Read KapsikiDC Zhɛrɛmi 38 Bible Online

Zhɛrɛmi 38 - KapsikiDC bible

Zhɛrɛmi 38

¹Pa yɛ Shefatiya, wəzege ta Matan, Gedaliya, wəzege ta Pashehəwr, Yəwkal, wəzege ta Shɛlɛmiya le Pashehəwr, wəzege ta Malkiya fate ghena nyi gezete nda Zhɛrɛmi ke mbeli pɛtɛ. Ma ke sha hɛ:

²«Wa nya ghena nya geze Mahwətə nya: ‹Ma wəndə nya ketenza mbe meleme nya ne, katemte ŋkɛ va kafayɛ, va ma keɗema va ba. Ama wəndə nya ketelənyɛ sha ka Babilone ne, pələsə tenza mpia ŋkɛ.›

³Wa nya ghena nya geze Mahwətə nya ɓiyitsa: ‹Kaganda teve geva meleme nya mbe dzeve ta ka sewajɛa meghea ka Babilone, katekelehwe ŋkɛ hɛ.›»

⁴Ma ke mbeli nyi te ghə sha meghe Sɛdɛsiyas: «Peslekɛ wəndə nya mbeli, kwa nza ŋkɛ geva ta ka sewajɛ ba'a ŋa pɛtɛa mbeli nyi mbe meleme yampə ŋkɛ le ghena nyi geze ŋkɛ. Zeɗe nza ta mbeli yazele wəndə nya we, ama ndiremia nci.»

⁵Ma ke meghe Sɛdɛsiyas zhɛnete nda ke hɛ: «Yewə, va gheyɛ ŋkɛ, berete shɛ va 'ya kezha fɛa ŋayɛ we.»

⁶Tagha gɛ, laŋe hɛ te Zhɛrɛmi, fɛke hɛ shɛ kwa belagejia Malkiya, wəzege ta meghe, nya ki ghɛa ka ya ŋkwa. Le zewe keleghe Zhɛrɛmi hɛ kadzawa. Yɛmə kwa belagejia shɛ we, ama deke nzaɓe ya kwa, tɛapa'a ŋkɛ Zhɛrɛmi dzetenyɛ te nzaɓe.

⁷Pa kwete nde Ɛtiyopi nya nza sləa ŋkɛ kaƐbɛd-Mɛlɛk, nde slene nya wəba ki ghɛa meghe fate nahe mbeli kenegheyi Zhɛrɛmi kwa belageji. Pelɛ meghe mentishɛ mɛa mɛ degha ta Bɛnjamɛn.

⁸Cape Ɛbɛd-Mɛlɛk shave ki ghɛa meghe, ma ke sha meghe:

⁹«Meghe yawe, wəsə kwa ndiremi yamenete mbeli nyi kwa menete nda hɛ kala nya ke nde mɛ ŋkwa Zhɛrɛmi. Kwa belageji negheyi ŋkɛ hɛ. Mtiwə temte ŋkɛ kwa va ma, va nya ɗema ɗafa shɛ mbe meleme.»

¹⁰Ma ke meghe gezave nda ghena ke Ɛbɛd-Mɛlɛk, nde Ɛtiyopi: «Hekakɛ mbeli mahekenemsə yitea gha shɛ yɛ kelakame nde mɛ ŋkwa Zhɛrɛmi kwa belagejia shɛ yagha ŋkɛ kamte.»

¹¹Ntəŋə yɛ Ɛbɛd-Mɛlɛk le mbeli nyi mahekenemsə nyi, shilimə ŋkɛ mbe cɛ kebete wəshi nya ki ghɛa meghe, kəliɓə ŋkɛ te yɛ meha lekwesa, pa haghe nda hɛ kadzawa belageji ke Zhɛrɛmi le zewe.

¹²Ma ke Ɛbɛd-Mɛlɛk nya kande Ɛtiyopi sha Zhɛrɛmi: «Fəyi meha lekwesa nyighɛ mbe yɛ hweɓezle ta ŋa shɛ na hwepeyi zewe kənə.» Pa Zhɛrɛmi menete tsagha.

¹³Pa hɛ ntsehakame Zhɛrɛmi same kwa belageji le zewe. Kwa sebe ta ŋkɛ, ntishɛ Zhɛrɛmi ki ghɛa ka ya ŋkwa.

