Read KapsikiDC Zhɛrɛmi 22 Bible Online

Zhɛrɛmi 22 - KapsikiDC bible

Zhɛrɛmi 22

¹Wa nya ghena nya geze nda Mahwətə ke Zhɛrɛmi nya: «Kwiɗi kadzawa ghɛa meghea ka Zhəwda kageze ghena nya,

²ma tegeze na: ‹Fate ghena ta Mahwətə, gha meghea ka Zhəwda nya pelɛ pasla ta David, tsagha ka mene slene ta ŋa ba'a mbeli nyi kedzeki kwa yɛ mɛ degha ta ŋa.›

³Wa nya ghena nya geze Mahwətə nya: Mene mə wəsə nya tiɗiɗi ba'a nya le hweŋkwa ta ŋkɛ, zləgwəke mə mbeli nyi kesa yaka shave mbe dzeve ta ka sa nda yaka ke hɛ. Mba yɛ kesa nda yaka ke ka se se, ka mezhɛtiti keɗema ka wedidi, mba yɛ kemene berete te hɛ. Sərəakɛ mə mpə mbeli nyi ɗema fete va hɛ te ŋkwa nya.

⁴Ma kemenete slene yɛ le ghena nyi kaganda kaganda ne, mba tenza hwelefe ta David pelɛ pasla. Mba tenza hɛ kaka dzeghwa pelɛ gədəwə keɗema pelɛ wəmata gədəwə ba'a ghenci ka tedzeki kwa mɛ degha nyi te ghɛa meghe, ghenci, ka mene slene ta nci ba'a mbelia nci.

⁵Ama keɗema yɛ kafa ghena ta ɗa ne, wa nya ghena nya geze 'ya nya: kazeme ŋayɛ fela 'ya Mahwətə le ghəa ɗa, kakwəfi tenza ghɛ nya.»

⁶Wa nya ghena nya geze Mahwətə te ghəa ghɛa meghea ka Zhəwda nya: «Ya gha nza ganyɛke kwa ntsə ta ɗa kala hɛɗia Gala'ad keɗema kala ghəa ghweme ta Liban ne, kagezleŋe ghəa 'ya va zhɛre ŋa kaɓerama, kameleme nya ɗema wəndə mbe we.

⁷'Ya kanta mbeli tekeleke kezha za sebe te gha, yayata wəndə le wəshi kemene slene ta ŋkɛ. Katempə sheghwəa lekelekea ŋa nyi ganji ganji hɛ kezha bete mɛa ghwə.

⁸Ma vəa ŋkwa nya tedzeyi kweci hwelefefi vare melemea shɛ ne, ma tegeze hɛ kwelɛ ghəa nci: ‹Wa raberə menete Mahwətə kala nya le meleme nya wa?›

⁹Ma tezhɛne nda mbeli ke hɛ: ‹Va nya wəfəyite jikə geva nya menete hɛ le Shala Mahwətə ta nci hɛ kezha gwəɗəŋə kwa kema ta kweci shala ba'a kahawe va hɛ.›»

¹⁰Ka Zhəwda, nehwenema yɛ yitea meghe Zhoziyas nya kemtenyɛ ma, hɛma hɛ nehwene yɛ yite ma. Ama nehwene mə yitea meghe Shaləwm nya kedzeghwanyɛ, kwa ɗema ŋkɛ mba kanakɛ hɛɗi nya nza məwəhia ŋkɛ te.

¹¹Wa nya ghena nya geze Mahwətə te ghəa Shaləwm, meghea ka Zhəwda nya kekelete ŋkwa yitenyɛ Zhoziyas ba'a nya keslənyɛ teke nya: «Kazhɛne ŋkɛ kazhɛre geva kase we.

¹²Te hɛɗi nya keleghe nya mbeli temte ŋkɛ, kazhɛne ŋkɛ kanakɛ hɛɗi nya we.»

¹³«Ɗa ya te wəndə nya keŋate ghɛa ŋkɛ kaɗema kazele kaganda ba'a cɛa ŋkɛ nyi mencikə mencikə kaɗema kazele nza tiɗiɗi, nya mene nda slene mbeli gəmə kaɗema kaŋki nda meleɓe ke hɛ.

¹⁴Ma pa na sha zəzə: ‹'Ya kateŋa ghɛ nya wəba, cɛ nyi mencikə mencikə nyi jama jama.› Kantsa yɛ wəfela na te, kasleɓe sheghwəa lekeleke na kənəa dewe ta nci ba'a kafi yirə kwa ghɛmɛ na kənəa hɛ.

