Read KapsikiDC Zhɛrɛmi 44 Bible Online

Zhɛrɛmi 44 - KapsikiDC bible

Zhɛrɛmi 44

¹Pa Mahwətə gezete nda ghena ke Zhɛrɛmi kezha ka Zhəwda nyi kenzanji te hɛɗia Ɛzhipte mbe yɛ meleme ta Migdol, Tapanɛs, Mɛmfis ba'a te hɛɗia Patros. Ma ke Zhɛrɛmi sha hɛ:

²«Wa nya ghena nya geze Mahwətə nde berete, Shala ta ka Israyɛl nya: ‹Nahe yɛ kenakɛ ndiremi nyi vate 'ya te Zhɛrəzalɛm ba'a te kweci meleme ta Zhəwda pɛtɛ: Kakwəfi hɛ tsetsenya, wəndə shɛ mbe hɛ we.

³Va nya ghwezakɛ mɛ hɛ hwa 'ya laka wəshi nyi ndiremi ndiremi nyi menete hɛ. Kwa nza ŋkɛ nahe hɛ kelənji yitea tere nda 'wərdə ke kweci shala ba'a hawe va hɛ. Ndagwara wəsə shɛ kejikəte hɛ le yɛ shala shɛhɛ, ya gheyɛ, ya ka shihɛ ŋayɛ ŋkɛ we.

⁴Kegha 'ya kaɗema ghwene ŋayɛ ka mene slene ta ɗa nyi kaka mɛ ŋkwa kageze ŋayɛ kasərəakɛ wəshi nyi ndiremi ndiremi kashasha nyi ɗema nyi 'ya yɛ we.

⁵Ama kese yɛ kafa ba'a kaŋka sleme yite we, kese yɛ kasərə wəshi nyi ndiremi ndiremi nyi mene nyi yɛ ba'a kasərə tere nda 'wərdə ke kweci shala we.

⁶Vatse nda vaghe ghwə ta hwepe wənəa ɗa 'ya kənəa meleme nyi mbe Zhəwda ba'a hweŋkwa nyi Zhɛrəzalɛm nyi kendəmte geva: kakwəfi ba'a kaɓerama zhɛrenji hɛ kala nya newe nya mbeli ɓeshi.›»

⁷Ma ke Zhɛrɛmi zhɛkwa: «Ma tsetsenya gɛ, wa nya ghena nya geze Shala Mahwətə nde berete, Shala ta ka Israyɛl nya: ‹Wa raberə nda mba yɛ kamene nda fete ke ghəa ŋayɛ wa? Gheyɛ zəzəte kaza sebe te zhili, mi, ŋwalea fəshi ba'a yɛ velɛnjɛ te hɛɗia Zhəwda na? Kaɗe yɛ katene sebe te gheyɛ wəka?

⁸Gheyɛ ɗe kabeze ɗa wənəa le wəshi nyi mene yɛ, kwa dzeghe nda melɛ yɛ ke kweci shala te hɛɗia Ɛzhipte nya se yɛ te na? Gheyɛ ɗe kaganda kaganda kaza sebe te ghəa ŋayɛ ba'a kanza kawəsə nya kebezla ŋkwa keɗema kawəsə keŋele ŋkwa sha kweci hwelefefi nyi te hɛɗi lema na?

⁹Nahe yɛ kezaghəyite wəshi nyi ndiremi ndiremi nyi menete ka shihɛ ŋayɛ, ka meghea ka Zhəwda ba'a mia nci, gheyɛ le ghəa ŋayɛ ba'a mia ŋayɛ te hɛɗia Zhəwda ba'a dzeyi kwa hweŋkwa nyi mbe Zhɛrəzalɛm na?

¹⁰Pa ɓeshi ne, wəndə shɛ keshifəmte ghəa ŋkɛ we, wəndə shɛ kehawete ɗa hawe we, wəndə shɛ keyate wəshi nyi tekete ŋayɛ 'ya ba'a ghena nyi gezeke ŋayɛ 'ya kala ŋa ka shihɛ ŋayɛ we.›»

¹¹Ma ke Zhɛrɛmi mtsehete: «Vatse gɛ, wa nya ghena nya geze Mahwətə nde berete, Shala ta ka Israyɛl nya: 'Ya kateve ɗa te gheyɛ ba'a kateza sebe te ka Zhəwda pɛtɛ.

