Read KapsikiDC Zhɛrɛmi 32 Bible Online

Zhɛrɛmi 32 - KapsikiDC bible

Zhɛrɛmi 32

¹Ma ke Mahwətə sha Zhɛrɛmi te kwa meŋe ta va ta Sɛdɛsiyas kameghea ka Zhəwda. Va shɛ ya kakwa meŋe degheseghəmbe ta va ta Nabəkodonozor te meghe.

²Ma te vəa shɛ ne, nahe ka sewajɛa meghea ka Babilone kehave nda mpa ke Zhɛrəzalɛm. Ma nde mɛ ŋkwa Zhɛrɛmi le ŋa ŋkɛ ne, teŋzle ŋkɛ ki ghɛa ta ka ya ŋkwa nyi ki ghɛa meghea ka Zhəwda.

³Sɛdɛsiyas, meghea ka Zhəwda nde ŋzleyi Zhɛrɛmi ki, va nya ɗema ghena nya zlapete ŋkɛ te sləa Mahwətə ŋkɛ kala nya: «Kateve meleme nya 'ya mbe dzeve ta meghea ka Babilone, katekele meleme nya ŋkɛ.

⁴Katembelenyɛ Sɛdɛsiyas, meghea ka Zhəwda va ka Babilone we, kwa nza ŋkɛ nahe 'ya ketarete kave nda ŋkɛ ke meghea ka Babilone. Gheŋkɛ le ghəa ŋkɛ nde tedzawa kema ta Nabəkodonozor ba'a nde tezhɛne nda ghena.

⁵Katekele Sɛdɛsiyas mbeli kajive Babilone, pelɛagha tenza ŋkɛ pa te və nya kemane ŋkɛ 'ya. Ya gheyɛ dzeghakɛ mpa le ka Babilone ne, katehərəte hɛ yɛ we», wa'a ke Mahwətə.

⁶Ma ke Zhɛrɛmi: Ma ke Mahwətə sha 'ya:

⁷«Katese Hanamɛyɛl, wəzege ta wəza yitenyɛa yiteyɛ ŋa Shaləwm kageze kezha pahwe wəvea ŋkɛ nya mbe Anatot va nya nza na kamenənyɛ. Va gha nza hweŋkwa kezha mbeɗe wəve shɛ.»

⁸Kala nya gezete ɗa Mahwətə ne, hwa'a Hanamɛyɛl, wəzege ta wəza yitenyɛa yiteyɛ ɗa sha 'ya ki ghɛa ka ya ŋkwa, ma ke sha 'ya: «Pahwe wəvea ɗa nya mbe Anatot, te hɛɗia ka Bɛnjamɛn, kwa nza ŋkɛ hweŋkwa ya va gha kezha mbeɗe kaŋa ŋa.» Tagha gɛ, pa 'ya fave kaghena ta Mahwətə nde gezeke ɗa geva.

⁹Pa 'ya pahwe wəve nya mbe Anatot va Hanamɛyɛl, wəzege ta wəza yitenyɛa yiteyɛ ɗa kadəɓərə meŋe mberefaŋeghəmbe.

¹⁰Pa 'ya rafete palepa ta səkəmə bake. Pa 'ya ŋzlete kwete le lamba ta ɗa kwa kema ta ka negha fete nyi hekake 'ya. Pa 'ya dzeghete ɗaŋeɗa ta mze kwa tɛawetɛa te kiləwə.

¹¹Pa 'ya kelete palepa ta səkəmə teŋzle le lamba kala 'yɛwete wəsə mahalegə, tsagha kwete nya keɗema teŋzle,

¹²pa 'ya fəave nda palepa shɛhɛ bake nci ke Barək, wəzege ta Nɛriya ba'a shia Masɛya, kwa kema ta Hanamɛyɛl, wəzege ta wəza yitenyɛa yiteyɛ ɗa, kwa kema ta ka negha fete nyi kedɛkate dzeve te palepa ta səkəmə ba'a kwa kema ta ka Zhəwda nyi tagha pɛtɛ ki ghɛa ka ya ŋkwa.

