Read KapsikiDC Zhɛrɛmi 48 Bible Online

Zhɛrɛmi 48 - KapsikiDC bible

Zhɛrɛmi 48

¹Wa nya ghena ta Mahwətə nde berete, Shala ta ka Israyɛl te ghəa Mowab nya: «Wa nya ndiremi te mbeli nyi mbe Nɛbo gɛ: nahe meleme ta nci ketazemte geva! Wa nya hawe te meleme ta Kiriyatayim gɛ: nahe ŋkɛ kekelehwe geva! Wa nya hawe te meleme nya nza nya zli yite gɛ: nahe ŋkɛ keŋzlamte geva!

²Miɗi zləvəa Mowab. Nahe mbeli ketsate ghena yitea meleme ta Hɛshebon, ma ke hɛ: ‹Mbi ɓəmə shɛ mə zamte melemea shɛ!› Gha perə Madmɛn, kateŋzlamte geva na, katekekave ŋa mpa.

³Kafefa lewela mbeli se mbe Horonayim: Wa nya wəba ba'a dzawe va nya ndiremi gɛ!

⁴Nahe hɛɗia Mowab ketaze, nda lewela yatsa ŋwalea ŋkɛ le berete.

⁵Dzeme yadzeme mbeli vare wəmbəa Ləwhit le nehwene. Sawa vare Horonayim ne, kafefa lewela yaka mbeli kala nya:

⁶‹Hwɛ mə! Mbele mə mpia ŋayɛ! Nza mə kwamte te ɓerama kala kwara gamba›

⁷Mowab, te slene nyi menete na ba'a te wəshi nyi kwa tame ta ŋa vate ghə na. Katekese ŋa mbeli le ŋa ŋa perə. Katekele shala ta ŋa Kemosh mbeli kadzete kwete hɛɗi, zlaɓe le ka dzeghe shala ta ŋa ba'a mbelia ŋa nyi te ghə.

⁸Kemeleme kemeleme tedzeghwa nde mpə ŋkwa, Kwete hwa meleme shɛ katembele we. Kakwəfi tenza ŋkwa nya kwa zlərə ba'a nya pelɛ wəmbə, tsagha gezete Mahwətə.

⁹Fəave nda mə bidzə ke Mowab, kwa nza ŋkɛ kamawe zlənyɛ! Kaɓerama nya dɛrɛŋe rɛŋe tenza yɛ meleme ta ŋkɛ, kaɗema mbeli mbe hɛ.

¹⁰Kebezla bezla nza wəndə nya kepeleyite se yitea slene ta Mahwətə! Kebezla bezla nza wəndə nya kefɛa kafayɛa Mahwətə kedzehwa mimi.

¹¹Se kawəzegenyɛ ne, mbe zeɗe nza Mowab, kegha mbeli kakeleghe kadzete kwete hɛɗi we. Gwezlayɛ nzanyɛ ŋkɛ kala ghəa tɛ nya kecɛkenyɛ kənəa daka. Kegha mbeli ka'yɛyi ŋkɛ kwa kwete ghwelepe we. Vatse nza ŋkɛ mba kezeɗenyɛ ba'a zəŋwə ŋkɛ kɛaze kɛaze.

¹²Vatse gɛ ne, katese və nya teghwene mbeli 'ya ka'yɛ kadzawa kwete ghwelepe. Katesheke wəsə hɛ same kwa ghwelepe nyi nza ŋkɛ ba'a katempə hɛ hɛ. Nya ya kaghena nya geze Mahwətə.»

¹³Katepəli nda hawe shala ta ŋkɛ Kemosh ke Mowab, kala nya pəliave nda hawe Bɛtɛl, shala ta ŋkɛ ke Israyɛl nya kevate ghə te.

¹⁴«Zhili nyi mbe Mowab, tsema pe yɛ sha geze: ‹Ka sewajɛ nyi berete ghen'yɛ, ka katsala kempa ghen'yɛ› pe yɛ wa?

¹⁵Nahe Mowab kebezemte geva, yɛ meleme ta ŋkɛ yadzeme mbeli kaɗa. Nahe mbeli kefəhwe ka mempɛhwetɛti ganjia ŋkɛ kalə kampə.» Nya ya kaghena nya geze Meghe nya nza sləa ŋkɛ “kaMahwətə nde berete”.