¹²'Ya kateza sebe te ka Zhəwda nyi ketene te ghweme, nyi ketarete kalə kawəfərə mbe Ɛzhipte, pɛtɛ tempə hɛ. Te hɛɗi shɛ tempə hɛ va mpa keɗema va ma, yɛ mbelia jama le ŋwalea fəshi. Kaganda, tsetse tempə hɛ. Hɛ yatekele mbeli kawəsə keyipə pa kenza mbeli kabezla ŋkwa, kageze ghena te wəsə kwa ndiremi ba'a keɗe mbeli kapəli nda hawe ke wəndə.

¹³Kateme 'ya kənəa mbeli nyi kelənji nyi kanza mbe Ɛzhipte, kala nya meghə 'ya kənəa ka Zhɛrəzalɛm: le mpa, ma ba'a ba.

¹⁴Kwete shɛ hwa ka Zhəwda nyi ketene nyi teghweme, nyi kelənji nyi kawəfərə mbe Ɛzhipte katehwɛnyɛ we, kwete shɛ katembelenyɛ va mte we, kwete shɛ katezhɛne geva kadzete hɛɗia Zhəwda nya mawe nya ŋkɛ kanza te te kwete hɛ we, deke mbeli nyi ketene yitea mte.»

¹⁵Ma ke zhili nyi keɗepe nahe mia nci kese katere nda 'wərdə ke kweci shala, tsagha mi nyi ketsenete geva kwele kwele tagha, pɛtɛa mbeli nyi kenzanji mbe Ɛzhipte, mbe meleme ta Patros zhɛnete nda ke Zhɛrɛmi:

¹⁶«Ya tsemanyɛ geze n'yɛ ghena na te sləa Mahwətə ne, kafa ghena ta ŋa ghen'yɛ we.

¹⁷Wəshi nyi zəzəte ghen'yɛ kamene yatemene n'yɛ: tere nda 'wərdə ba'a ɓasle nda tɛ ke Astartɛ, shala nya kamale ba'a meghea mi nya pelɛ ghweme kala nya mene nya n'yɛ pa tsetsenya, tsagha ka shihɛ n'yɛ, ka meghea n'yɛ ba'a mbelia jama ta n'yɛ dzeyi mbe mbe meleme nyi te hɛɗia Zhəwda ba'a dzeyi kwa hweŋkwa nyi mbe Zhɛrəzalɛm. Ma te vəa shɛ ne, kwele kwele wəshi kezeme va ghen'yɛ ba'a ndiremi te ghen'yɛ we.

¹⁸Ama ghala ɗema ghen'yɛ kese katere nda 'wərdə ba'a kaɓasle nda tɛ ke meghea mi nya pelɛ ghweme ne, pɛtɛa wəshi kaɗema va ghen'yɛ ba'a mpə yampə n'yɛ va yɛ mpa le ma.»

¹⁹Ma ke mi zhɛkwa: «Ma nda tere nda 'wərdə ba'a ɓasle nda tɛ ghen'yɛ ke meghea mi nya pelɛ ghweme ne, ashɛ le ɗe ta zhilia n'yɛ wəka? Ma nda ta nda gatewe nyi kencɛ pa ta nta ba'a nda ɓasle nda tɛ ghen'yɛ ne, nahe hɛ keɗepete megela.»

²⁰Ma ke Zhɛrɛmi sha mbeli pɛtɛ, yɛ zhili le mi nyi kezhɛnete nda ghena nya kala nya:

²¹«Nahe yɛ kese katere 'wərdə mbe meleme nyi te hɛɗia Zhəwda ba'a dzeyi kwa hweŋkwa nyi mbe Zhɛrəzalɛm, gheyɛ le ghəa ŋayɛ, ka shihɛ ŋayɛ, ka meghea kɛfia ŋayɛ, mbeli nyi te ghəa ŋayɛ ba'a kweci ka Zhəwda. Ma zəzə yɛ ne, kaɗema Mahwətə kenakɛ keɗema nahe ŋkɛ kezaghəyite na?

