Read KapsikiDC Zhɛrɛmi 14 Bible Online

Zhɛrɛmi 14 - KapsikiDC bible

Zhɛrɛmi 14

¹Ghena nya gezete nda Mahwətə ke Zhɛrɛmi te ghəa ɓɛaŋwela.

²Zewe ya hwa hwə va ka Zhəwda, ŋzla yaŋzla yɛ meleme ta nci, teheɗe kema va hɛ, dedeba'a hɛ hwa hɛɗi. Pa pelɛ ghweme dzeme lewela ta Zhɛrəzalɛm.

³Kaghwene ka mene slene ta nci mbelia jama kadzawa ghwa kagə yɛmə. Hwa'a hɛ mɛa yɛ ghwa ne, yɛmə kwa hɛ we, zhɛne hɛ kasame le yɛ wəmbetea nci ghweghwəndəliŋə. Kwetɛ kwetɛŋe mehele ta nci, teheɗe kema va hɛ ba'a teŋa teŋa ghəa nci.

⁴Ma kwa perawe hɛɗi va nya ɗema va kame ne, kwerɗake ɗake mehele ta ka wəza, dəpə hɛ sha wəsə kənəa ghə va hawe.

⁵Pa le le nya kwamte hwa gamba kewəfəyite zhɛgwə kwateya ta ŋkɛ, kwa ɗema gwəzə shɛ.

⁶Rəgəsə kwara lɛmə gamba ghereŋenji pelɛ wəmbə nyi dɛrɛŋe rɛŋe, zəŋwəa sefə yafa hɛ kala yɛ kelɛ gamba. Leɓakwe ntsə ta nci kasepa gwəzə, ama ashɛ shɛ we.

⁷Ma ke hɛ: «Kaganda nza jaɗafa ta n'yɛ ɗaŋe ɗaŋe, ama gha gɛ Mahwətə, menete kwete wəsə kazləvəa ŋa! Kwele kwele zhigə pamte ŋa ghen'yɛ, ka mene ŋa fete ghen'yɛ.

⁸Gha nya vate zəzə Israyɛl te, gha nya kembelete te te vəa ndiremi, wa raberə nza na kala mentiɓə te hɛɗi nya, kala nde se yitea dzeghwa nya kehɛ hɛ viɗi nahe wa?

⁹Wa raberə nza na kala nde dewə berete, kala katsala nya keɗema mba kambelete ŋkwa wa? Ndagwara te tepe ta n'yɛ na Mahwətə, nahe n'yɛ keveyi ŋa geva tekeleke, mba na kesərəakɛ n'yɛ!»

¹⁰Wa nya ghena nya geze nda Mahwətə nya ke mbelia shɛhɛ: «Kaganda ne, kewəba ɗe ndeŋe mbeli nyi, kaya dzeghwa ta nci hɛ we.» Ama kazlama Mahwətə te we. Ma tsetsenya gɛ, katezəzəke fete ta nci ŋkɛ ba'a katemeha ghwə ŋkɛ te jaɗafa ta nci.

¹¹Ma ke Mahwətə sha 'ya: «Səkwə ɗa ma na kezha mbeli nyi ma.

¹²Ya hɛ mene səwəmayɛ ne, kafa lewela ta nci 'ya we. Ya hɛ dzeghekɛ ɗa melɛ kwa tere tere ba'a fəke ɗa wəshi gəmə, kayɛ 'ya we. Ama le mpa, ma ba'a ba tempə hɛ 'ya.»

¹³Ma 'ya: «Aya Shala Mahwətə, ma ke ka mɛa ŋkwa ta ŋa sha hɛ: ‹Katekwaɗe ŋayɛ mpa keɗema ma we, ama kateve ŋayɛ kwelɛŋe ganyɛ Shala teke te ŋkwa nya.›»

¹⁴Ma ke Mahwətə zhɛnete ɗa: «Tseŋwə yasla ka mɛ ŋkwa shɛhɛ te sləa ɗa. Keghwenakɛ hɛ 'ya we, kepelave nda hweŋkwa 'ya ke hɛ we, ghena shɛ kegezete nda 'ya ke hɛ we. Wəshi nyi katseŋwə, ghena nya ɗema zləvə te, zəzə nyi kwa wənəa nci yazlape ŋayɛ hɛ.

¹⁵Vatse gɛ, wa nya ghena nya geze nda 'ya Mahwətə nya ke ka mɛ ŋkwa shɛhɛ: Mbeli nyi kegeze nyi te sləa ɗa geze ghena hɛ ke hɛ ne, keghwenakɛ hɛ 'ya we. Kadzete hɛɗi nya mpa le ma we, ke hɛ sha geze, ndagwara va mpa le ma teza sebe te hɛ.

¹⁶Ma mbeli nyi zlapete nda ghena kelɛŋəa shɛhɛ, selekə lekə tenza hɛ dzeyi kwa hweŋkwa nyi mbe Zhɛrəzalɛm va mpa ba'a va ma. Wəndə shɛ kezha la mbelia shɛhɛ, mia nci, ŋwale tezhilia keɗema ŋwalea kwɛa nci we. Tsetse tezhɛnaghe wəsə kwa ndiremia nci 'ya kənəa hɛ.»

¹⁷«Wa nya ghena nya tegeze nda na ke hɛ nya: Ma nda bete nehwene ntsə ta ɗa viɗi le veci kaɗema kaghereŋe ne, kwa me ɗa nya kwele te degheli nya kambelia ɗa, kampi zhia nta we.

¹⁸Ma kwa dzemte 'ya mbe wəve ne, nda mbeli nyi kempənji hwa mpa yanewe 'ya. Ma kwa zhɛneke geva 'ya kadzembe meleme ne, mbeli nyi kempənji va ma yanewe 'ya selekə lekə. Nda ndeŋe yandeŋe ka mɛa ŋkwa le ka dzeghe Shala kaɗema kafave kwete ghena.»

¹⁹Kaganda neghamte Zhəwda na na? Wənəakwe na va Siyon na? Wa raberə vate zhi nyi keɗema nyi kampi na te ghen'yɛ wa? Kwelɛŋe yaneghe n'yɛ, wəsə ganyɛ shɛ kese we. Vəa mbe yaneghe n'yɛ, ama ghazlənə nde senyɛ.

²⁰Mahwətə, nahe ghen'yɛ keɗepete fete ta n'yɛ ba'a yɛ beze ghena ta ka shihɛ n'yɛ, kwa nza ŋkɛ nahe n'yɛ kemenete ŋa jaɗafa.

²¹Tewəmbəreke wəba ta sləa ne, menema ŋkele ntsə na ma, kelemtema zləvə na te pasla ta meghea ŋa ma. Zəzəte jikə geva nya menete na le ghen'yɛ, nehemtema na ma.

²²Hwa yɛ shala tseŋwəa kweci hwelefefi ne, kwete shɛ kwetɛŋe nya kenza kameke va na? Ghweme le ghəa ŋkɛ nde me va kasawa na? Ashɛ gha ya kaMahwətə Shala ta n'yɛ wəka? Te gha vate zəzə ta n'yɛ ghen'yɛ kwa nza ŋkɛ gha nde mene wəshia shɛhɛ.