¹³Ma 'ya sha Barək kwa kema ta mbeli pɛtɛ:

¹⁴«Wa nya ghena nya geze Mahwətə nde berete, Shala ta ka Israyɛl nya: ‹Kelete palepa ta səkəmə nya teŋzle le lamba, tsagha kwete nya keɗema teŋzle, beteyi hɛ kwa dəghwə rekɛ kezha temə hɛ kwele kwele.›

¹⁵Kwa nza ŋkɛ ne, wa nya ghena nya geze Mahwətə nde berete, Shala ta ka Israyɛl nya: ‹Ma te kwete hɛ ne, katezhɛne mbeli kapa yɛ ghɛ, yɛ wəve ba'a yɛ wəvea rɛzɛŋe te hɛɗi nya.›»

¹⁶Ma kwa ndeke nda palepa ta səkəmə 'ya ke Barək, wəzege ta Nɛriya ne, pa 'ya səkwəte Mahwətə kala nya:

¹⁷«Gha Shala Mahwətə, gha nde pate yɛ ghweme le hɛɗi laka wəba ta berete ta ŋa ba'a ɗepe mene wəshia ŋa. Wəsə shɛ kandakɛ ŋa berete we.

¹⁸Kancɛ ganyɛa mehele ŋa na keshi keshi hwa'a te slibə, ama kemenete fete ka yitehɛnyɛa ŋwale ne, kave fete ta nci na kwa ghəa ŋwalea nci. Gha ya kaShala nya wəba ba'a nya berete, Mahwətə nde berete sləa ŋa.

¹⁹Nde zəzə ghena nyi jama jama ba'a nde mene wəshi ganji na. Te dzeghwa ta yayata wəndə ntsə ta ŋa kezha ŋki nda zhɛme kala dzeghwa ta ŋkɛ ba'a kala slene nyi mene ŋkɛ.

²⁰Nahe na kencɛte ghəa ŋa laka wəshi meŋele nyi menete na kwa se ka shihɛ n'yɛ kwa Ɛzhipte. Ma ɓeshi nya ɓiyitsa ne, deke hwa ka Israyɛl ncɛte ghəa ŋa na we, ama hwa mbeli nyi te hɛɗi lema, kala nya newe nya mbeli ɓeshi.

²¹Nahe na kefəakame ka Israyɛl, mbelia ŋa same kwa Ɛzhipte laka wəshi meŋele nyi menete na, laka berete ta ŋa nya wəba ba'a laka kwelea ŋa nya ghazlənə mbeli ve.

²²Nahe na kendeke nda hɛɗi nya meɗeyi nda nya na ke ka shihɛ n'yɛ, hɛɗi nya hwɛ yɛ ŋ'wa le yɛməa mze te.

²³Nahe hɛ kese kakelete kaŋa nci, ama kese hɛ kafa ŋa ghena we, kese kamene slene le wəshi nyi tekete nda na ke hɛ we, hɛreɗɛ hɛ ɗema mene wəshi nyi 'yɛwete na va hɛ kamene. Vatse vate ndiremi nyi na pɛtɛ te hɛ.

²⁴Tsetsenya gɛ, wa nyi ka Babilone katsene hɛɗi dzeme va zlia kezha tekele meleme. Katekelehwe meleme hɛ, mbe dzeve ta nci tenza nde tewəmbəreke mpa, ma ba'a ba. Ghena nya gezete na ne, gheŋkɛ yanewe na.

²⁵‹Pave wəve te cɛdɛ, hekake ka negha fete› pa sha 'ya Shala Mahwətə. Ama te dzeve meleme va ka Babilone.»

²⁶Ma ke ghena ta Mahwətə gezeke nda geva ke Zhɛrɛmi:

²⁷«'Ya Mahwətə ya kaShala ta wəshi nyi nza mpi hwe pɛtɛ. Wəsə shɛ kandakɛ ɗa berete we.

²⁸Vatse gɛ ne, wa nya ghena nya geze 'ya, Mahwətə nya: 'Ya kateve nda meleme nya ke yɛ Nabəkodonozor, meghea ka Babilone le ka sewajɛa ŋkɛ. Katekelehwe meleme nya ŋkɛ.

²⁹Ma ka Babilone nyi keɗa meleme nya ne, katedzembe hɛ. Katendə ghwə hɛ yite, katendəmte ghɛ nyi se mbeli katere nda 'wərdə ke Ba'al ba'a kaɓasle nda tɛ ke kweci shala pelɛ yɛ dɛɓerea nci.

³⁰Kwa nza ŋkɛ wəshi nyi keɗema zeɗehwe ɗa yamene ka Israyɛl ba'a ka Zhəwda se kaŋwalenji. Wənəa ɗa yase ka Israyɛl kabeze ɗa le wəshi nyi mene hɛ.

