Read KapsikiDC Zhɛrɛmi 4 Bible Online

Zhɛrɛmi 4 - KapsikiDC bible

Zhɛrɛmi 4

¹Ma ke Mahwətə: «Ma kenza na kazhɛne geva Israyɛl, sha 'ya se na. Ma kefəmte kəsəa ŋa nyi kwa kema ta ɗa na, mba na katendeŋe zhɛkwa we.

²Ma kezemete fela na: Le Mahwətə, le kaganda, le tiɗiɗi, le hweŋkwa ta ŋkɛ ne, kewəpi wəpi katenza kweci hwelefefi te sləa ŋkɛ, gwəfə tenza ghəa nci te.»

³Ma ke Mahwətə sha ka Zhəwda le ka Zhɛrəzalɛm: «Tsəhwə mə wəve mɛnɛfɛ, mba yɛ ketsawe wəshi hwa tigə.

⁴Nza mə kaka sla sla mɓɛta, ndeke ɗa mə ghəa ŋayɛ, 'ya Mahwətə gheyɛ ka Zhəwda le ka Zhɛrəzalɛm! Ma kemenetema yɛ tsagha ne, kala ghwə tetse hwepe ta wənəa ɗa, kaɗema kwete wəndə kapeslekɛ ŋkɛ, va wəsə kwa ndiremi nya menete yɛ.»

⁵Zlapete mə mbe Zhəwda, pesleyi mə ghena shɛ dzeyi mbe Zhɛrəzalɛm, vɛ mə tereme te hɛɗi, tsa mə lewela le berete. Ma pe yɛ: «Tsenete mə geva kezha dzembe meleme nyi nza zli yite.»

⁶Mɓeyi mə drape pelɛ Siyon, hwɛ ŋayɛ mə kalə kawəfərə, mba yɛ keghereŋe kwa hweŋkwa, kwa nza ŋkɛ shave mbe bela kwa gwela tekele ndiremi 'ya, ndiremi nya wəba.

⁷Nahe nivɛrə keshave mbe gamba ta ŋkɛ, nahe nde za sebe te kweci hwelefefi kedzawa hweŋkwa, Nahe ŋkɛ kesate te ghweɓea ŋkɛ kezha za sebe te hɛɗia ŋayɛ. Kakwəfi tenza yɛ meleme ta ŋayɛ, kaɗema mbeli katenza mbe.

⁸Vatse gɛ, hwepahwe mə wəsə hwa hwə, nehwene mə ba'a ŋələvə mə, kwa nza ŋkɛ kezhɛremte ghwə ta hwepe wənəa ŋkɛ Mahwətə te gheɓəmə we.

⁹Ma ke Mahwətə: «Te və nya temene geva ŋkɛ ne, kemte mte tenza geva ta yɛ meghe le mbelia jama. Ketaze taze tenza mehele ta ka dzeghe Shala, benake tenza ka mɛ ŋkwa va ghazlənə.»

¹⁰Ma tegeze hɛ: «Aya! Shala Mahwətə, kaganda ghwetete mbeli nyi na le Zhɛrəzalɛm, va nya gezete na katenza kwelɛŋe shɛ ndagwara hwa ya yitea ŋwələ va ghen'yɛ.»

¹¹Ma te vəa shɛ, kategeze nda mbeli ke mbelia shɛhɛ le Zhɛrəzalɛm: «Wa nya sefə nya keghwele ŋkwa sawa pelɛ yɛ wəmbə kavɛ sheke kwamte te ɓerama kadzeghəa mbelia ɗa. Sefə nya ɓɛhwɛ nya nza mbeli kamehekɛ ha yite ŋkɛ we.

¹²Sefə kwa berete nde sheke kala nya gezete 'ya. Ma tsetsenya gɛ, 'ya katemeha ghwə te hɛ.»

¹³«Wa nya nde jaga nya kase kala ləmbəa ghapeha, kala masefafele hwɛ yɛ wəmata gədəwəa ŋkɛ, hwɛ ma yɛ gədəwəa ŋkɛ ke yɛ zele. Awema! Rayɛ sebe te ghen'yɛ!»

¹⁴«Zhɛrəzalɛm, yaɓemte wənəa ŋa va 'yaghwa mehele, keɗe na kambele. Hweŋkwa teshave zəzə nyi ndiremi nyi mbe gha wa?

¹⁵Se te hɛɗi Dan, wa nya ghena kezlapeke geva. Sawa pelɛ ghweme ta Ɛfrayim, ndiremi yazlape mbeli.