²²Kazhɛne Mahwətə kasəwəte yɛ slene ba'a wəshi nyi ndiremi ndiremia ŋayɛ tɛape we, vatse nda zhɛrenyɛ hɛɗia ŋayɛ kakwəfi, kaɗema mbeli te. Nahe ŋkɛ kezhɛrenyɛ kawəsə kebezla ŋkwa kala nya newe nya mbeli tsetsenya.

²³Ma ndiremi nya te gheyɛ nya ɓeshi ne, va nya se yɛ kadzeghe nda melɛ ke kweci shala, nahe yɛ kemenete nda fete ke Mahwətə, kese yɛ kafa ghena ta ŋkɛ we, ya mene slene le wəshi nyi tekete ŋayɛ ŋkɛ, le ghena nyi gezeke ŋkɛ le yɛ ncɛ ntsehwelea ŋkɛ kala nya newe nya mbeli tsetsenya.»

²⁴Ma ke Zhɛrɛmi sha mbelia shɛhɛ pɛtɛ, zhili le mi ɓiyitsa: «Fa mə ghena ta Mahwətə gheyɛ ka Zhəwda nyi te hɛɗia Ɛzhipte:

²⁵Wa nya ghena nya geze Mahwətə nde berete, Shala ta ka Israyɛl nya: Nahe gheyɛ le ghəa ŋayɛ ba'a mia ŋayɛ kemeɗeyi ya tsemanyɛ ŋkɛ katere nda 'wərdə ba'a kaɓasle nda tɛ ke meghe mi nya pelɛ ghweme, tsagha shɛ menete yɛ. Keseve mə zəzə ta ŋayɛ ndeɗekə, mene mə kala nya meɗeyi yɛ!

²⁶Vatse gɛ, fa mə ghena ta Mahwətə, gheyɛ ka Zhəwda nyi te hɛɗia Ɛzhipte! 'Ya Mahwətə, 'ya kazeme ŋayɛ fela le sləa ɗa nya wəba: kazhɛne kwete hwa ka Zhəwda nyi te hɛɗia Ɛzhipte kazeme fela le sləa ɗa le geze: ‹Le Shala Mahwətə teghweme...›, ke we!

²⁷Kateve ntsə 'ya te gheyɛ kezha ve ŋayɛ zeɗe nza we, ama kezha ve ndiremi. Rayɛ tenza sebe te ka Zhəwda nyi te hɛɗia Ɛzhipte va mpa keɗema va ma.

²⁸Deke mbeli ɓɛhwɛ ka tembele va kafayɛ, ghenci ka tezhɛne geva shave mbe Ɛzhipte kadzete hɛɗia Zhəwda. Ma tsagha kateɗepete mbeli nyi kewəfərənji nyi mbe Ɛzhipte, kenza nde ghena ta ɗa keɗema ghena ta ŋayɛ nde yipəyi geva kwa.

²⁹Ma 'ya, 'ya Mahwətə: Kateve ɗa 'ya te gheyɛ teke mbe Ɛzhipte, kateve ŋayɛ wəsə kencɛ wəsə 'ya. Ma tsagha, kateɗepe yɛ tsema tsema teyipə geva ghena ta ɗa kaganda kezha ndiremia ŋayɛ. Wa nya wəsə kencɛ wəsəa shɛ nya:

³⁰Kateve Farawon Hofra, meghea ka Ɛzhipte 'ya mbe dzeve ta ka ghema ta ŋkɛ, mbeli nyi keɗe kaza mpia ŋkɛ, kala nya veyi Sɛdɛsiyas, meghea ka Zhəwda 'ya mbe dzeve ta Nabəkodonozor, meghea ka Babilone, nde jaga nya keɗe mte ta ŋkɛ. Nya ya kaghena nya geze 'ya, 'ya Mahwətə.»