Read KapsikiDC Zhɛrɛmi 35 Bible Online

Zhɛrɛmi 35 - KapsikiDC bible

Zhɛrɛmi 35

¹Ma ke ghena ta Mahwətə kegezeke nda geva ke Zhɛrɛmi, te vəa Zhowakim, wəzege ta Zhoziyas, meghea ka Zhəwda:

²«Kwiɗi sha ka Rɛkab, gezete nda ke hɛ kezha se hɛ kadzembe kwete hwa cɛ nyi ki ghɛ Shala. Mbagha ne, pa na same nda tɛ ke hɛ.»

³Ntəŋə Zhɛrɛmi kalə kazele Yazaniya, wəzege ta kwete Zhɛrɛmi ba'a shia Habasiniya, ka menəhɛnyɛ ba'a ŋwalea Yazaniya, geze ta ŋkɛ, hwelefe ta ka Rɛkab pɛtɛ.

⁴Pa keleghe hɛ kadzembe ghɛa Mahwətə, kadzembe cɛa ŋwale Hanan, wəndəa Shala nya kawəzege ta Igdaliya. Ma cɛa shɛ ne, vare mbeli nyi te ghə ba'a pelɛ ghəa ŋa Masɛya, wəzege Shaləwm nya kande ya ŋkwa kedzembe ghɛa Shala ŋkɛ.

⁵Pa Zhɛrɛmi beteyi yɛ ghwelepe tɛ ba'a yɛ zlerekwe te kema ta ka Rɛkab. Kwa sebe ta ŋkɛ, ma ke sha hɛ: «Sa mə tɛ gɛ!»

⁶Ama ma ke hɛ zhɛnete ɗa: «Kasa tɛ ghen'yɛ we, kwa nza ŋkɛ ma ke shia n'yɛ, Yonadab, wəzege ta Rɛkab sha ghen'yɛ: ‹Sama tɛ yɛ, ya gheyɛ, ya ŋwalea ŋayɛ tɛape ma.

⁷Ŋama ghɛ yɛ ma, wəzama yɛ ma, mɓema rɛzɛŋe yɛ ma, wəsə shɛ katenza va gheyɛ we. Ama mbe cɛ lekwesa tenza yɛ kala nza hɛa ŋayɛ teghweme. Ma tsagha, kwele kwele tetemə yɛ te hɛɗi nya nza nya yɛ kaka se se.›

⁸Nahe ghen'yɛ kehawete nda hawe ke wəshi nyi gezete n'yɛ shia n'yɛ Yonadab. Kasa tɛ ghen'yɛ tɛape, ya mia n'yɛ, ya ŋwale tezhilia n'yɛ, ya ŋwalea kwɛa n'yɛ we.

⁹Kaŋa ghɛ ghen'yɛ kanza ki we, kanza rɛzɛŋe ya wəve kewəza va ghen'yɛ we.

¹⁰Ama mbe cɛ lekwesa nza ghen'yɛ. Ma tsagha, hawe yahawe n'yɛ va ghena nyi gezave n'yɛ Yonadab, shia n'yɛ pɛtɛ.

¹¹Ama vəa ŋkwa nya have nda mpa Nabəkodonozor, meghea ka Babilone ke hɛɗi nya ne, pa ghen'yɛ tarete kadzembe Zhɛrəzalɛm kezha mbele va ka sewajɛa ka Babilone ba'a ŋa ka Siri. Ma vəa ŋkwa shɛ, ntishɛ ghen'yɛ mbe Zhɛrəzalɛm.»

¹²Ma ke Mahwətə sha Zhɛrɛmi:

¹³«Geze nda ghena ke ka Zhəwda ba'a ke mbeli nyi mbe Zhɛrəzalɛm tsetsenya, ma pa na sha hɛ: Wa nya ghena nya geze Mahwətə nde berete, Shala ta ka Israyɛl nya: kateyɛ 'yɛ ta ɗa ba'a ghena nyi geze 'ya yɛ tse gɛ na?

¹⁴Nahe Yonadab, wəzege ta Rɛkab kegezave nda ke ŋwalea ŋkɛ kezha ɗema kasa tɛ. Pa ka Rɛkab yate ghena shɛhɛ megela: kese hɛ kasa tɛ pa ɓeshi va nya hawete nda hawe hɛ ke ghena ta shia hɛ we. Ama 'ya ne, nahe 'ya kese kageze ŋayɛ ghena kevə kevə kaɗema yɛ kese kafa ɗa ŋa ɗa.

¹⁵Keveci keveci se 'ya kaghwene ŋayɛ ka mene slene ta ɗa nyi kaka mɛ ŋkwa. Tagha taghanyɛ ne, ma ke hɛ sha gheyɛ: ‹Sərəakɛ dzeghwa kwa ndiremia ŋkɛ yayata wəndə. Mene mə wəsə nya kehi. Zelema kweci shala yɛ kezha hawe va hɛ ma. Ma tsagha, wərə yɛ kanza te hɛɗi nya ndeke ŋayɛ 'ya, gheyɛ le ka shihɛ ŋayɛ.› Ama kese yɛ kave sleme yite we, kese yɛ kafa ɗa ŋa ɗa we.

¹⁶Ma ka Rɛkab le ŋa nci ne, nahe hɛ kezelete ghena nyi gezave nda shia nci Yonadab ke hɛ. Ama gheyɛ ka Zhəwda ne, kese yɛ kafa ɗa ŋa ɗa we.»

¹⁷Vatse gɛ ne, wa nya ghena nya geze Mahwətə nde berete, Shala ta ka Israyɛl nya: «'Ya kateve ndiremi nyi gezete 'ya te ka Zhəwda ba'a te mbeli nyi mbe Zhɛrəzalɛm va nya gezete nda ghena 'ya ke hɛ kaɗema hɛ kese kafa ɗa ŋa ɗa, nya se 'ya kaheka kaɗema hɛ kese kazhɛne ɗa.»

¹⁸Kwa sebe ta ŋkɛ, ma ke Zhɛrɛmi sha hwelefe ta Rɛkab: «Wa nya ghena nya geze Mahwətə nde berete, Shala ta ka Israyɛl nya: Ma kwa hawete nda hawe yɛ ke ghena nyi gezave ŋayɛ shia ŋayɛ Yonadab, kwa yate ghena nyi gezeke ŋkɛ yɛ pɛtɛ ba'a kwa menete slene yɛ le wəsə nya gezave ŋayɛ ŋkɛ ne,

¹⁹wa nya ghena nya geze Mahwətə nde berete, Shala ta ka Israyɛl nya gɛ: Kaghala ghala teslete hwelefe ta Yonadab, wəzege ta Rɛkab kwa kema ta ɗa.»