¹⁵Kameghe nya dzawe veyi ghəa ŋa na kwa menete ghɛ na le sheghwəa lekeleke na? Kala mbeli pɛtɛ se yiteyɛ ŋa kazeme wəshi kezeme ba'a kasa wəshi kesa, ama nahe ŋkɛ kemenete wəshi nyi tiɗiɗi, nyi le hweŋkwa ta ŋkɛ. Nahe ŋkɛ kezehwe zeɗe nza.

¹⁶Nahe ŋkɛ kenewete ghweme te ka titikwəa kɛfi le ka dewə ŋeli ba'a megela se nza ta mbeli. Ma wəndə nya kemene wəsə kala nya ne, ɗepe ɗa ta ŋkɛ yancɛ ŋkɛ, 'ya Mahwətə.

¹⁷Ama gha ne, deke ghəa ŋa yaɗehwe na, nda mpə yampə mbeli nyi ɗema fete va hɛ na ba'a nda berete yamene na te mbeli.»

¹⁸Wa nya ghena nya geze Mahwətə te ghəa Zhowakim, wəzege ta Zhoziyas ba'a meghea ka Zhəwda nya: «Ma kemte ŋkɛ ne, wəndə shɛ kanehwene yite we. Wəndə shɛ kategeze: ‹Kaŋa wəza meyɛ ɗa! Kaŋa wəzha ta meyɛ ɗa!›, ke we. Wəndə shɛ katenehwene kənə: ‹Kaŋa nde sleke ɗa! Kaŋa maze yawe›, ke we.

¹⁹Kelɛ kelɛ tela ŋkɛ mbeli, katentsehe wəndə kemte mtea ŋkɛ mbeli, cakeɗake yitea mɛ degha nyi te Zhɛrəzalɛm tenegha mbeli.»

²⁰«Dzeme ghəa ghweme ta Liban katsa lewela Zhɛrəzalɛm. Fa ŋwələa ŋa mbeli pelɛ wəmbəa Bashan. Tsa lewela pelɛ yɛ ghweme ta Abarim, kwa nza ŋkɛ pɛtɛ ka meghwateshia ŋa kezanji.

²¹Nahe 'ya kegezave ŋa kwa nakama wəsə kakwaɗakɛ ŋa, ama ‹Kaɗe 'ya kafa we›, zhɛnete na. Tsagha mene na se kawəzege, kese na kafa ghena ta ɗa tɛape we.

²²Pɛtɛ tefə ka ya wəshia ŋa sefə, katefə geva ka meghwateshia ŋa kaka mavashi. Bətə tenza zləvəa ŋa ba'a shewə tenza na va hawe tewəmbəreke wəsə kwa ndiremi nya menete na.

²³Ma gha nya kese gwezlayɛ pelɛ Liban, nya kepate ghɛa ŋa dzeyi mbe yɛ lekeleke kala 'yɛ ne, kateŋələvə na te vəa nya tecehate ŋa ndiremi, te və nya tesa yaka na kala male nya keheha va ya!

²⁴Ma pa na sha Koniya[3], wəzege ta Zhowakim ba'a meghea ka Zhəwda: ‹Wa nya ghena nya geze Mahwətə nya: Kazeme ŋa 'ya kafela: Ya tsemanyɛ se na kala lamba nya te ŋgwedɛba nya te dzeve kwa zeme ta ɗa ne, katekelemte ŋa 'ya.

²⁵Kateve ŋa 'ya mbe dzeve ta mbeli nyi keɗe mte ta ŋa, mbeli nyi ghazlənə na va hɛ, ke yɛ Nabəkodonozor, meghea ka Babilone le ka sewajɛa ŋkɛ.

²⁶Kateŋka ŋayɛ 'ya le meyɛ ŋa kadzete hɛɗi nya ɗema məwəhia ŋayɛ te. Te hɛɗia shɛ tempə yɛ.

²⁷Katemawe yɛ tsape tsape kazhɛne geva kase kadzete hɛɗia ŋayɛ, ama katezhɛneke geva yɛ we.›»

²⁸Ma ke mbeli sha 'yɛwe: «Kawəmbete nya kebatse batse nya ɗema wəndə kaɗe, wəsə nya ɗema zləvə te nzanyɛ Koniya na? Wa raberə fəghe hɛ mbeli le ŋwalea ŋkɛ kadzete hɛɗi nya ɗema hɛ keɗepe wa?»

²⁹Hɛɗia ɗa, hɛɗia ɗa, fate ghena ta Mahwətə.

³⁰Wa nya ghena nya geze ŋkɛ nya: «Rafeyi wəndəa shɛ mbeli kawəndə nya ɗema ŋwale ve, kawəndə nya kezamte vəa ŋkɛ gəmə. Kwete hwa ŋwalea ŋkɛ shɛ kakemave nza pelɛ pasla ta David kezha sleke hɛɗia Zhəwda we.»