Read KapsikiDC Zhɛrɛmi 49 Bible Online

Zhɛrɛmi 49 - KapsikiDC bible

Zhɛrɛmi 49

¹Ghena te ghəa ka Amon. Wa nya ghena nya geze Mahwətə nya: «Yitea wa kelehwe hɛɗia Gad shala Molɛk wa? Wa raberə zehwe yɛ meleme ta ka Israyɛl ka Amon wa? Ŋwale tezhili ɗema va ka Israyɛl kezha zeme ghɛ na?»

²Vatse gɛ, wa nya ghena nya geze Mahwətə nya: «'Ya katemene nda fa lewela mpa mbeli mbe Raba, meleme nya wəba ta ka Amon. Kakwəfi tezhɛre ŋkɛ, Katetere geva meleme nyi dzeyi yite. Ma vəa ŋkwa shɛ gɛ, katezhɛne nda geva hɛɗia ŋkɛ ke Israyɛl.» Mahwətə nde gezete.

³Gheyɛ mbeli nyi mbe Hɛshebon, gha mə nehwene: «Nahe meleme ta Ay ketazemte geva!» Meleme nyi dzeyi yitea Raba, tsa mə lewela, hwepe mə wəsə hwa hwə, nehwene mə ghəa ŋayɛ, ndakwe ndakwe mə dzeyi vare yɛ zli: nahe shala Molɛk kaslə kadzete kwete hɛɗi zlaɓe le ka dzeghe nda melɛ ba'a mbelia ŋkɛ nyi te ghə.

⁴Wa raberə mene fege na le berete ta ŋa wa? Nahe berete ta ŋa kekiɗinyɛ, wəzha nya keza za, gha nya kevate ghə te mcɛləa ŋa, le geze: «Wa nde nza kahave ɗa mpa wa?»

⁵Yawa, wa nya ghena nya geze Shala Mahwətə nde berete nya: «'Ya kateve ŋa ghazlənə, se mbe yayata bela tese ŋkɛ. Katetaze geva yɛ, katehwɛ yayata wəndə kekema kekema! Wəndə shɛ kazhɛne katsene mbeli nyi kehwɛnji nyi we.

⁶Ama kwa sebe ta ŋkɛ ne, katezhɛne ka Amon 'ya te ŋkwa nci.» Nya ya kaghena nya geze Mahwətə.

⁷Ma te ghəa Ɛdom ne, wa nya ghena nya geze Mahwətə nde berete nya: «Mba ka ntsehwele ntsehwele mbe Tɛman wəka? Nahe zəzə ganyɛa ka ɗepe ghena kezanyɛ na? Nahe ntsehwelea nci kedenenyɛ na?

⁸Zhɛrete mə geva kahwɛ ka Dɛdan! Wəfərə ŋayɛ mə dzeyi mbe yɛ gezlɛŋə! Kateve ndiremi 'ya te gheyɛ hwelefe ta Ɛzawə, nahe və keve ɗa te gheyɛ kese.

⁹Ma kese ka nda rɛzɛŋe sha gheyɛ ne, katetene ya hɛ ya kwetɛŋe te we. Ma kedzeki ghɛ ka ghərəa kɛfi heviɗi ne, pɛtɛ beze wəshi nyi nza hɛ gare bezemte hɛ.

¹⁰'Ya nde tepele zeweve yitea gheyɛ hwelefe ta Ɛzawə, 'ya nde tepele wəshi nyi wəfərəakɛ yɛ kadzeyitea veci. Mba yɛ kawəfərə ŋayɛ we. Pɛtɛ teza sebe te ŋwalea ŋayɛ, ka menəhɛ ŋayɛ ba'a ka ghedəkwəa ŋayɛ. Wəndə shɛ kategeze ŋayɛ:

¹¹‹Hehama yɛ yitea ka mezhɛtitia ŋayɛ ma, wərə 'ya kakelete hɛ, wərə ka wedidia ŋayɛ kavate ghə te 'ya›, ke we.»

¹²Wa nya ghena nya geze Mahwətə nya: «Fate mə: mbeli nyi ghama 'ya kaŋkate le berete kasa tɛa hwepe wənəa ɗa ne, ya tsagha shɛ ŋkɛ, nahe hɛ kesahwe. Ma gha gɛ Ɛdom, katenza ŋa na kande menetema fete we! Tsagha ŋkɛ we! Katesa na, ghəpə yite we!

