Read KapsikiDC Zhɛrɛmi 27 Bible Online

Zhɛrɛmi 27 - KapsikiDC bible

Zhɛrɛmi 27

¹Temə vireɗi kwa sebe ta nya dzembe meghe Sɛdɛsiyas, wəzege ta Zhoziyas, meghea ka Zhəwda, ma ke Mahwətə sha Zhɛrɛmi:

²«Wa nya ghena nya geze Mahwətə nya: Neghate yɛ zewe ba'a fefeɗete sheghwə kala nyi te welɛ va sla kewəza. Zlezlaŋeleyi hɛ te welɛa ŋa.

³Kwa sebe ta ŋkɛ, ghweneghe nda hɛ ke meghea ka Ɛdom, meghea ka Mowab, meghe ka Amon, meghea ka Tir ba'a meghea ka Sidon laka ka ghwene ta nci nyi kese kadzembe Zhɛrəzalɛm sha Sɛdɛsiyas, meghea ka Zhəwda.

⁴Ma pa na sha hɛ kezha geze nda ke mbeli nyi kesleke hɛ: Wa nya ghena nya geze Mahwətə nde berete, Shala ta ka Israyɛl nya:

⁵'Ya nde pate hɛɗi, tsagha mbeli ba'a wəshi keseɗa nyi te laka berete ta ɗa nya wəba ba'a kwelea ɗa. Kave nda hɛ 'ya ke wəndə nya ɗe 'ya.

⁶Ma tsetsenya ne, nahe 'ya ketarete kave nda hɛɗi nyi pɛtɛ ke nde mene slene ta ɗa Nabəkodonozor, meghea ka Babilone. Ya wəshi keseɗa nyi hwa gamba ne, kave hɛ 'ya mbe dzeve ta ŋkɛ kezha mene nda slene.

⁷Pɛtɛ tenza hwelefefi mbe dzeve ta ŋkɛ, kwa sebe ta ŋkɛ, mbe dzeve ta wəzege ta ŋkɛ ba'a mbe ŋa shinyɛ, pa te və nya tenza hɛɗia ŋkɛ mbe dzeve ta kweci hɛɗi nyi berete berete ba'a ka meghe nyi jama jama.»

⁸Ma ke Mahwətə: «Ma keɗema kwete hɛɗi keɗema kwete hwelefe kafa nda ghena ke Nabəkodonozor, meghea ka Babilone ba'a keɗema nde kaɗe kanza meghea ka Babilone kənə kala sheghwə nya te welɛ va sla kewəza ne, mpa, ma ba'a ba yateve 'ya te. Ke meghea ka Babilone teve nda hweŋkwa 'ya kaza sebe te hɛɗia shɛ.

⁹Ma gheyɛ gɛ ne, fa nda ma ghena yɛ ke ka mɛ ŋkwa ta ŋayɛ, ka ɗepe wəshi nyi ketemene geva ta ŋayɛ, ka ɗepe ghena nyi mbe shiwə, ka newe nza ta yɛ saseregwa keɗema ka mene ghwɛ ma. Kazhɛne yɛ kanza mbe dzeve ta meghea ka Babilone we, ke hɛ pɛtɛ sha geze ŋayɛ.

¹⁰Ama tseŋwəa yasla ŋayɛ hɛ. Ma kefate nda ghena yɛ ke hɛ ne, kateŋka geva yɛ cakeɗake le hɛɗia ŋayɛ. Kwetɛ kwetɛŋe tetaze ŋayɛ 'ya dzeyi mbe kweci hɛɗi ba'a mɛke tenza sebe te gheyɛ.

¹¹Ama kwete hweŋkwa ya shɛ: ma hwelefe nya keyɛte kakele sheghwə nya ve meghea ka Babilone te welɛ ve kala sla kewəza ne, katesərə ŋkɛ 'ya te hɛɗia ŋkɛ, wərə ŋkɛ kawəza ba'a kanza te. 'Ya Mahwətə nde gezete.»

