Read KapsikiDC Zhɛrɛmi 46 Bible Online

Zhɛrɛmi 46 - KapsikiDC bible

Zhɛrɛmi 46

¹Pa ghena ta Mahwətə gezeke nda geva ke Zhɛrɛmi te ghəa kweci hɛɗi,

²te ghəa Ɛzhipte. Wa nya ghena nya geze ŋkɛ te ghəa ka sewajɛa Farawon Nɛko, meghea ka Ɛzhipte nya hərəte Nabəkodonozor, meghea ka Babilone mbe Karkɛmish, mɛa hələa Efrate, te kwa wəfaɗe ta va ta Zhowakim, wəzege ta Zhoziyas, meghea ka Zhəwda nya:

³«Ma ke mbelia jama ta ka sewajɛ sha lewela: Hi mə gelə nyi jama jama ba'a nyi ɓɛhwɛ ɓɛhwɛ! Ngara mə yitea mpa!

⁴Fəame mə yɛ serede pelɛ yɛ gədəwə, dzeme mə hɛ! Seɗe mə kwenə shɛ yɛ pa geva! Hi mə megha megela, seɗe mə rəbəci.»

⁵Wa nya ghena nya geze Mahwətə nya: «Ama wa nde menete geva wa? Wa wəsə nya newe nya 'ya wa? Benake hɛ va ghazlənə, zhɛne hɛ dzeyi te sebe. Hərə ka katsala ka sewajɛa nci, yayata wəndə kambele ghəa ŋkɛ, kaɗema kazhɛre geva te sebe. Ghazlənə ya shɛ te yayata ŋkwa.

⁶Kambele wəndə nya wɛrewɛ, ya katsala ganyɛ ŋkɛ we! Laka bela kwa gwela, mɛa hələa Efrate ne, katsa hɛ tehene ba'a kateɗe hɛ.

⁷Wa wəndə nya kala hələa Nil nya keviɗinyɛ, nya kala hələ nyi jama jama nyi kegaŋkeɓe wa?

⁸Ɛzhipte ya kala Nil nya keviɗinyɛ, kala hələ nyi jama jama nyi kegaŋkeɓe. Ma ke: 'Ya kateviɗi ŋkwa nya te hɛɗi ba'a 'ya kateza sebe te yɛ meleme le mbeli nyi mbe.

⁹Gədəwə, kwiɗi mə yitea mpa, wəmata gədəwə, hwɛ mə kahe kahe! Te kema te kema pe yɛ ka katsala kɛfi, ka Ɛtiyopi le ka Pəwt nyi keɗepe kese gelə, ka Ləwd nyi keɗepe he have!

¹⁰Ama veci nya neghe Shala Mahwətə nde berete ŋkɛ, vecia wa ghena te ka jaga ta ŋkɛ. Kawe kawe tezeme kafayɛ te hɛ, keghwəyi ghwəyi tenza ŋkɛ va mimia nci. Wa nya melɛ dzeghekɛ Shala Mahwətə nde berete, te hɛɗi nya laka bela kwa gwela, mɛa hələa Efrate gɛ!

¹¹Wəzha ta ka Ɛzhipte, dzeme Gala'ad kazele n'yi nya kenza gweɗakwete ŋa. Gəmə heha na kazele yɛ ghwɛ, wəsə shɛ kambete ŋa we.

¹²Nahe mbeli kefate hawe nya te gha, kwa nza ŋkɛ kafefa lewela ta ŋa mbeli te yayata ŋkwa. Katsala sewajɛ nde kelawe kwete katsala sewajɛ, kanya kwetɛŋe bete geva hɛ bake nci kadzete hɛɗi.»

¹³Wa nya ghena nya gezete nda Mahwətə ke nde mɛ ŋkwa Zhɛrɛmi te və nya se Nabəkodonozor, meghea ka Babilone kazeme Ɛzhipte nya:

¹⁴«Zlape nda mə ke ka Ɛzhipte, fave nda mə ke meleme ta Migdol, Mɛmfis ba'a Tapanɛs. Ma pe yɛ sha hɛ: Sate mə te ŋkwa, hite mə geva! Kwa nza ŋkɛ wa nya mpa nya kaza sebe te ka ghedəkwəa ŋayɛ.

¹⁵Wa nde menete geva nda teɗenyɛ mca nya keveyi ŋa geva kashala wa? Ndɛare kaghereŋe yitea ghweme kwa tsəkwəte Mahwətə.