¹³Kazeme 'ya kafela, 'ya Mahwətə: Ma Bosra, meleme ta ŋa nya wəba ne, kaɓerama tenza ŋkɛ, kakwəfi. Gheŋkɛ yatekele mbeli kawəsə kebezla ŋkwa keɗema kawəsə kepəli nda hawe ke wəndə. Kakwəfi tenza meleme nyi dzeyi yite kaghala ghala.» Nya ya kaghena nya geze Mahwətə.

¹⁴Pa 'ya kemave kwete ghena nya ghweneghe nda kwete wəndə ke kweci hwelefefi se va Mahwətə kala nya: «Tsene mə geva! Kwiɗi mə kaɗa Ɛdom! Sate mə te ŋkwa yitea mpa!

¹⁵Ɛdom, 'ya katezhɛre ŋa ɓɛhwɛ ma hwa kweci hwelefefi, kanya ɓelama ntsə ta ŋkɛ mbeli.

¹⁶Pɛtɛ na kedakemte mbeli, kwele ma newe ghəa ŋa na ke kweci mbeli, ama ghəa ŋa yaghwete na. Ma gha nya kenza ŋa mbe zlera, nya keveyi ghəa ŋa pelɛ wəmbə, ya gha pate ghɛa ŋa kala 'yɛ pelɛ ghəa ŋkwa kala ŋa zele ne, katenegha ŋa 'ya kasawa kwake.» Nya ya kaghena nya gezete Mahwətə.

¹⁷Dəgərəmə kakwəfi tenza Ɛdom. Kwetɛ kwetɛŋe tenza mehele ta mbeli nyi ketedzeyi vare ba'a katevɛ figwə hɛ kwa nakɛ ɗa nya te hɛ.

¹⁸Ma ke Mahwətə: «Kala ɗa nya kese te yɛ Sodome, Gomore le meleme nyi dzeyi yite tenza ŋkɛ. Wəndə shɛ katenza mbe we, wəndə ŋelɛ shɛ katedzeghwa mbe we.

¹⁹Katenza 'ya kala nivɛrə nya keshave mbe gamba nya mɛa Zhəwrdɛŋe kadzete ɗasle. Katefəmte mbeli 'ya pɛtɛ kala metɛ ta ntsə, kateve meghe nya ɗe 'ya 'ya mbe Ɛdom. Kwa nza ŋkɛ ne, wa wəndə nya kala 'ya wa? Wa wəndə nya nza 'ya kaghereŋe te ghwə le wa? Wa wəndə nya te ghə nya kenza kazhɛnete ɗa ghə wa?

²⁰Fate mə ghena nya zəzəte Mahwətə te Ɛdom, zəzə nyi kelete ŋkɛ te ka Tɛman. Kaganda tentsehe hɛ mbeli kala wəshi keseɗa, ghəpə yite we, pa le nyi ɓɛhwɛ ɓɛhwɛ. Tewəmbəreke hɛ ne, kateŋzla geva ghɛa nci kaɗema ghəpə yite.

²¹Kagaŋkəɗə hɛɗi va gaka ta teɗe ta nci. Kafefa lewela ta nci mbeli pa mɛa ndərə kwa Ghɛmɛ.

²²Kala zele nya kedzeme yitea ghweme, nya kepelaghe bidzəa ŋkɛ kənəa Bosra nde jaga. Ma te vecia shɛ ne, kwetɛ kwetɛŋe tenza mehele ta ka katsala ka sewajɛa Ɛdom kala male nya keheha va ya.»

²³Ghena te ghəa Damas. «Ma meleme ta yɛ Hamat le Arpad ne, nahe hɛ kefate ghena nya ndiremi, shewə hɛ va hawe. Dzembe teke dzembe teke mehele ta nci kala ndərə nya kegaŋkeɓe, kashɛma nza divə.

²⁴Nahe ka Damas kedakenji, tewətelɛwe hɛ zhɛrete geva kezha hwɛ, bare bare yabare bare hɛ va ghazlənə. Benake hɛ ba'a yaka yasa hɛ kala male nya keheha va ya.

²⁵Tsema menete geva ŋkɛ nda wəfəyite geva meleme nya wəba, nya nza nya zlama mbe wa?»

