Read KapsikiDC Zhɛrɛmi 36 Bible Online

Zhɛrɛmi 36 - KapsikiDC bible

Zhɛrɛmi 36

¹Ma te kwa wəfaɗe ta va ta Zhowakim, wəzege ta Zhoziyas, meghea ka Zhəwda te meghe ne, ma ke ghena ta Mahwətə gezeke nda geva ke Zhɛrɛmi:

²«Kelete palepa kwa peɗe peɗe shɛ na rafate ghena nyi gezete ŋa 'ya te ghəa Israyɛl, te ghəa Zhəwda ba'a te ghəa kweci hwelefefi, ghala ghate 'ya kegeze ŋa ghena mbe vəa Zhoziyas hwa'a te veci nya.

³Nda kwete katefave ndiremi nyi zəzə 'ya kaghwene nda ke hɛ ka Zhəwda. Ma tsagha, katewəfə dzeghwa kwa ndiremia ŋkɛ yayata wəndə ba'a katekelemte fete ta nci ba'a jaɗafa ta nci 'ya te wənə.»

⁴Daŋe Zhɛrɛmi sha Barək, wəzege ta Nɛriya. Pɛtɛ gezete ghena nyi kemave ŋkɛ va Mahwətə, pa Barək rafeyi hɛ te palepa kwa peɗe peɗe.

⁵Kwa sebe ta ŋkɛ, ma ke Zhɛrɛmi gezete nda ke Barək: «Nahe mbeli kedzembe ghɛa Mahwətə, kadzeki ɗa 'ya we.

⁶Ama gha ne, dzeki te vecia səwəmayɛ shɛ na jaŋgate ghena nyi gezete ŋa nyi 'ya le berete te kema ta mbeli. Jaŋgate nda hɛ ke mbeli nyi kese mbe meleme nyi mbe Zhəwda kadzembe ghɛa Mahwətə.

⁷Nda kwete katefa səkwə ta nci Mahwətə ba'a nda kwete katesərə dzeghwa kwa ndiremia ŋkɛ yayata wəndə, kwa nza ŋkɛ dzawe hwepenyɛ ba'a bezenyɛ wənəa Mahwətə va mbelia shɛhɛ.»

⁸Pa Barək tseramete ghena nyi gezete nda nde mɛ ŋkwa Zhɛrɛmi. Pa ŋkɛ dzembe ghɛa Mahwətə ba'a jaŋgate ghena ta Mahwətə nyi kerafete geva mbe palepa kwa peɗe peɗe le berete.

⁹Ma mbe kwa mcɛfe ta va ta Zhowakim, wəzege ta Zhoziyas, meghea ka Zhəwda te meghe, te kwa mesli ta tere, pa mbeli hekake ka Zhɛrəzalɛm pɛtɛ ba'a pɛtɛa mbeli nyi kese mbe yɛ meleme ta Zhəwda kadzembe Zhɛrəzalɛm yitea mene səwəmayɛ kwa kema ta Mahwətə.

¹⁰Pa Barək jaŋgate ghena ta Zhɛrɛmi nyi mbe palepa le berete mbe ghɛa Mahwətə, mbe cɛa Gemariya, wəzege ta Shafan, nde rafe wəshi. Mɛa ŋwela nya wəba ta ghɛa Mahwətə, terasle yitea mɛ degha mɛnɛfɛ cɛa shɛ.

¹¹Pa Mika, wəzege ta Gemariya, shia Shafan fate ghena ta Mahwətə pɛtɛ kala nyi rafete geva mbe palepa kwa peɗe peɗe.

¹²Cape ŋkɛ kadzawa ghɛa meghe, shilimə ŋkɛ mbe cɛa nde rafe wəshi. Pɛtɛ mbeli nyi te ghə mbe tsene tagha: nde rafe wəshi Ɛlishama, Delaya, wəzege ta Shemaya, Ɛlnatan, wəzege ta Akbor, Gemariya, wəzege ta Shafan, Sidekiya, wəzege ta Hananiya ba'a kweci mbeli nyi te ghə.

¹³Pa Mika ɓelate nda ghena nyi fate ŋkɛ pɛtɛ, vəa ŋkwa nya jaŋga nda ghena nyi te palepa kwa peɗe peɗe Barək, wəzege ta Nɛriya le berete ke mbeli ke hɛ.

¹⁴Tagha, pa mbeli nyi te ghə pɛtɛ ghweneghe Yehəwdi, wəzege ta Netaniya, wəzege ta Shɛlɛmiya, wəzege ta Kəwshi sha Barək kageze nda kezha kele palepa kwa peɗe peɗe nya jaŋgate nda nya ŋkɛ ke mbeli kase. Pa Barək kelete palepa kwa peɗe peɗea shɛ kase sha hɛ.

¹⁵Ma ke hɛ shɛ: «Ntishɛ ŋa shɛ na jaŋgate n'yɛ palepa kwa peɗe peɗe nya.» Pa Barək jaŋgate nda ke hɛ.