¹⁶Takwa takwa Mowab katetazemte geva, kahe kahe teme ndiremi te hɛɗia ŋkɛ.

¹⁷Ma gheyɛ kweci hɛɗi nyi dzeyi yite nyi keɗepe ŋkɛ megela ne, tsa nda mə ɗese. Ma pe yɛ: «Tsema kiɗimte geva berete ta ŋa nya wəba ba'a zləvəa ŋa nya wəba nya gɛ wa?»

¹⁸Ka Dimon, sawa mə pelɛ pasla ta ŋayɛ, ntishɛ mə te kəsə. Kwa nza ŋkɛ, nya nde mpə ka Mowab nya kadzeme kaɗa ŋayɛ, kateŋzla zli nya yitea gheyɛ ŋkɛ.

¹⁹Ka Arowɛr, ghereŋe mə mɛa hweŋkwa ba'a wəmbɛne mə ŋkwa. 'Yɛwe mə wəsə nya kemenete geva va mbeli nyi kehwɛ ba'a nyi kembele ghəa nci.

²⁰Ma tezhɛne hɛ: «Nahe Mowab keteɗe! Shewə hɛɗia shɛ va hawe!» Tsa mə lewela, 'yɛwe mə kemane! Nahe Mowab keteɗe pe yɛ sha zlape mɛa hələa Arnon.

²¹Nahe meha ghwə ta Mahwətə keme te hɛɗi nya pelɛ wəmbə, te yɛ meleme ta Holon, Yahas, Mɛfat,

²²Dibon, Nɛbo, Bɛt-Diblatayim,

²³Kiriyatayim Bɛt-Gaməwl, Bɛt-Mɛyon,

²⁴Keriyot ba'a Bosra. Pɛtɛa meleme ta Mowab me ŋkɛ te, nyi dekwede le nyi cakeɗa.

²⁵Ma ke Mahwətə: «Nahe berete ta Mowab kekiɗi, nahe kwelea ŋkɛ keteɗe.»

²⁶Ma zəzəte Mowab ne, kwele ma ŋkɛ ke Mahwətə. Ghwəyimte ŋkɛ mbeli le tɛa ŋkɛ yitea vənəhwə ŋkɛ! Ma tsagha, mbeli pɛtɛ kateŋ'wəshi ŋkɛ.

²⁷Gha Mowab, zəzəte tsema tsema se na kaŋ'wəshi Israyɛl. Kala ghərə veyi ŋkɛ na, kwa nza ŋkɛ kegha kageze ghena te kaɗema na kagagəzə ghə yiɗə we.

²⁸Ka Mowab, shave ŋayɛ mə mbe meleme, nza ŋayɛ mə dzeyi te yɛ keleɓa. Nza mə kala yɛ ghweɗekwə nyi kepa ghɛa nci dzeyi mɛa mɛ mepeɗɛŋe ta ghweme.

²⁹Nahe ghen'yɛ kefate ghena fegea ta Mowab. Wa nya ghena fege gɛ, wa nya hwa ghə gɛ, wa nya veyi ghə le gɛ, wa nya ŋkele ntsə gɛ, wa nya zəzə kele ghə gɛ!

³⁰«Ma 'ya, 'ya Mahwətə: Nahe 'ya keɗepe kele ghəa ŋkɛ megela. Ama gəmə ghena nya geze ŋkɛ, kaketekɛ ŋkwa wəsə nya mene ŋkɛ we.»

³¹Vatse gha nehwene 'ya kənəa Mowab, heka ŋkwa 'ya kezha kemane mbeli nyi mbe. Ŋələvə yaŋələvə 'ya kezha ka Kir-Hɛrɛs.

³²Nehwene yanehwene ka Sibma 'ya za ma ke ka Yazɛr. Yipə yipə na le wəfe ta rɛzɛŋe. Nahe na kepeslete dzeve zlake ke ndərə kwa Ghwənəghwə, hwa'a mbe Yazɛr hɛ. Ama nahe nde mpə ŋkwa kemenyɛ te yɛ ya ta ŋa ba'a te rɛzɛŋe nyi ndake na.