²⁶Wa nya ghena nya geze Mahwətə nde berete nya: «Vatse gɛ, ma vəa ŋkwa shɛ ne, selekə lekə tebete megelɛshia nci te hɛɗi, mɛke tenza sebe te ka sewajɛa nci.

²⁷Katendə ghwə 'ya yitea meleme ta Damas. Katetere ghɛ meghea Bɛn-Hadad ŋkɛ.»

²⁸Ghena te ghəa ka Arab nyi mbe Kɛdar ba'a hɛɗi nyi mbe Hasor nyi hərəte Nabəkodonozor, meghea ka Babilone. Wa nya ghena nya geze Mahwətə nya: «Sate mə te ŋkwa, kwiɗi mə kalə kaɗa Kɛdar! Bezemte mə pɛtɛa wəshia mbeli nyi te ɓerama!

²⁹Fəhwe mə yɛ cɛ lekwesa ta nci ba'a wəshi keseɗa ta nci, wəshi nyi kənəa ghɛa nci ba'a pɛtɛa wəshia nci! Fəhwe mə zlegweməa lɛməa nci, ma pe yɛ sha lewela kənəa hɛ: ‹Ghazlənə ya te yayata ŋkwa.›»

³⁰Wa nya ghena nya geze Mahwətə nya: «Mbeli nyi mbe Hasor, hwɛ ŋayɛ mə kahe kahe! Wəfərə ŋayɛ mə dzeyi kwa yɛ zlera. Kwa nza ŋkɛ ne, nahe Nabəkodonozor, meghea ka Babilone keveyi ghə le gheyɛ, nahe ŋkɛ keveyi zəzə le gheyɛ.»

³¹Ma ke Mahwətə: «Sate mə kalə kaɗa mbeli nyi kegezleŋema ghə nyi, nyi kenewe ghəa nci nyi kambeli nyi kwelɛŋe. Yɛ gelembe ba'a yɛ wəbəzli shɛ te mɛ degha ta nci we, pelɛ ŋwela nzanji hɛ.

³²Katefəhwe yɛ zlegweməa lɛmə le wəshi keseɗa ta nci ka jaga kawəshi nyi hwa mpa. Kwetɛ kwetɛŋe tetaze ka tsehe balɛaha 'ya dzeyi te yayata bela, katekele ndiremi 'ya se te yayata ŋkwa kadzeghəa hɛ.

³³Ma meleme ta Hasor ne, kaŋkwa kewəfərə ta yɛ kelɛ gamba tenza ŋkɛ, kaɓerama nya dɛrɛŋe rɛŋe tenza ŋkɛ kaghala ghala. Wəndə shɛ katenza mbe we, wəndə ŋelɛ shɛ katedzeghwa mbe we. Mahwətə nde gezete.»

³⁴Pa Mahwətə gezeke nda ghena ta ŋkɛ ke nde mɛ ŋkwa Zhɛrɛmi te ghəa Ɛlam te kwa ghate ta va ta Sɛdɛsiyas, meghea ka Zhəwda te meghe.

³⁵Wa nya ghena nya gezete Mahwətə nde berete nya: «'Ya kateɓeɓele rəgia ka Ɛlam nya kaberete ta ŋkɛ.

³⁶Se laka bela kwa gwela ba'a laka bela kwa zeme, laka ŋkwa kesame ta veci ba'a laka ŋkwa kepəkwə ta ŋkɛ ne, 'ya kaghwene sefə wəfaɗe kase kadzeghəa Ɛlam. Kwetɛ kwetɛŋe tetaze ka Ɛlam 'ya laka yayata bela. Hɛɗi shɛ nya ɗema ka Ɛlam nyi ketazemte geva katenza mbe we.

³⁷Katedake ka Ɛlam 'ya kwa kema ta ka jaga ta nci, kwa kema ta mbeli nyi keɗe mte ta nci. Ma mbe ghwə ta hwepe wənəa ɗa ne, kateghwene nda ndiremi 'ya ke hɛ. Kakeka hɛ 'ya le mpa pa te və nya tezamte geva sebe te hɛ. 'Ya Mahwətə nde gezete.

³⁸Pɛtɛ tezamte sebe te meghe ba'a mbeli nyi te ghə mbe Ɛlam kezha ve pasla ta ɗa mbe.» Nya ya kaghena nya geze Mahwətə.

³⁹Ma ke zhɛkwa: «Ama te kwete veci ne, katezhɛne Ɛlam 'ya te ŋkwa ŋkɛ.»