Read KapsikiDC Zhɛrɛmi 51 Bible Online

Zhɛrɛmi 51 - KapsikiDC bible

Zhɛrɛmi 51

¹Wa nya ghena nya geze Mahwətə nya: «'Ya katevɛ sefə nya kempə ŋkwa kadzeghəa yɛ Babilone le mbeli nyi mbe.

²Kateghwene kweci hwelefefi 'ya kezha taze mbeli nyi mbe kala cɛkəvə yitea sefə. Katetaze hɛɗia ŋkɛ hɛ. Ma te vecia ndiremia shɛ ne, dzasle tenza hɛ yite.»

³Ka ɗepe he have, he mə ka jaga nyi nza have va hɛ! Yagha ka jaga tefege le rəbəcia nci! Sərəakɛma megelɛshia ka sewajɛ yɛ teghweme ma! Mpəmte ka sewajɛa ŋkɛ pɛtɛ!

⁴Ɓeɓelayɛ tenza mbeli nyi ɗakɛ zhi hwa hɛɗi te hɛɗia Babilone, selekə lekə tenza mbeli nyi kempə mpə dzeyi kwa yɛ hweŋkwa.

⁵Kwa nza ŋkɛ kwele kwele bezemte nda ghena hɛɗia nci ke Shala ta ka Israyɛl nya tekeleke. Ama kezaghəyite Mahwətə nde berete, Shala ta nci ka Israyɛl ba'a ka Zhəwda we.

⁶Hwɛ mə shave mbe Babilone! Mbele ghəa ŋkɛ yayata wəndə! Ma tsagha ne, katempə yɛ va fete nyi menete ŋkɛ we. Kaganda ne, və kewa ghena ta Mahwətə nya: kateŋki nda wəsə nya kehi ve ŋkɛ.

⁷Kazlerekwe mze kwa tere tere se Babilone mɛa dzeve ta Mahwətə. Hɛɗi lema pɛtɛ yaghwəyimte ŋkɛ. Tɛa ŋkɛ yaghwəyi ghə kweci hɛɗi le, vatse zhɛrenji hɛ kaka gezhia hɛɗi.

⁸Taghanyɛ ne, nahe Babilone keteɗe, nahe ŋkɛ kencencɛhweve geva. Gha mə nehwene kənə, ɗa mə ghwɛ te zhia ŋkɛ, ya kwete katempi nde!

⁹Nahe n'yɛ kedzeghakɛ kambe Babilone, ama kambe ŋkɛ we. Ma tsetse ŋkɛ ne, sərəakɛ ɓəmə ŋkɛ, zhɛre geva yayata wəndə kadzete hɛɗia ŋkɛ. Kaganda ne, kewəba ghena nya te, hwa'a pelɛ ghweme ŋkɛ.

¹⁰Nahe Mahwətə kencɛte tiɗiɗia n'yɛ. Mbi ɓəmə kadzeme Siyon kageze wəsə nya menete Shala Mahwətə ta ɓəmə.

¹¹Nahe Mahwətə kekelete zəzə kaza Babilone. Vatse mtsehe nda berete ŋkɛ ke ka meghea Mɛdi kezha yipə kadzawa. Mahwətə kawa dewa ta ŋkɛ, gheŋkɛ kawa ghena ta ghɛa ŋkɛ. Mɗɛ mə have ta ŋayɛ, viɗi mə gwecɛa ŋayɛ le hɛ.

¹²Mɓe mə drapea mpa ta ŋayɛ le zli nya yitea Babilone. Mtsehe mə ka sewajɛ te yɛ ŋkwa keya ŋkwa, beteyi mə mbeli nyi kenewe ŋkwa mɛa ghweme, wəfərəakɛ mə mbeli te ghweɓe yitea mpa. Kaganda ne, nahe Mahwətə kekelete zəzə ba'a kateyipə wəsə nya gezete ŋkɛ te mbeli nyi mbe Babilone kadzawa.