¹²Ghena shɛnyɛ yagezete nda 'ya ke Sɛdɛsiyas, meghea ka Zhəwda. Ma 'ya shɛ: «Ma gheyɛ le mbeli ŋa ne, veyite mə welɛ yitea sheghwəa nya ve meghea ka Babilone te welɛ va gheyɛ kala sla kewəza, mene nda mə slene ke hɛ le mbelia ŋkɛ, ma tsagha, pələsə tenza mpia ŋayɛ.

¹³Wa raberə ɗe yɛ kampə le mbelia ŋa va mpa, ma ba'a ba kala nya zəzəte Mahwətə kamene nda ke hwelefe nya keteɗema kanza mbe dzeve ta meghea ka Babilone wa?

¹⁴Ma ke kweci ka mɛ ŋkwa sha geze: ‹Katenza yɛ mbe dzeve ta meghea ka Babilone we.› Tseŋwə yasla ŋayɛ hɛ, fa nda ma ghena yɛ ke hɛ ma.

¹⁵Wa nya ghena nya geze Mahwətə nya: ‹Keghwenakɛ hɛ 'ya we, te sləa ɗa geze ghena hɛ ke hɛ, ama tseŋwə yasla hɛ. Ma keyɛte ghena ta nci yɛ ne, kateŋkamte ŋayɛ 'ya teke, mɛke tenza sebe te gheyɛ le ka mɛ ŋkwa nyi kegeze ŋayɛ ghena shɛhɛ.›»

¹⁶Ma 'ya sha ka dzeghe Shala le mbeli nyi tagha pɛtɛ: «Wa nya ghena nya geze Mahwətə nya: ‹Fa nda ma ghena yɛ ke ka mɛ ŋkwa nyi kegeze nyi takwa takwa wəshi kemene slene nyi mbe ghɛa Mahwətə kazhɛne geva shave pelɛ mbe Babilone ke hɛ ma. Tseŋwə yasla ŋayɛ hɛ.

¹⁷Mba yɛ kefa ghena ta nci. Pelave nda mə ghəa ŋayɛ ke meghea ka Babilone, ma tsagha, pələsə tenza mpia ŋayɛ. Wa raberə hi meleme nya kanza kakwəfi wa?›»

¹⁸Ma ke Zhɛrɛmi: «Ma kenza nde ka mɛ ŋkwa ta Shala hɛ kaganda, ma kenza nde ghena ta Mahwətə yageze hɛ kaganda ne, megela ma mpi nda dzeve hɛ ke Mahwətə nde berete kezha sərəakɛ wəshi kemene slene nyi ketene mbe ghɛa Mahwətə, ki ghɛa meghea ka Zhəwda ba'a mbe Zhɛrəzalɛm ŋkɛ kejive Babilone.

¹⁹Kwa nza ŋkɛ ghena ya va Mahwətə te ghəa yɛ selə, weta, yɛ wəmata kala ŋa gədəwə ba'a kweci wəshi kemene slene nyi ketene mbe Zhɛrəzalɛm.

²⁰Kefəmte hɛ Nabəkodonozor, meghea ka Babilone shave mbe Zhɛrəzalɛm kajive Babilone kwa fəghe yɛ Yekoniya, wəzege ta Zhowakim, meghea ka Zhəwda ŋkɛ le mbelia jama nyi Zhəwda ba'a nyi mbe Zhɛrəzalɛm we.

²¹Wa nya ghena nya geze Mahwətə nde berete, Shala ta ka Israyɛl te ghəa wəshi kemene slene nyi ketene mbe ghɛa Mahwətə, ki ghɛa meghe ba'a mbe Zhɛrəzalɛm nya:

²²‹Pɛtɛ tefəmte geva hɛ kajive Babilone. Pelɛagha tenza hɛ pa te və nya tezhɛne hɛ 'ya kase teke.›» Nya ya kaghena nya gezete Mahwətə.