¹⁶Ma kwa fate ghena shɛhɛ hɛ pɛtɛ ne, ntake hɛ kanenewe ghəa nci le ghazlənə le ghazlənə, ma ke hɛ sha Barək: «Kanza n'yɛ ghen'yɛ keɓela nda ghena nyi pɛtɛ ke meghe we.»

¹⁷Kwa sebe ta ŋkɛ, ma ke hɛ 'yɛwete va Barək: «Geze n'yɛ tsema tsema rafete ghena nyi na pɛtɛ.»

¹⁸Ma ke Barək zhɛnete nda ke hɛ: «Zhɛrɛmi le ghəa ŋkɛ nde ɓelate ɗa ghena nyi, nda rafate hɛ 'ya te palepa nya le yirə.»

¹⁹Ma ke mbelia jama sha Barək: «Kwiɗi wəfərə ŋa, tsagha Zhɛrɛmi, yagha wəndə kaɗepe ŋkwa nya nza yɛ te.»

²⁰Kwa sebe ta nya veyi palepa kwa peɗe peɗea shɛ hɛ mbe cɛ kemene slene ta Ɛlishama, nde rafe wəshi, shilimə hɛ ki ghɛa meghe, pɛtɛ hɛ ɓelate nda wəshi nyi kemenete geva.

²¹Taghanyɛ, pa meghe ghwenakɛ Yehəwdi kakele palepa kwa peɗe peɗea shɛ mbe cɛ kemene slene ta Ɛlishama. Pa jaŋgate nda ke yɛ meghe le mbelia jama nyi tagha yite.

²²Ma kwa ŋkwa nza ŋkɛ hefeghwe ŋkwa ne, mentishɛ meghe mbe dabala nya ki ghɛ ki ghɛ yitea ghwə ta wəvene te kələ.

²³Ma kala nya kiɗimte jaŋga bela maheke keɗema wəfaɗe Yehəwdi ne, kaslesla hɛ meghe le hwa kabete mɛa ghwə. Tsagha menete ŋkɛ pa te kiɗi ta palepa kwa peɗe peɗea shɛ mɛa ghwə.

²⁴Pa yɛ meghe le mbelia jama ta ŋkɛ kefate ghena shɛhɛ megela. Ama kese ghazlənə kazhɛ ke hɛ we, kese mehele ta nci kataze we.

²⁵Ndagwara nahe yɛ Ɛlnatan, Delaya le Gemariya kese kantsə geva kafɛa meghe yitea tere palepa kwa peɗe peɗea shɛ, ama kese kafa ŋa nci we.

²⁶Ɓiyitsa ne, pa ŋkɛ ndeke nda hweŋkwa ke yɛ Yeramɛyɛl, wəzege ta ŋkɛ, Seraya, wəzege ta Azriyɛl le Shɛlɛmiya, wəzege ta Abdɛyɛl kezha kese yɛ nde rafe wəshi Barək le nde mɛ ŋkwa Zhɛrɛmi. Ama pa Mahwətə wəfərəakɛ hɛ.

²⁷Ma kwa sebe ta nya teremte palepa kwa peɗe peɗe nya nza nya yɛ ghena ta Zhɛrɛmi nyi rafete Barək mbe meghe ne, ma ke ghena ta Mahwətə gezeke nda geva ke Zhɛrɛmi:

²⁸«Kelete kwete palepa kwa peɗe peɗe shɛ na rafate ghena nyi kese mbe kwa peɗe peɗe kwa ghate nya teremte Zhowakim, meghea ka Zhəwda te ɓiyitsa.

²⁹Kwa sebe ta ŋkɛ, ma pa na te ghəa Zhowakim, meghea ka Zhəwda: ‹Wa nya ghena nya geze Mahwətə nya: Nahe Zhɛrɛmi kerafete katese meghea ka Babilone kataze hɛɗi ba'a kaza sebe te yɛ mbeli le wəshi keseɗa. Ama nahe Zhowakim keŋelete ŋkɛ ba'a keteremte palepa kwa peɗe peɗea shɛ.

³⁰Vatse gɛ ne, wa nya ghena nya geze Mahwətə te ghəa Zhowakim, meghea ka Zhəwda nya: Wəndə shɛ mbe hwelefe ta ŋkɛ katenza pelɛ pasla ta David we. Mba tenza wəndə kemte mtea ŋkɛ te ghyana ta veci ba'a te ntasle viɗi.

³¹Kateve ɗa 'ya te, te hwelefe ta ŋkɛ ba'a te ka mene slene ta ŋkɛ. Kateme 'ya kənəa hɛ va fete ta nci. Katefə ndiremi nyi gezete nda nyi 'ya ke hɛ kaɗema hɛ kese kaɓela 'ya ka kadzete mbeli nyi mbe Zhɛrəzalɛm ba'a ka Zhəwda.›»

³²Pa Zhɛrɛmi kelete kwete palepa kwa peɗe peɗe kandeke nda ke nde rafe wəshi Barək, wəzege ta Nɛriya. Pa wəndə nyagha rafete ghena nyi gezete nda Zhɛrɛmi: pɛtɛa ghena nyi kese mbe palepa nya teremte Zhowakim, meghea ka Zhəwda. Kwele kwele kweci ghena nyi kala nyighɛ nyi kemtsehame geva mbe.