¹⁶Gezave nda mə ke mbeli pɛtɛ, tsave nda mə lewela ke Zhɛrəzalɛm: wa nyi ka ghema nyi kase te hɛɗi nya cakeɗa, yɛ meleme ta Zhəwda yatsa kaka hɛ yite.

¹⁷Kala ka ya wəve nyi kedzaslete wəve dzaslete Zhɛrəzalɛm hɛ. ‹Fama ghena ta ŋkɛ va 'ya nde ndave nda, wa'a ke Mahwətə.›

¹⁸Yɛ dzeghwa ta ŋa le wəshi nyi mene na ka ndave ŋa ndiremi nya: kaganda nza ŋkɛ 'yaghwake, mɛa wənə ndəkwə ŋa ŋkɛ.»

¹⁹Aya hwəa ɗa ya! Aya hwəa ɗa ya! Bərəɓə yabərəɓə 'ya va zhɛ ta ŋkɛ! Mbasa kendaɗenyɛ wənəa ɗa, kewəba mpa geva ta ɗa, kashɛ 'ya nza divə we: kwa nza ŋkɛ nahe 'ya kefate vɛ ta veke ba'a kaka ta mpa.

²⁰Nda ɗa yazlape mbeli kadzeyite kadzeyite, pɛtɛ hɛɗi ketazemte geva. Tewə ketemə kwefaŋemte geva yɛ cɛ lekwesa ta n'yɛ, kala metɛ ta ntsə fəhwe yɛ ghɛa n'yɛ mbeli.

²¹Hwa'a te nyama və tenehe 'ya le newe drapea mpa wa? Hwa'a te nyama və tefɛa 'ya kefa vɛ ta vekea mpa wa?

²²Ma ke Shala: «Kaka gezhia kɛfi mbelia ɗa, keɗepe ɗa hɛ we. Ŋwale ka dewə mehele hɛ, wəsə shɛ kafa hɛ we. Wɛre wɛre hɛ yitea mene wəsə kwa ndiremi. Ama mene wəsə ganyɛ ne, keɗepe hɛ we.»

²³Newe 'ya sha ŋkwa nya te hɛɗi: kaɓerama ŋkɛ shalala. Bətə zanyɛ waŋe nya pelɛ ghweme.

²⁴Newe 'ya sha yɛ ghweme: kagaŋkəɗə hɛ, nahe yɛ wəmbə kedasenji.

²⁵Newe 'ya: mba mbeli shɛ we, ya yɛ 'yɛ kehwɛnji pɛtɛ.

²⁶Newe 'ya: kaɓerama hɛɗi nya se wəshi kamene te, pɛtɛ meleme ta ŋkɛ kezhɛrenji kakwəfi kwa kema ta Mahwətə ba'a va ghwə ta hwepe wənəa ŋkɛ.

²⁷Wa nya ghena nya geze Mahwətə nya: «Pɛtɛ tezhɛre hɛɗi kaɓerama, ama kateza sebe 'ya te pɛtɛ we.

²⁸Vatse nza nehwene te hɛɗi ba'a ŋkwesle pelɛ ghweme. Nahe 'ya kegezete wəsə nya tarete 'ya, kazhɛremte zəzə ta ɗa 'ya we, kazhɛne geva 'ya te sebe we.»

²⁹Ma kwa gaka yɛ wəmata gədəwə le ka he have ne, kweracɛ mbeli nyi mbe yayata meleme hwɛnji. Kahwɛ mbeli kadzehwa gamba, kadzeme yɛ ghweme. Pɛtɛ mbeli wəfəyite yɛ meleme, kaɗema wəndə mbe.

³⁰Ama gha gɛ Zhɛrəzalɛm, wa yatemene na wa? Lekwesa kwa gheme ya kənəa gha, yɛ livəa mze kwa tere tere yapesakɛ geva na le hɛ, wəsə kwa ɗɛkeɗɛ yafiyite na yitea ntsə. Gəmə pesakɛ geva na, nahe ka meghwateshi keɗema ŋa, mte ta ŋa yaɗe hɛ.

³¹Kafefa lewela 'ya kala ŋa male nya keheha va ya, nehwene ta jɛmbezlɛ nya keya kwa ghate ta wəzege ta nta. Nehwene ta meleme ta Siyon nya keŋələvə ba'a nya keɓeɓelake: «Nahe ŋa ɗa! 'Ya kamte va ɗa ta ka mpə ŋkwa!»