¹⁴Pa meghe Sɛdɛsiyas ghwenakɛ wəndə sha nde mɛ ŋkwa Zhɛrɛmi kezha hekakɛ nda ŋkɛ mbeli mɛa kwa mahekene ta ŋkwa kedzeki ta ghɛa Mahwətə. Ma ke meghe sha Zhɛrɛmi: «'Ya kate'yɛwe wəsə kwetɛŋe va gha, wəfərəma na va 'ya ma.»

¹⁵Ma ke Zhɛrɛmi zhɛnete nda ke Sɛdɛsiyas: «Ma kegezete ŋa kaganda 'ya ne, katepesle ɗa na. Ma kencɛte ŋa ntsehwele 'ya ne, katezele na we.»

¹⁶Ama ma ke Sɛdɛsiyas zemete nda fela tewəfərə ke Zhɛrɛmi: «Le Mahwətə nya kepate ɓə ne, kapesle ŋa 'ya tɛape ba'a kave nda ŋa 'ya ke mbeli nyi keɗe mte ta ŋa we.»

¹⁷Tagha gɛ, ma ke Zhɛrɛmi sha Sɛdɛsiyas: «Wa nya ghena nya geze Shala Mahwətə nde berete ba'a Shala ta ka Israyɛl nya: ‹Ma kelə ŋa na sha mbelia jama ta meghea ka Babilone ne, pələsə tenza mpia ŋa, tsagha ŋa mbelia ŋa. Katendəmte geva meleme nya we.

¹⁸Ama keɗema na kalə sha mbelia jama ta ka Babilone ne, kateve geva meleme nya mbe dzeve ta ka Babilone nyi ketendə ŋkɛ. Ma gha perə ne, katembele ŋa na va hɛ we.›»

¹⁹Ma ke meghe Sɛdɛsiyas sha Zhɛrɛmi: «Ka Zhəwda nyi kelənji sha ka Babilone yaghazlənə ɗa 'ya ve. Wərə kamenete geva kavame geva 'ya mbe dzeve ta nci kezha sahwe ɗa yaka hɛ.»

²⁰Ama ma ke Zhɛrɛmi zhɛnete nda: «Ewə, kateve nda ŋa mbeli ke hɛ we. Fate ghena ta Mahwətə nya geze ŋa 'ya, wəsə shɛ katemene ŋa geva we, teghweme tenza na.

²¹Ama keɗema na lə sha hɛ ne, wa nya wəsə nya ncɛte ɗa Mahwətə nya:

²²Pɛtɛa mi nyi ketene ki ghɛa meghea ka Zhəwda ne, katefə nda hɛ mbeli ke mbelia jama ta ka meghea ka Babilone. Ma tegha ŋa hɛ kwa cimə: ‹Nahe ka mcɛhɛ ka sla pela ta ŋa keghwetete ŋa. Ma kwa ndahwe ŋa nzaɓe ne, pɛtɛ hɛ wəfəyite ŋa.›

²³Pɛtɛ tefəave nda geva yɛ mi le ŋwalea ŋa ke ka Babilone. Gha perə ne, katembele ŋa na va hɛ we. Katekese ŋa meghea ka Babilone ba'a katendəmte meleme nya ŋkɛ le ghwə.»

²⁴Ma ke Sɛdɛsiyas sha Zhɛrɛmi: «Ma keɗe na kanza teghweme ne, yagha kwete wəndə kafate ghena nyi gezehwe nyi mə.

²⁵Ghəpə yite kaɗema mbelia jama katefate nahe 'ya kegezete ŋa ghena we. Katese hɛ ka'yɛwe ghena nyi gezete mə va gha. Katemeɗe ŋa nza hɛ teghweme keɗema na kewəfərəakɛ kwete wəsə va hɛ.

²⁶Ama tezhɛne nda na ke hɛ: ‹'Ya se kampi nda dzeve ke meghe kezha ɗema ŋkɛ kazhɛne kadzeki ki ghɛa Yonatan, yagha 'ya kamte ki.›»

²⁷Pɛkwe mbelia jama pɛtɛ sha Zhɛrɛmi kezha 'yɛwe ghena ve. Pa zhɛnete nda ke hɛ tserame kala nya gezave nda meghe. Seɗakwe seɗakwe hɛ slənji yite, va nya nza ŋkɛ, wəndə shɛ kefate ghena nyi gezehwe hɛ we.

²⁸Mba Zhɛrɛmi ki ghɛa ka ya ŋkwa pa te və nya kelehwe Zhɛrəzalɛm mbeli.