¹³Babilone, gha nya mɛa hələ nya wəba, gha nya nza mcɛlə nyi nza zləvə te ve, nahe ŋa ŋa gɛ, kwele kwele ŋwaslehwe mbeli na.

¹⁴Ma ke Mahwətə nde berete zemete fela: «Katefə mbeli 'ya kwele kwele kala dzale kase kadzeghəa gha. Kategha geza hɛ kənəa gha.»

¹⁵Nahe Mahwətə kencɛte berete ta ŋkɛ kwa pate hɛɗi ŋkɛ. Nahe ŋkɛ kencɛte ntsehwelea ŋkɛ kwa veyi hɛɗi lema ŋkɛ ba'a nahe ŋkɛ kencɛte ɗepe wəsəa ŋkɛ kwa pelakeyi ghweme ŋkɛ.

¹⁶Ma kegezete ghena ŋkɛ, katsene geva yɛmə pelɛ ghweme, kamene geva ləmbə kwele kwele se te mendɛkwe ta hɛɗi, kamene geva sla ta va kezha me va ba'a kapele geva yɛ sefə shave mbe ŋkwa nyi nza hɛ.

¹⁷Tagha gɛ, pɛtɛ mbeli kagezhi, kaɗema kafate. Pɛtɛa ka vɛsə wəshi shewə va hawe va shala tseŋwəa nci, kwa nza ŋkɛ wəshi nyi keghwete ŋkwa yamenete hɛ: mpi mbe hɛ ya ci'a we.

¹⁸Wəsə shɛ kaketekɛ ŋkwa hɛ le we, deke ŋ'wəshi nde zhɛ ŋkwa va hɛ. Ma te veci nya teme Mahwətə te hɛ ne, rayɛ teza sebe te hɛ.

¹⁹Ama Shala ta ka Israyɛl nya nza zləvə ne, keyipə ŋkɛ le hɛ we. Gheŋkɛ nde pate hɛɗi lema ba'a ŋa ŋkɛ hwelefe ta Israyɛl. «Mahwətə nde berete», sləa ŋkɛ.

²⁰Ma ke Mahwətə: «Babilone, kamartəa ɗa se na, kawəsə kempa ta ɗa. Le gha mpəmte kweci hwelefefi ba'a tazemte yɛ hɛɗia ka meghe 'ya.

²¹Le gha mpəmte yɛ gədəwə le mbeli nyi kezleɗe hɛ, yɛ wəmata gədəwə le mbeli nyi kezleɗe hɛ 'ya.

²²Le gha mpəmte yɛ zhili le mi, yɛ megelɛshi le meha mehɛɗi, yɛ ŋwale tezhili le ŋwalea kwɛ 'ya.

²³Le gha mpəmte ka ya wəshi ba'a wəshia nci, ka wəza ba'a wəshi nyi wəzake hɛ, ka ŋgwamna ba'a ka meha ghwə 'ya.»

²⁴Ma ke Mahwətə: «Katenewe yɛ tsetsenya tsema tsema temene nda wəsə kwa ndiremi nya menete nda ŋkɛ ke Siyon 'ya ke yɛ Babilone le mbeli nyi mbe.»

²⁵Ma ke Mahwətə: «Kabegeme mə le gha Babilone, nya kala ghweme nya kempə ŋkwa, gha nya keza sebe te hɛɗi lema. Katekafe dzeve 'ya kaɗa ŋa, katetsəkwə ŋa 'ya sawa pelɛ keleɓa, katezhɛre ŋa 'ya kala ghwə hwa ghweme.

²⁶Katezhɛne mbeli kateŋ'we pelɛa pelə mbe gha, ya yɛ pelɛa yɛ shihəa ghɛ we. Kaɓerama nya dɛrɛŋe rɛŋe tenza na kaghala ghala.» Nya ya kaghena nya geze Mahwətə.

