Read KapsikiDC Zhɛrɛmi 39 Bible Online

Zhɛrɛmi 39 - KapsikiDC bible

Zhɛrɛmi 39

¹Ma mbe kwa mesli ta va ta Sɛdɛsiyas, meghea ka Zhəwda te meghe, te kwa meŋe ta tere ne, pa yɛ Nabəkodonozor, meghea ka Babilone le pɛtɛa ka sewajɛa ŋkɛ senji kezha ha nda mpa ke Zhɛrəzalɛm.

²Ma te kwa meŋe kwetɛŋeghəmbe ta va ta Sɛdɛsiyas, le hɛ mesli te tere kwa wəfaɗe ne, mpahwe ka Babilone ntsate wəfela te zli nya yitea meleme.

³Tagha gɛ, shishilimə mbelia jama ta meghea ka Babilone mbe meleme kanzanji mɛa mɛ degha nya te tepe. Yɛ Nɛrgal-Sarɛsɛr, wəndə nya te ghəa ka sewajɛ, Samgar-Nebo, Sar-Sekim, wəndə nya gezleŋema ghə meghe ve, kwete Nɛrgal-Sarɛsɛr, wəndə nya te ghəa ka mene ghwɛ le kweci mbelia jama ta meghea ka Babilone ya tagha.

⁴Nakɛma ta yɛ Sɛdɛsiyas, meghea ka Zhəwda le ka sewajɛa ŋkɛ pɛtɛ ke hɛ ne, kweracɛ hɛ hwɛnji shave mbe meleme heviɗi kadzawa laka ntsa ta meghe nya dekwe yitea mɛ degha nya kwelɛ zli. Ntəŋə hɛ dzawa kwa hweŋkwa nya kedzawa zlərəa Zhəwrdɛŋe.

⁵Ama tereŋe ka sewajɛa ka Babilone kwa sebe ta nci, pa kekave Sɛdɛsiyas kwagha te ŋwela ta Zhɛriko. Pa hɛ keseve kakeleghe nda kadzeme ke Nabəkodonozor, meghea ka Babilone pelɛ Ribla, te hɛɗia Hamat. Tagha mehate ghwə Nabəkodonozor te Sɛdɛsiyas.

⁶Pa meghea ka Babilone sleslamte ghə te ŋwalea Sɛdɛsiyas kwa ntsə ta yiteyɛa nci mbe Ribla, tsagha te mbelia jama ta ka Zhəwda.

⁷Kwa sebe ta ŋkɛ, pɛtɛ ntsamte ntsə kwa Sɛdɛsiyas, pa hwepete ŋkɛ le zewe lɛ nyi le mze kwa ghwə ghwə bake kezha kele kajive Babilone.

⁸Ma mbe Zhɛrəzalɛm ne, pa ka Babilone ndəmte ghɛa meghe ba'a ghɛa mbeli ganji. Pa hɛ mpəmte zli yitea meleme.

⁹Kəliɓə Nebəwzaradan, wəndə nya te ghəa ka ya meghe fəghe mbeli nyi ketene mbe meleme kajive Babilone, tsagha mbeli nyi kendeke nda ghəa nci ba'a mbeli nyi keɗepe mene wəshi.

¹⁰Ama pa sərəakɛ kwete bela ta ka titikwəa kɛfi, mbeli nyi ɗema wəshi va hɛ mbe Zhəwda, pa nehave nda yɛ wəve ba'a yɛ wəvea rɛzɛŋe ke hɛ.

¹¹Wa nya ghena nya gezave nda Nabəkodonozor, meghea ka Babilone ke Nebəwzaradan, wəndə te ghəa ka ya meghe te ghəa Zhɛrɛmi nya:

¹²«Kelete ŋkɛ, newe ghweme te, mba na kemene nda wəsə kwa ndiremi, ama menete nda wəshi nyi 'yɛwakɛ ŋkɛ.»

¹³Pa Nebəwzaradan, wəndə te ghəa ka ya meghe tsahwe ghena le yɛ Nebəwshazdan, wəndə nya te ghəa mbelia jama, Nɛrgal-Sarɛsɛr, wəndə nya te ghəa ka mene ghwɛ le kweci mbelia jama ta ka sewajɛa meghea ka Babilone.

¹⁴Pa hɛ ghweneghe mbeli kaheka Zhɛrɛmi ki ghɛa ka ya ŋkwa kezha ve nda ke Gedaliya, wəzege ta Ahikam ba'a shia Shafan, nya ketepele nda hweŋkwa kalə sha ghɛa ŋkɛ. Tsetse nda se Zhɛrɛmi kanza hwa mbeli.

¹⁵Ma ke ghena ta Mahwətə gezeke nda geva ke Zhɛrɛmi vəa ŋkwa nya nza ŋkɛ mba kwa daŋgayɛ ki ghɛa ka ya ŋkwa:

¹⁶«Kwiɗi shɛ na gezete nda ke Ɛbɛd-Mɛlɛk nya kande Ɛtiyopi: ‹Wa nya ghena nya geze Mahwətə nde berete, Shala ta ka Israyɛl nya: Nahe 'ya kezlapete nda ndiremi ke mbeli nyi mbe meleme nya, ama zeɗe nza we. Vatse gɛ ne, 'ya katemene wəsə nya gezete 'ya, katenakɛ na le ntsə ta ŋa.

¹⁷Ama te veci nya tese ndiremia shɛ ne, katembele ŋa 'ya va mbeli nyi ghazlənə nyi na va hɛ, wa'a ke Mahwətə.

¹⁸Kaganda tembele ŋa 'ya, katemte na va kafayɛ we. Katembele mpia ŋa na, kwa nza ŋkɛ nahe na kendeke ɗa ghəa ŋa. Nya ya kaghena nya gezete Mahwətə.›»