Read KapsikiDC Zhɛrɛmi 3 Bible Online

Zhɛrɛmi 3 - KapsikiDC bible

Zhɛrɛmi 3

¹Ma ke Mahwətə: Ma keŋkamte male ta ŋkɛ wəndə, nda kelehwe kwete wəndə, kashɛ zhɛneve zhɛkwa kamale na? Ashɛ hɛɗia shɛ yazhɛrete ŋkɛ wale wale wəka? Ama gha gɛ Israyɛl, nahe na kemenete mefətekwə le ka meghwateshi kwele kwele! Nya ya kaghena nya geze 'ya, 'ya Mahwətə.

²Newe pa sha ŋkwa nyi dzeme kwa ghəa yɛ wəmbə gi, wəmbə shɛ ya kwetɛŋe nya sema na kamene mefətekwə pelɛ na? Mɛa hweŋkwa ntishɛ na kaneghe hɛ kala ka mbarara nyi te ɓerama. Nahe na kezhɛremte hɛɗi wale wale le mene mefətekwə ba'a dzeghwa kwa ndiremia ŋa.

³Vatse fɛake ŋa va 'ya, kese meŋzleghele kame we. Ama mba na kantsə geva yitea mene mefətekwəa ŋa, hɛreɗɛ na ɗema ɗepe hawe nya te gha.

⁴Tsetsenya ne, ma pa na tsave ɗa lewela: «Yita yawe, gha nya kamcɛ ɗa se kawəzege,

⁵mba nza ŋkɛ le 'ya te wənə shanda na? Mba nza 'ya kande ghema ta ŋkɛ na?» Ama mba na mbe ntsə geva yitea beze ghena shɛ!

⁶Ma te vəa meghe Zhoziyas, ma ke Mahwətə sha 'ya: «Nahe na kenakɛ wəsə nya mene Israyɛl, kwa fama ghena na? Nahe ŋkɛ kese pelɛ nyama nyama ta ghweme, yitea yayata wəfe nya gwəzləmə kamene mefətekwəa nta?

⁷Ma zəzə 'ya: Kwa sebe ta wəshi nyi menete nyi nde ne, katezhɛne geva nde kase sha 'ya. Ama kese kazhɛne geva kase we. Nahe Zhəwda, wəzha ta meghekɛ kwa mbəɗəkwə kenakɛ.

⁸Nahe 'ya keŋkamte Israyɛl kwa fama ghena va vale tahea nta, laka palepa keŋkamte male. Ama Zhəwda kwa mbəɗəkwə ne, kese kaghazlənə we, cape nde yitea ŋa nta mefətekwə kamene.

⁹Pa ŋkɛ menete vale tahe le shala nyi kapelɛ ba'a nyi kasheghwə, laka wəshi nyi kala nyi zhɛremte hɛɗi nde wale wale.

¹⁰Ya tsema nza ŋkɛ kala nya, ma Zhəwda kwa mbəɗəkwə nya kawəzha ta meghekɛa Israyɛl ne, kese kazhɛne geva le wənəa ŋkɛ pɛtɛ kase sha 'ya we, ama deke kwa mɛ, wa'a ke Mahwətə.»

¹¹Ma ke Mahwətə sha 'ya: «Tiɗiɗi ma Israyɛl kwa fama ghema ke Zhəwda kwa mbəɗəkwə.

¹²Kwiɗi zlapete ghena nya laka bela kwa gwela: ‹Zhɛneke geva Israyɛl kwa fama ghena! Mba 'ya kateheɗe ŋa kema we, kwa nza ŋkɛ ganyɛke mehele ta ɗa, kanza 'ya le ghema te wənə kaghala ghala we, wa'a ke Mahwətə.

¹³Ɗepete fete ta ŋa, ke 'ya Shala Mahwətə ta ŋa zhɛnete nda ghə na. Nahe na kese kandeŋe kwa sebe ta kweci shala dzeyi yitea wəfe nyi gwəzləmə. Kese na kafa ghena ta ɗa we, wa'a ke Mahwətə.›»

¹⁴Wa nya ghena nya geze Mahwətə nya: «Se ŋayɛ mə, ŋwale ka fama ghena, kwa nza ŋkɛ 'ya ya kande sleke ŋayɛ: katetseha ŋayɛ 'ya təhə shave mbe meleme, bake shave mbe yita kezha fə ŋayɛ kadzembe Siyon.