²⁷Mɓe mə drape te hɛɗi, vɛ mə tereme hwa kweci hwelefefi. Tsene mə hwelefefi yitea Babilone, hekake mə kweci hɛɗia meghe yite: Ararat, Mini ba'a Ashekɛnaz. Ntave mə mbelia jama ta ka sewajɛ kezha tseha mbeli kempa. Ghwene mə yɛ gədəwə kwele kwele kala ləmbəa dzale yitea ghweme kadzeyite kezha ɗa.

²⁸Tsene mə mbeli pɛtɛ yite: ka meghea Mɛde, ka ŋgwamna ta nci, ka meha ghwə ta nci ba'a pɛtɛa hɛɗi nyi sleke hɛ.

²⁹Ntake hɛɗi kagaŋkəɗə, kagaŋkəɗə nde va ghazlənə, kwa yipəyi geva zəzə ta Mahwətə kwa te Babilone: gheŋkɛ zhɛrete hɛɗia Babilone kaɓerama nya dɛrɛŋe rɛŋe, kaŋkwa nya ɗema mbeli mbe.

³⁰Nahe ka katsala ka sewajɛa Babilone kesərəakɛ mpa, nahe hɛ kewəfərənji dzeyi mbe yɛ ŋkwa. Nahe ghyana ta nci kekiɗi, nahe hɛ kezhɛrenji kaka dewə berete. Dəvə ghwə yitea ghɛa nci hɛmɗɛke gelembe nyi mɛa meleme.

³¹Ma ka ghwene nyi kelə le ghena shɛ ne, kweracɛ hɛ le hwɛ kwa zəɗə kalə kageze nda ke meghea ka Babilone nahe meleme ta ŋkɛ kekelehwe geva,

³²Nahe yɛ hweŋkwa kefɛa geva, nahe yɛ zli keteremte geva, kwetɛ kwetɛŋe mehele ta sewajɛ.

³³Wa nya ghena ta Mahwətə nde berete, Shala ta ka Israyɛl nya: «Kala lane nya hite mbeli kezha leke ha Babilone. Takwa və kemene wəshi se te wəve kaŋa Babilone.»

³⁴«Nahe Nabəkodonozor, meghea ka Babilone kempeɗehwe ɗa pɛtɛ, keneghamte ɗa kala kwaneɗafa nya ɗema wəsə kwa. Nahe ŋkɛ kendahwe ɗa kala mɓɛa, pa ŋkɛ behekɛ hwəa ŋkɛ le ɗəɗəa ɗa, kwa sebe ta ŋkɛ, pa vənəhwəke ɗa.

³⁵Ma ke mbeli nyi mbe Zhɛrəzalɛm: Babilone nde keleke ɓəmə yɛ yaka ba'a yɛ ndiremi. Nza ŋkɛ tsagha le ŋa ŋkɛ perə! Ma ke mbeli nyi mbe Siyon: Babilone nde shekakɛ mimia ɓəmə. Nza ŋkɛ tsagha le ŋa ŋkɛ perə!»

³⁶Wa nya ghena nya geze Mahwətə nya te ghəa Zhɛrəzalɛm: «'Ya nde teya ŋa le ghəa ɗa, katewa ŋa dewa 'ya. Kateshifə hələa Babilone ba'a katehase yɛ ɗaslea ŋkɛ 'ya.

³⁷Katezhɛre meleme nya 'ya kakwəfi, kaŋkwa kenza ta yɛ kelɛ gamba, kameleme nya ɗema mbeli mbe, nya ve nda taze ta mehele ba'a ghazlənə ke mbeli.

³⁸Tsetsenya gɛ ne, kala nivɛrə nyi keghwəghwə, kala ŋwalea nivɛrə nyi kembərə mbərə mbeli nyi mbe.