¹⁶Nahe ŋkɛ ketsetsəkwəate ka sewajɛ kwele kwele, te wəndə te wəndə te hɛɗi. Ma ke hɛ kwelɛ ghəa nci: ‹Mbi ɓəmə, zhɛne ɓəmə geva kalə sha ghɛa ɓəmə, te hɛɗia ɓəmə cakeɗake va mpa kwa zhɛma heli nya.›

¹⁷Ma Farawon meghea ka Ɛzhipte gɛ ne, “Nde ghweghwɛa mɛ gəmə” teheka nda slə mbeli.

¹⁸Wa ghena nya geze Meghe nya nza sləa ŋkɛ “kaMahwətə nde berete” nya: ‹Kazeme ŋayɛ fela 'ya, katese nde ghema, kala ghweme ta Tabor, kala Karmɛl nya te ndərə.›

¹⁹Ka Ɛzhipte, tseɓate mə wəshia ŋayɛ kezha lə te kwete hɛɗi. Kaɓerama nya dɛrɛŋe rɛŋe tezhɛre Mɛmfis, keŋzla ŋzla kaɗema wəndə mbe.

²⁰Kambəkwə nya ganyɛ se Ɛzhipte! Ama pa ntsa se laka bela kwa gwela kamenyɛ te.

²¹Ma ka sewajɛ nyi pake Ɛzhipte yitea mpa ne, kala mɛare nya kwa zlema newe ghweme mbeli te hɛ. Pa le hɛ kahwɛ dzeyi te sebe, kanya kwetɛŋe hwɛnji hɛ. Kwete shɛ keghereŋe mɛa mpa kwa se vecia ndiremi kadzete hɛ we, kwa vate ɗa 'ya te hɛ.

²²Kase wəvəsəa ka ghema kadzeghəa Ɛzhipte, kala ka tsasle wəfe le tseyɛ. Ma tsagha, kahwɛ ka sewajɛa ka Ɛzhipte kala shishi nya kehwɛ kafama kwaɗe ta ŋkɛ mbeli.

²³Mpə yampə ghɛa wəfe ta ŋkɛ hɛ, ghɛa wəfe nya ɗema mbeli kashɛ dzembe. Tipə tipə ma hɛ ke dzale, kaɓelate hɛ mbeli we. Mahwətə nde gezete.

²⁴Shewə Ɛzhipte nya ganyɛ nya va hawe. Mbe dzeve ta mbeli nyi laka bela kwa gwela ŋkɛ.»

²⁵Ma ke Mahwətə nde berete, Shala ta ka Israyɛl: «'Ya kateme kənəa Amon, shala nya mbe Tɛbɛs, kənəa Ɛzhipte, yɛ shala ta ŋkɛ ba'a ka meghea kɛfia ŋkɛ, kənəa yɛ Farawon le mbeli nyi kevate zəzə ta nci te.

²⁶Kateve hɛ 'ya mbe dzeve ta mbeli nyi keɗe mte ta nci: yɛ Nabəkodonozor, meghea ka Babilone le ka sewajɛa ŋkɛ. Ama kwa sebe ta ŋkɛ, katezhɛne Ɛzhipte kanza kala nya se ŋkɛ vəashi.» Nya ya kaghena nya geze Mahwətə.

²⁷«Gha Israyɛl, nde mene slene ta ɗa, ghazlənəma na ma. Tazema mehele ta ŋa, gha nya kahwelefe ta Zhakob ma. Kwa nza ŋkɛ katembele ŋa 'ya shave mbe hɛɗi nyi cakeɗa, katezhɛne ŋwalea ŋa 'ya se te hɛɗi nya fəghe hɛ mbeli. Israyɛl, katezhɛne geva na kase, katenza na gwezlayɛ ba'a kwelɛŋe. Wəndə shɛ katezhɛne kadake ŋa we.

²⁸Gha nde mene slene ta ɗa Zhakob, ghazlənəma na ma, kwa nza ŋkɛ le gha 'ya. Kateza sebe 'ya te hwelefe nyi vahwe ŋa 'ya hwa hɛ. Ama gha ne, kaza sebe 'ya te gha nya se 'ya ka'yɛ kala nya kehi we. Kwa nza ŋkɛ, kamene 'ya le gha kala wəndə nya kemenetema fete we.» 'Ya Mahwətə nde gezete.