¹⁵Kateve ŋayɛ mbeli nyi keteya ŋayɛ 'ya, nyi ɗe ghəa ɗa ba'a nyi ketedzeghwa le gheyɛ le mehele.»

¹⁶Wa nya ghena nya geze Mahwətə nya zhɛkwa: «Ma te vəa shɛ, kateya ŋwale pɛre ba'a kwele kwele tenza yɛ te hɛɗi. Mba mbeli kategeze ghena te səndəkwəa jikə geva we, katedzembe ghəa kwete wəndə zəzə ta ŋkɛ we, katezhɛne mbeli kanehwene yite we, katezhɛne mbeli kafeɗe kwete we.

¹⁷Vəa ŋkwa shɛ teheka Zhɛrəzalɛm mbeli ‹Kapasla ta Mahwətə.› Pɛtɛa kweci hwelefefi katezhɛre geva laka gheŋkɛ tewəmbəreke sləa ɗa, katetsene mbe kezha begeme le 'ya, katesərə zəzə kwa ndiremia nci hɛ.

¹⁸Ma vəa ŋkwa shɛ ne, katezlaɓe geva ka Zhəwda le ka Israyɛl, katezhɛne geva hɛ zlaɓe shave mbe hɛɗi nya laka bela kwa gwela kadzete hɛɗi nya ndeke nda 'ya ke ka shihɛ nci.»

¹⁹Ma se 'ya kageze mbe ghəa: «Kaɗe 'ya kaveyi ŋa kande ghate hwa ŋwalea ɗa, kandeke ŋa hɛɗi nya shiwə mbeli le, ŋkwa nya ganyɛ ma te hɛɗi pɛtɛ!» Ma zəzə 'ya ne, kateheka ɗa na “Kayita yawe”, mba na katezhɛre ɗa wəmbə we.

²⁰Ama kaka fama ghena ta ɗa se yɛ ka Israyɛl, kala male nya kefama ghena ta za nta, wa'a ke Mahwətə.

²¹Kafefa lewela mbeli pelɛ ghəa yɛ wəmbə: ka Israyɛl ka nehwene ba'a ka mpi dzeve kwa zave nda za hweŋkwa ke hɛ, nahe hɛ kezamte ghə yitea Mahwətə, Shala ta nci.

²²Zhɛne mə geva kase sha 'ya, ŋwale ka fama ghena, kaɗe 'ya kambe ŋayɛ va fama ghena ta ŋayɛ! Ma ke mbelia shɛhɛ: «Wa nyi ghen'yɛ nyi kese sha gha, kwa nza ŋkɛ gha ya kaMahwətə Shala ta n'yɛ.

²³Kaganda ne, nahe n'yɛ keghwetete ghəa n'yɛ le dzeghe melɛ nyi hwa yɛ kələŋə, le mɛ nyi tseha mbeli hwa yɛ ghweme. Kaganda ne, mbe Shala Mahwətə ta n'yɛ nza Israyɛl kakemave mbele.

²⁴Ama se kaŋwale ghen'yɛ, dzeghe nda ke Ba'al nde zehwe berete ta ka shihɛ n'yɛ. Wa nya hawe gɛ! Kəliɓə fəhwe wəshi keseɗa ta nci nyi ɓɛhwɛ ɓɛhwɛ le nyi jama jama, ŋwalea tezhilia nci le ŋwalea kwɛ.

²⁵Nza ɓəmə mbe hawe ta ɓəmə, yɛhwe nza kambeli ɗema zləvə te, kwa nza ŋkɛ, kaka jaɗafa gheɓəmə laka Shala Mahwətə ta ɓəmə. Ma gheɓəmə le shihɛ ɓəmə ne, kese mə kafa ghena nyi gezeke ɓəmə Shala Mahwətə ta ɓəmə se kaŋwale pa ɓeshi nya we.»