³⁹Ma kwa zhɛte nda mawe ke hɛ ne, pa 'ya menete nda wəsə kezeme ke hɛ. Katesa nda wəsə kesa 'ya ke hɛ nda teghwəyi hɛ kadzeyitea hɛ hɛ kaghala ghala, kaɗema kafeɗeghe. 'Ya Mahwətə nde gezete.

⁴⁰Katefə hɛ 'ya kadzete ŋkwa kempə ŋkwa kala yɛ zhɛgwəa lɛmə, gamea lɛmə keɗema zhɛfa lɛmə.»

⁴¹Tsema kelehwe geva Shɛshak, meleme nya nza nya zləvə te te hɛɗi lema wa? Tsema zhɛrenyɛ Babilone kaɓerama nya dɛrɛŋe rɛŋe hwa kweci hɛɗi wa?

⁴²Nahe ndərə kehwɛame geva mbe Babilone, nahe yɛ gaŋkeɓe ta ŋkɛ kezhiɓəyi geva kənə.

⁴³Keghwele ghwele meleme nyi mbe, kehase hase hɛɗia ŋkɛ kala ɓerama, kaŋkwa nya ɗema mbeli te, kaŋkwa nya ɗema mbeli kadzeghwa te.

⁴⁴Ma ke Mahwətə: «'Ya kateɗa Bɛl, shala ta Babilone. 'Ya katekelehwe wəsə nya zeme nya ŋkɛ same kwa mɛa ŋkɛ. Mba mbeli katelə shɛ kwele kwele we. Nahe zlia Babilone keŋzlanyɛ ghwəpə.»

⁴⁵Gheyɛ mbelia ɗa, shave mə mbe, mbele ghəa ŋkɛ yayata wəndə va ghwə ta hwepe wənəa ɗa.

⁴⁶Nzama yɛ benake ma! Ghazlənəma yɛ va ghena nyi kegeze geva te hɛɗi ma. Te kwete va, kwete wəsə yageze mbeli, tekeleke nya geze mbeli te kwete: berete nde mene geva te hɛɗi, nde ghwərə ghwərəa ntsə nde ŋka kwete.

⁴⁷Temə ɓɛhwɛ ne, kateme 'ya te yɛ shala tseŋwəa ka Babilone. Hawe nde tenza te hɛɗi pɛtɛ. Selekə lekə tenza mbeli nyi kempə mpə dzeyi mbe meleme.

⁴⁸Ma mbeli nyi ketetaze hɛ ne, sawa laka bela kwa gwela tesawa hɛ. Ta gɛ, kategha geza yɛ ghweme, hɛɗi le pɛtɛa wəshi nyi te hɛ kənəa Babilone. Nya ya kaghena nya geze Mahwətə.

⁴⁹Ma ke nde mɛ ŋkwa: «Kwele kwele mbeli nyi mpəmte Babilone te hɛɗi lema. Vəa ŋkɛ nya kezha mte tewəmbəreke ka Israyɛl nyi mpəmte ŋkɛ perə.

⁵⁰Gheyɛ mbeli nyi kembele ŋayɛ va kafayɛ ne, kwiɗi mə! Nzama yɛ teke ma! Mbe nza ta ŋayɛ cakeɗake ne, zəzə mə Mahwətə ba'a nza Zhɛrəzalɛm mbe mehele ta ŋayɛ.»

⁵¹Ma ke hɛ zhɛnete: «Kazlama n'yɛ kwa fate ŋele nya te ghen'yɛ n'yɛ we. Shewə ghen'yɛ va hawe kwa dzembenji kweci hwelefefi mbe ŋkwa nya keveyi geva tekeleke kaŋa Mahwətə.»

⁵²Ma ke Mahwətə: «Vatse gɛ, kateme 'ya kənəa yɛ shala tseŋwəa Babilone te kwete hɛ. Katefa nehwene ta mbeli nyi ɗakɛ zhi mbeli te hɛɗia ŋkɛ pɛtɛ.

