Read KapsikiDC Zhɛrɛmi 13 Bible Online

Zhɛrɛmi 13 - KapsikiDC bible

Zhɛrɛmi 13

¹Wa nya ghena nya geze ɗa Mahwətə nya: «Kwiɗi pave hətə kwa shinti, hwepeyi hwa hwəa ŋa, ama yate va yɛmə.»

²Pa 'ya pave hətə kwa shinti kala nya gezete ɗa Mahwətə, pa 'ya hwepeyi hwa hwə.

³Kakwa bake zhigə, pa Mahwətə gezete ɗa ghena kala nya:

⁴«Kelete hətə nya pave nya na, nya hwa hwə nya va gha, kwiɗi kadzawa hələa Efrate shɛ na wəfərəakɛ kwelɛ perawe ta keleɓa kwagha.»

⁵Cape 'ya kadzawa hələa Efrate kawəfərəakɛ kala nya gezete ɗa Mahwətə.

⁶Ma kwa sebe ta hɛ kwele kwele ne, ma ke Mahwətə sha 'ya: «Zhɛneghe geva kadzawa hələa Efrate shɛ na kelete hətə nya gezete ŋa 'ya kawəfərə.»

⁷Pa 'ya zhɛneghe geva kadzawa Efrate, ntake 'ya kazele hətəa shɛ, pa 'ya kelete te ŋkwa nya wəfərəakɛ 'ya. Newe 'ya ne, pɛtɛ ŋkɛ keda da, mba kawəsəa wəndə we.

⁸Ma ke Mahwətə sha 'ya ɓiyitsa:

⁹«Wa nya ghena nya geze Mahwətə nya: Tsetse tedamte kele ghəa Zhəwda ba'a kele ghə nya wəba nya va Zhɛrəzalɛm 'ya.

¹⁰Kwa nza mbelia shɛhɛ kaka 'yaghwa mehele nyi keɗema fa ghena ta ɗa ba'a nyi kentsə geva mbe ntɛaŋentɛa ghəa nci. Pa lənji kahawe ba'a kagwəɗəŋə yitea kweci shala. Yawa, kala hətə nya keda da nya, kaɗema kamenete wəsə tezhɛre mbeli nyi!»

¹¹Ma ke Mahwətə: «Kala nya hwepe hətə wəndə hwa hwə ne, tsagha hwepahwe ka Israyɛl le ka Zhəwda 'ya hwa hwə, kezha nza hɛ kambelia ɗa, kaka ncɛ sləa ɗa, kaka tsahe ɗa ba'a kaka ve zləvə te 'ya. Ama kefate ɗa ghena hɛ we.»

¹²Ma pa na sha tegeze nda ke hɛ: «Wa nya ghena ta Mahwətə, Shala ta ka Israyɛl nya: Nahe yɛ ghwelepe keŋate geva kezha 'yɛ tɛ. Ma ‹Tsagha shɛ ŋkɛ, nahe ghen'yɛ keɗepe›, ke kezhɛnete hɛ ne,

¹³wa nya ghena nya geze Mahwətə nya pa sha hɛ: ‹'Ya kateghwəyi mbeli nyi te hɛɗi nya pɛtɛ, ka meghe nyi pelɛ pasla ta David, ka dzeghe Shala, ka mɛ ŋkwa ba'a mbeli nyi mbe Zhɛrəzalɛm pɛtɛ.

¹⁴Katempəmte hɛ 'ya gərəzlə gərəzlə kala yɛ ghwelepe, gərəzlə yɛ yita le ŋwale. Wəndə shɛ katesərə 'ya we. Kwete zhɛ heli shɛ kafɛake ɗa kempə hɛ we›, 'ya Mahwətə nde gezete.»

¹⁵Fate mə, veyite mə sleme yite, mba yɛ kenza kaka kele ghə, Mahwətə nde geze ghena.

¹⁶Tsahe mə Shala Mahwətə ta ŋayɛ tewə ŋkɛ keghweneke ŋkwesle, tewə tehene ketsakɛ ŋayɛ mbe ŋkwesle hwa ghweme. Same ta veci yaneghe yɛ ne, ama pa zhɛremte kaŋkwesle nya zhikwətəkwə, pa ŋkɛ menete kaləmbə nya ɗɛkeɗɛ.

¹⁷Ma keɗema yɛ kafa ghena nya ne, katenehwene 'ya tewəfərə va kele ghəa ŋayɛ, pelame pelame tebete nehwene ntsə ta ɗa kwa nza mbeli katefəhwe mbelia Mahwətə.

¹⁸Geze nda ke yɛ meghe le meghekɛ: «Ntishɛ ŋayɛ mə hwa hɛɗi, kwa nza ŋkɛ nahe derə meghea ŋayɛ nya ndeɗe keteɗe sawa mbe ghəa ŋayɛ.

¹⁹Nahe meleme nyi laka bela kwa zeme keŋzlemte geva, wəndə shɛ kazhɛne kaghwenemte gelembea nci we, kwa nza ŋkɛ pɛtɛ mbeli kefəhwe ka Zhəwda, pɛtɛ fəhwe hɛ mbeli.»

²⁰Zhɛrəzalɛm, walaŋe pa sha ŋkwa gi: wa nyi ka jaga ta ŋa kase laka bela kwa gwela. Tema mbeli nyi dapave ŋa nyi 'ya wa? Tema timɛti nyi keve zləvə nyi te gha wa?

²¹Tsema tegeze na te və nya teɗa mbeli nyi senave nda nza na kaka mcɛhɛ ŋa ke hɛ tse wa? Ashɛ kwəpe tenza yaka kənəa gha kala male nya keheha va ya wəka?

²²Ma kegeze na: Wa raberə seke ɗa se wəsə nya wa, a pa, tewəmbəreke kwelea fete ta ŋa ŋwasakame lekwesa ta ŋa mbeli, kaɓelahehwe ɓelahe le gha kaberete.

²³Kazhɛremte hweta ta geva ta ŋkɛ nde ŋkereyi na? Kakelemte verezlɛzlɛ nya te geva ta ŋkɛ deghwava na? Tsagha ɗema gheyɛ nyi kesene ŋayɛ yitea mene wəsə kwa ndiremi kamenete wəsə kwa ganyɛ!

²⁴'Ya katetazemte ŋayɛ kala kwa shekwəli nyi fə sefə nya kese te ɓerama.

²⁵Ma ke Mahwətə: «Zhɛrəzalɛm, wa nya wəsə nya keneghe ŋa, nya veyi ŋa 'ya nya, kwa nza ŋkɛ nahe na kezaghəyite ɗa kezha ve nda ghəa ŋa ke kweci shala gɛ ne,

²⁶ma 'ya perə, 'ya kateŋwasakame lekwesa ta ŋa pa kwa kema, yitea nza na mederelaŋe.

²⁷Nahe 'ya kenakɛ yɛ vale tahea ŋa le yɛ hiŋwə hiŋwə ta ŋa te vəa mene mefətekwəa ŋa nya kawəsə hawe. Pelɛ yɛ wəmbəa ŋkwa ba'a dzeyi hwa yɛ gamba ne, nahe 'ya kenakɛ shala ta ŋa nyi ndiremi ndiremi kashasha. Ɗa ya te gha Zhɛrəzalɛm, kaɗe na kayaɓe ghəa ŋa we. Pa te nyama və tetemə ŋkɛ wa?»