Read KapsikiDC Zhɛrɛmi 40 Bible Online

Zhɛrɛmi 40 - KapsikiDC bible

Zhɛrɛmi 40

¹Pa Mahwətə gezete nda ghena ke Zhɛrɛmi kwa sebe ta nya mbelemte ŋkɛ Nebəwzaradan, wəndə te ghəa ka ya meghe mbe Rama. Tehwepe Zhɛrɛmi kwa zewe lɛ hwa ka Zhɛrəzalɛm ba'a ka Zhəwda nyi ketefə geva kajive Babilone nda mbelemte ŋkɛ.

²Pa wəndə nya te ghəa ka ya meghe hekakɛ Zhɛrɛmi kwetɛŋenyɛ, ma ke shɛ: «Nahe Shala Mahwətə ta ŋa ketarete kave ndiremi nya kadzete meleme nya.

³Ma tsetsenya ne, nahe ŋkɛ kemenete wəsə nya gezete ŋkɛ, kwa nza ŋkɛ fete ya va gheyɛ kwa ɗema yɛ kese kahawe va ghena nyi gezete ŋayɛ ŋkɛ. Vatse menete ŋayɛ geva wəshi nyi.

⁴Ama ɓeshi nya gɛ ne, 'ya kapele zewe lɛ nyi kwa dzeve va gha. Ma keɗe na kabeghe ɗa kajive Babilone ne, mbi ɓə, katenewe ghweme 'ya te gha. Ama keɗema jive Babilone na ne, nza ŋa. Waɗe hweŋkwa va gha kalə te yayata ŋkwa nya ɗe na te hɛɗi nya.

⁵Ma keɗema nza na le 'ya ne, zhɛneghe geva tsagha kalə sha Gedaliya, wəzege ta Ahikam ba'a shia Shafan, nya veyi meghea ka Babilone kawəndə kwele nya te ghəa meleme nyi mbe Zhəwda. Nza ŋayɛ mə le hwa mbeli, keɗema kalə ŋa te ŋkwa nya ɗe na.» Pa wəndə nya te ghəa ka ya meghea shɛ ɗave nda wəshi kezeme kwa hweŋkwa ba'a wəshi gəmə ke Zhɛrɛmi, kwa sebe ta ŋkɛ, pa pelakɛ ŋkɛ kaslə.

⁶Tsetse se ŋkɛ nda ntishɛnyɛ Zhɛrɛmi mbe Mispa yitea Gedaliya, wəzege ta Ahikam. Pa nzanyɛ yite hwa mbeli nyi ketene mbe meleme.

⁷Pa mbelia jama ta ka sewajɛ nyi kwamte le mbeli nyi yitea hɛ fate nahe meghea ka Babilone keveyi Gedaliya, wəzege ta Ahikam kawəndə nya te ghəa te hɛɗi ba'a nahe ŋkɛ kedapate nda yɛ zhili, mi, ŋwale le mbeli nyi ketene tagha ɓɛhwɛ kaɗema kefəghe geva kajive Babilone te dzeve.

⁸Hwa'a hɛ le mbelia nci sha Gedaliya mbe Mispa: yɛ Ismayɛl, wəzege ta Netaniya, yɛ Yohanan le Yonatan nyi kaŋwalea Karɛya, Seraya, wəzege ta Tanehəwmɛt, ŋwalea Ɛfay nya kande Netofa le Yazaniya, nde Ma'aka.

⁹Ma ke Gedaliya, wəzege ta Ahikam ba'a shia Shafan meɗeyi nda ke hɛ pɛtɛ: «Ghazlənəma yɛ va nza mbe dzeve ta ka Babilone ma, nza ŋayɛ mə te hɛɗi nya ba'a hawe va meghea ka Babilone. Ma tsagha, megela tenza yɛ.

¹⁰Ma 'ya le ŋa ɗa ne, teke nza 'ya mbe Mispa kezha nza kwa kema ta ka Babilone nyi kese sha gheɓəmə. Ama gheyɛ le ŋa ŋayɛ, nda mə rɛzɛŋe, kweci ya ta wəfe se te wəve ba'a ta mə 'yi. Wəmbəyi mə hɛ ba'a nza mə mbe meleme nyi nza nyi yɛ.»

¹¹Tsagha shɛ ne, pa ka Zhəwda nyi mbe Mowab, Amon, Ɛdom ba'a nyi mbe kweci hɛɗi fate nahe meghea ka Babilone kesərəakɛ kwete bela ta mbeli mbe Zhəwda ba'a nahe ŋkɛ kedapate nda hɛ te dzeve ke Gedaliya, wəzege ta Ahikam ba'a shia Shafan.

¹²Tagha gɛ, pɛtɛ ka Zhəwda nyi ketazeyi geva te yayata ŋkwa zhɛneke geva, hwa'a hɛ te hɛɗia ka Zhəwda sha Gedaliya, mbe Mispa. Pa hɛ ndake yɛ rɛzɛŋe ba'a kweci ya ta wəfe kwele kwele se te wəve.

¹³Kwa sebe ta ŋkɛ ne, hwa'a yɛ Yohanan, wəzege ta Karɛya le pɛtɛa mbeli nyi te ghəa ka sewajɛ kwamte sha Gedaliya mbe Mispa.

¹⁴Ma ke hɛ shɛ: «Keɗepe na nahe Ba'alis, meghea ka Amon kegezete nda ke Ismayɛl, wəzege ta Netaniya kezha pesle ŋa tse yi?» Ama kese Gedaliya kayɛ ghena ta nci we.

¹⁵Ndagwara hwa'a se Yohanan, wəzege ta Karɛya teghərə teghərə sha Gedaliya mbe Mispa, ma ke shɛ: «Ndeke ɗa hweŋkwa kezha lə 'ya kapesle Ismayɛl, wəzege ta Netaniya tewəfərə. Wəndə shɛ kateɗepete we. Kaganda ɗe na kapeslekɛ ŋa ŋkɛ na? Ma kepeslekɛ ŋa ŋkɛ ne, pɛtɛ tezhɛne ka Zhəwda nyi ketsenete geva nyi yitea gha kataze geva. Ma tsagha gɛ, bətə tenza sebe te mbeli nyi ketene mbe Zhəwda.»

¹⁶Ama ma ke Gedaliya, wəzege ta Ahikam zhɛnete nda ke Yohanan, wəzege ta Karɛya: «Menema na ma! Tseŋwə ghena nyi geze nyi na te Ismayɛl.»