə ŋkɛ se te ŋkwa nya nza ŋkɛ.

¹⁴Pɛtɛ mbeli heheɓake, kaɗema kafave. Ma mbeli nyi kevɛsəte wəshi kashala ta nci ne, shewə hɛ va hawe kwa menete hɛ hɛ, kwa nza wəshi nyi vɛsəte hɛ katseŋwə, mpi mbe hɛ we.

¹⁵Wəshia kwadanji hɛ, wəshi nyi zhɛ ŋkwa ŋ'wəshi ve hɛ. Pɛtɛ tezamte geva sebe te hɛ vəa ŋkwa nya tese Mahwətə kameha ghwə.

¹⁶Ama kenza Shala ta Zhakob kala hɛ we, gheŋkɛ nde pate wəshi pɛtɛ. Ŋa ŋkɛ hwelefe ta Israyɛl, Mahwətə nde berete sləa ŋkɛ.

¹⁷Zhɛrəzalɛm, fə wəshia ŋa hwa hɛɗi, gha nya dzaslete mbeli.

¹⁸Kwa nza ŋkɛ, wa nya ghena nya geze Mahwətə nya: «Ma tsetsenya deŋwa gɛ ne, katebeza mbeli nyi te hɛɗi 'ya kala pelɛ nya kwa beza pelɛ. Terasle tenza 'ya yitea hɛ kezha ɗema hɛ kambelenji.»

¹⁹Ma ke ka Zhɛrəzalɛm: «Aya, wa nya ndiremi te gheɓəmə wa! Kampi zhia ɓəmə we! Ma zəzə mə: kwele kwele zhia shɛ we, wərə mə kazereghehwe.

²⁰Nahe yɛ cɛ lekwesa ta ɓəmə ketazemte geva, pɛtɛ zewe nyi te keslamte geva. Mba ŋwalea ɓəmə we, nahe hɛ keslənji. Wəndə shɛ te gheɓəmə kezha mɓe ɓəmə cɛ lekwesa ta ɓəmə ba'a kezha hwepe ɓəmə lekwesa nyi dzeyi yite we.»

²¹Ma ke Zhɛrɛmi: «Fete ta mbeli nyi te ghə ŋkɛ: ka gezhia kɛfi hɛ, kese hɛ ka'yɛwe ghena va Mahwətə we. Vatse shaŋe hɛ kamene wəsə, kwetɛ kwetɛŋe mbeli nyi ya hɛ ketazenji.

²²Fama mə gaka nya kehende geva nya kase gi! Ndiremi nya wəba nde se laka bela kwa gwela kezha zhɛre meleme nyi mbe Zhəwda kaɓerama, kaŋkwa kewəfərə ta yɛ kelɛ gamba.»

²³Mahwətə, nahe 'ya keɗepe kaɗema wəndə ŋelɛ kaslekete ghəa ŋkɛ. Wəndə shɛ kayate ŋkeɗe ta seɗa ta ŋkɛ we.

²⁴'Yɛte ɗa Mahwətə, ama dzeghe dzeghe na, kaɗema le hwepe wənə. Ma keɗema ŋkɛ tsagha, katemberɛɗɛ ɗa na.

²⁵Hwepete nda wənə ɓetəkə ke kweci hwelefefi, ke mbeli nyi keɗema kahekɛme sləa ŋa. Kwa nza hɛ kampə mbelia ŋa, pɛtɛ zamte sebe hɛ te hɛ, kazamte hɛɗia nci.