³³Nahe zlama nya wəba kekiɗi mbe yɛ wəvea wəfe ta ka Mowab. Kezhɛne tɛ kanza te yɛ weta we, mba mbeli shɛ kezha zleɗe rɛzɛŋe we, kezhɛne mbeli kafa ciməa ka zleɗe rɛzɛŋe we.

³⁴Ka Hɛshebon katsa lewela. Kafefa lewela ta nci mbeli mbe Ɛlalɛ ba'a mbe Yahas, se mbe Sowar hwa'a mbe Horonayim, mbe Ɛglat-Selisiya. Pa le ɗaslea Nimrim kezhɛrenyɛ kaɓerama nya dɛrɛŋe rɛŋe.

³⁵«'Ya kateza sebe te mbeli nyi kedzeme hwa kələŋə kadzeghe nda melɛ ke kweci wəshi shala mbe Mowab.» 'Ya Mahwətə nde gezete.

³⁶Vatse gərə gərə wənəa ɗa kala sefə kwa shɛla yitea Mowab ba'a yitea mbeli nyi mbe Kir-Hɛrɛs: pɛtɛ mcɛlə nyi tsenete hɛ kezanji.

³⁷Pɛtɛ zhili keŋsəmte ghəa nci, keŋsəmte ghwɛmɛ. Nahe hɛ kepeperawemte dzeve ta nci ba'a kehwepahwe wəshi hwa hwə.

³⁸Dzeyi pelɛ dɛɓerea cɛ nyi mbe Mowab pɛtɛ ba'a dzeyi te ŋkwa kebeke nyi mbe ne, nda nehwene yafa mbeli. «Nahe 'ya kempəmte Mowab kala ghwelepe nya ɗema mbeli kaɗe.» Nya ya kaghena nya geze Mahwətə.

³⁹Wa nya wəsə gɛ! Nahe Mowab kempəmte geva! Tsa mə lewela! Nahe Mowab kedzeyi te sebe, wa nya hawe gɛ! Kawəsə ŋ'wəshi ba'a kawəsə ghazlənə zhɛrenyɛ Mowab sha hɛɗi nyi dzeyi yite.

⁴⁰Wa nya ghena nya geze Mahwətə nya: «Ma nde jaga ne, kala zele nya kezlə ba'a nya kepelakeyi bidzəa ŋkɛ kənəa Mowab ŋkɛ.»

⁴¹Nahe yɛ meleme kefəhwe geva, nahe ŋkwa nyi nza zli yite kezehwe geva. Tagha gɛ, ntake ka katsala ka sewajɛa ka Mowab kaheha kala male nya shewə va ya.

⁴²Nahe Mowab keŋzla, mba kahwelefe, va nya veyi ghəa ŋkɛ ŋkɛ kwele ma ke Mahwətə we.

⁴³Ma ke Mahwətə: «Yɛ ghazlənə, ki le keleŋa ne, pɛtɛ wəshi nyi yitea gheyɛ, gheyɛ ka Mowab.

⁴⁴Ma wəndə nya kehwɛ va ghazlənə ne, kateteɗe ŋkɛ kadzawa ki. Ma kasamenyɛ ŋkɛ kwa ki ne, hecape tekese ŋkɛ keleŋa. Kaganda ne, pɛtɛ tebete wəshi nyi 'ya te Mowab te va nya teme 'ya te. 'Ya Mahwətə nde gezete.

⁴⁵Ma kwa leɓenji mbeli nyi kehwɛ ne, pa hɛ ghereŋenji mbe Hɛshebon. Ama deɗamə ghwə tsete geva shave mbe meleme, shave ki ghɛa meghe Sihon. Pa ghwəa shɛ lə kateremte hɛɗia ka ghweghwɛa mɛ nyi, se mɛa yɛ ghala hwa'a te tepe.

⁴⁶Wa nya ndiremi te gha gɛ Mowab! Bətə sebe te gheyɛ gɛ wəshɛ mbelia shala Kemosh! Nahe ŋwale tezhili le ŋwalea kwɛa ŋa kefəhwe geva kaka mavashi.»

⁴⁷Ma ke Mahwətə: «Ma te kwete hɛ ne, katezhɛne Mowab 'ya te ŋkwa ŋkɛ.» Teke kiɗi meha ghwə te Mowab.