⁵³Ya Babilone nza wərə kadzemenyɛ pelɛ ghweme, ya gheŋkɛ nzanyɛ kwetere wəmbəa zli nya biya ne, katentsehe mbeli nyi keteŋzla shɛ kegezete 'ya.»

⁵⁴Ma ke nde mɛ ŋkwa: «Fa mə: lewela yafa mbeli shave mbe Babilone, lewela va ndiremi nya kentsehe te hɛɗia ŋkɛ.

⁵⁵Mahwətə nde ŋzla melemea shɛ, katefɛa lewela ta ŋkɛ nya wəba shɛ ŋkɛ. Kala gaŋkeɓe ta ndərə gaka ka jaga. Kala berazlɛ ta va gaka hɛ.

⁵⁶Wəndə nya keteŋzla kahende nda geva, kateɗa Babilone ŋkɛ. Katefəhwe ka katsala nyi keɗepe mpa za ma ba'a katehwəshi yɛ rəgia nci ŋkɛ. Kwa nza ŋkɛ Mahwətə ya kaShala nya keɗepe wa dewa ba'a ve nda wəsə nya kehi ke yayata wəndə.

⁵⁷'Ya kateghwəyi mbeli nyi te ghəa ŋkɛ, ka ntsehwele ntsehwelea ŋkɛ, ka ŋgwamna ta ŋkɛ, ka meha ghwə ta ŋkɛ ba'a ka katsala kɛfia ŋkɛ. Katedzeyitea hɛnji hɛ kaghala ghala, mba hɛ katefeɗeghe we.» Nya ya kaghena nya geze Meghe nya nza sləa ŋkɛ KaMahwətə nde berete.

⁵⁸Wa nya ghena nya geze ŋkɛ nya zhɛkwa: «Ghwəpə zli nya bezle yitea Babilone keŋzla, hɛmɗɛke gelembe nyi bebiya bebiya mɛ keterenji. Gəmə leɓe ghəa nci mbeli, kaŋa ghwə yaka ta mbeli!»

⁵⁹Ghena nya gezave nda nde mɛ ŋkwa Zhɛrɛmi ke Seraya, wəzege ta Nɛriya, shia Masɛya kwa dzawa Babilone hɛ le Sɛdɛsiyas, meghea ka Zhəwda, te kwa wəfaɗe ta va ta ŋkɛ mbe meghe. Kawəndə nya te ghəa wəshi se Seraya.

⁶⁰Mbe palepa nya kwetɛŋe rafeyi ndiremi nyi ketese pɛtɛ kadzete Babilone ŋkɛ: pɛtɛa ghena shɛhɛ kerafete geva te ghəa Babilone.

⁶¹Ma ke Zhɛrɛmi sha Seraya: «Ma vəa ŋkwa nya tentsehe na mbe Babilone ne, pɛtɛ na jaŋgate ghena nyi le berete,

⁶²ma pa na sha tegeze: ‹Mahwətə, gha le ghəa ŋa nde zlapete ŋzla ta Babilone, mba wəshi nyi nza mpi hwe katenza mbe, ya wəndə ŋelɛ, ya wəshi keseɗa we. Kaɓerama nya dɛrɛŋe rɛŋe tezhɛre ŋkɛ kaghala ghala.›

⁶³Ma nahe kekiɗi jaŋga ta palepa kwa peɗe peɗe shɛ na ne, pa na hwepate pelɛ te kezha negha kadzawa hələa Efrate.

⁶⁴Ma pa na sha tegeze: ‹Tsetse teza sebe te Babilone. Mba ŋkɛ katesate ŋkɛ te ŋkwa kwa sebe ta ndiremi nyi vaghe nyi Mahwətə kənə we.›» «Gəmə leɓe ghəa nci kweci hwelefefi.» Teke kiɗi ta ghena ta Zhɛrɛmi.