³¹Nahe meleme nya kehwepete ɗa wənə ba'a kebezemte ɗa wənə se te veci nya ŋslete mbeli pa ɓeshi. Nda 'ya kakelemte kwa kema ta ɗa.

³²Nahe wənəa ɗa kebezenyɛ va wəshi nyi ndiremi nyi menete ka Israyɛl le ka Zhəwda, tsagha va ka meghea nci, mbelia nci nyi te ghə, ka dzeghe Shala ta nci, ka mɛ ŋkwa ta nci, ka Zhəwda ba'a va mbeli nyi mbe Zhɛrəzalɛm.

³³Kenya zhɛre ɗa kema hɛ ne, wəmbə yazhɛre ɗa hɛ. Ndagwara keveci keveci geze nda ghena 'ya ke hɛ ne, ama kese hɛ kafa ba'a kayɛ wəshia shɛhɛ we.

³⁴Nahe hɛ kebeteyi wəshi nyi ndiremi ndiremi kashasha nyi zhɛrete hɛ kashala ki ghɛ nya keveyi ɗa geva tekeleke, tsagha zhɛremte hɛ wale wale.

³⁵Nahe hɛ keŋate nda ŋkwa nyi keveyi geva tekeleke ke Ba'al kwa zlərəa Hinom kezha dzeghe melɛ le ŋwale tezhili ba'a ŋwalea kwɛa nci ke Molɛk. Kegha 'ya ka'yɛwe nyagha wəsə va hɛ we, kegha 'ya kazəzəte kamene wəsə kwa ndiremi nya kala nyagha kezha kese ka Zhəwda kadzembe jaɗafa we.»

³⁶Ama tsetsenya gɛ ne, wa nya ghena nya geze Mahwətə, Shala ta ka Israyɛl te ghəa meleme nya geze nya yɛ mbe dzeve ta meghea ka Babilone laka mpa, ma ba'a ba nya:

³⁷«Katetsene hɛ 'ya mbe hɛɗi nyi tazeyi hɛ 'ya va ghwə ta hwepe wənəa ɗa ba'a va wəba ta beze ta wənəa ɗa. Katefə hɛ 'ya kase teke ba'a kateve nda nza gwezlayɛ 'ya ke hɛ.

³⁸Katezhɛne hɛ kanza kambelia ɗa ba'a katenza 'ya kaShala ta nci.

³⁹Kateve nda yɛ wənə le mehele nya kwetɛŋe 'ya ke hɛ kezha hawe hɛ va 'ya kaghala ghala. Ma tsagha, mbe zeɗe nza tenza hɛ le hwelefefia nci.

⁴⁰Katemene jikə geva nya kaghala ghala 'ya le hɛ. Kazhɛne 'ya kafɛa yitea mene nda ganyɛ ke hɛ we, katemene 'ya yitea hawe hɛ va 'ya, kaɗema zhɛne kanehe le 'ya.

⁴¹Katezlama 'ya yitea mene nda ganyɛ ke hɛ. Mɛa wənəa ɗa ba'a mbe mehele ta ɗa pɛtɛ ne, katemɓe hɛ 'ya gərə gərə te hɛɗi nya.»

⁴²Kwa nza ŋkɛ ne, wa nya ghena nya geze Mahwətə nya: «Kala nya vate ndiremi nya wəba nya 'ya te mbeli nyi ne, tsagha teve nda zeɗe nza nya zəzəte 'ya kave nda ke hɛ 'ya ke hɛ.

⁴³Ma pe yɛ sha geze: ‹Nahe hɛɗi nya kendeke nda geva ke ka Babilone. Tsetsenya ne, kaɓerama ŋkɛ, kaɗema yɛ mbeli le wəshi keseɗa mbe.› Ndagwara te hɛɗi nya ne, katezhɛne mbeli kapa yɛ wəve.

⁴⁴Kaganda ne, katezhɛne mbeli kapa yɛ wəve te hɛɗia Bɛnjamɛn, dzeyi yitea Zhɛrəzalɛm, mbe meleme nyi mbe Zhəwda, nyi te hɛɗi nya pelɛghə, nyi te hɛɗi nya kwake kwake, nyi te hɛɗia Nɛgɛv te cɛdɛ. Katerafe yɛ palepa ta səkəmə mbeli, katedɛdɛke yɛ lamba mbeli te hɛ ba'a kateheheka ka negha fete mbeli. Kwa nza ŋkɛ ne, katezhɛne mbeli nyi te hɛɗi nya 'ya te ŋkwa nci nya vəashi.» Nya ya kaghena nya gezete Mahwətə.