Read KapsikiDC Zhɛrɛmi 6 Bible Online

Zhɛrɛmi 6 - KapsikiDC bible

Zhɛrɛmi 6

¹Hwɛ mə shave mbe Zhɛrəzalɛm, gheyɛ ka Bɛnjamɛn! Zele mə ŋkwa kewəfərə te kwete ŋkwa. Vɛ mə tereme mbe Tɛkowa, mɓete mə drape pelɛ Bɛt-Kɛrɛm, kwa nza ŋkɛ ndiremi, ɗa nya wəba nde wəmbə ŋayɛ se laka bela kwa gwela.

²Wa nya Zhɛrəzalɛm nya katebeze geva, meleme nya ndeɗe ba'a nya mawe mbeli!

³Wa nyi kase kadzembe kala ka ya wəshi le wəshi keseɗa ta nci. Dzasle hɛ mɓemɓeyi yɛ cɛ lekwesa ta nci dzeyi yite. Yayata wəndə kazeme nda gwəzə ke wəshia ŋkɛ te wəvea ŋkɛ.

⁴Ma ke hɛ sha lewela: «Hite mə geva kezha mpa le! Have nda ɓəmə mpa kwa ghə veci! Awema! Pəkwə yapəkwə veci, bebiyake yɛ shenaŋkwe ta tɛhwɛɗi.

⁵Ɗate ɓəmə te tepe ta viɗi, mpəmte ɓəmə ghɛa ŋkɛ nyi ganji ganji!»

⁶Wa nya ghena nya geze Mahwətə nde berete nya: «Mpəave mə wəfe kezha pate dzeyi yite Zhɛrəzalɛm.» Meleme nya hi mbeli kaɗa, deke mene slene berete ya mbe.

⁷Kala nya hwɛ yɛmə same kwa ɗasle hwɛ wəsə kwa ndiremi dzeyi mbe. Nda slene berete le sa nda yaka ke mbeli ka mene geva mbe, ɗa ŋkwa le zhi ba'a sa nda yaka ke mbeli yanewe ntsə ta ɗa keveci keveci.

⁸«Keseve mehele Zhɛrəzalɛm, ma keɗema ŋkɛ tsagha ne, katenehe geva 'ya le gha ba'a katezhɛre ŋa 'ya kaɓerama, kahɛɗi nya ɗema wəndə kanzate nza te.»

⁹Wa nya ghena nya geze Mahwətə nde berete nya: «Fəhwe mə ka Israyɛl nyi ketene teghweme pɛtɛ, kala nya fə ya ta rɛzɛŋe mbeli shave mbe wəve. Hehaghe mə dzeve kadzete yɛ dzeve ta rɛzɛŋe kala nya mene wəndə ke wəve!»

¹⁰Ke wa tegeze nda ghena 'ya wa? Wa wəndə nya ketefate ɗa ghena wa? Kezhiɓə zhiɓə sleme ta nci, kashɛ hɛ cɛkəvə ghena we. Kala ŋele fa ghena ta Shala hɛ, mba kaɗe hɛ we.

¹¹Ma 'ya ne, viɗi 'ya va hwepe wənəa Mahwətə, mba 'ya kazereghete we. «Vate te ŋwale nyi dzeyi kwa hweŋkwa ba'a te wəvəsəa ka mempɛhwetati. Ma yɛ zhili le mi, mbeli nyi kentsə ntsə le nyi kehalenji hwerejɛme ne, pɛtɛ tekese hɛ mbeli.

¹²Kaŋa kweci mbeli tenza yɛ ghɛa nci, yɛ wəvea nci ba'a mia nci. 'Ya kateɗa mbeli nyi te hɛɗi», wa'a ke Mahwətə.

¹³Kwa nza ŋkɛ, se te ŋwale hwa'a te mbelia jama ne, pɛtɛ hɛ kaka ɗe ghəa nci. Se te ka mɛ ŋkwa hwa'a te ka dzeghe Shala ne, pɛtɛ hɛ kaka mbəɗəkwə.

¹⁴Kaɓela ndiremi nya te mbelia ɗa hɛ we, Kwelɛŋe ya shɛ, kwelɛŋe ya shɛ!, ke hɛ, ndagwara ndiremi ya shɛ.

¹⁵Kese hawe kazhɛ nda ke hɛ va wəshi nyi ndiremi ndiremi kashasha nyi menete nyi hɛ tse na? Ya ɓɛhwɛnyɛ! Keɗepete fete ta nci hɛ we. Vatse tebete kadzete hɛɗi kala kweci mbeli, selekə lekə tenza hɛ te hɛɗi vəa ŋkwa nya teɗa hɛ 'ya, wa'a ke Mahwətə.

¹⁶Wa nya ghena nya geze Mahwətə nya: «Ghereŋete mə geva kwa hweŋkwa kezha newe ŋkwa, 'yɛwete mə ghena te hweŋkwa ta ŋayɛ nyi vəashi. Tema hweŋkwa ta zeɗe nza wa? Zelete mə, nda nza yɛ kanza kwelɛŋe. Ama ma ke hɛ: ‹Kazele nyagha ghen'yɛ hweŋkwa we.›

¹⁷Nahe 'ya keveyi mbeli mɛa ghweme kaya ŋayɛ. Ntsehwele mə kefate vɛ ta tereme yɛ! Ama ‹katsewe va ghen'yɛ we›, ke hɛ.

¹⁸Ma gheyɛ kweci hwelefefi gɛ, fate mə! Ɗepete wəsə nya ketemene nda geva ke hɛ mbeli pɛtɛ.

¹⁹Mbeli nyi te hɛɗi lema pɛtɛ, fate mə: 'Ya katekele ndiremi kase kadzete mbeli nyi kazhɛme ta wəshi nyi ndiremi ndiremia nci. Kese hɛ kave mehele te yɛ ghena ta ɗa we, tereke hɛ betakɛ wəshi nyi tekave nda 'ya ke hɛ.

²⁰Wa yamene ɗa 'wərdə kwa hə hə nyi fəke yɛ se mbe Saba le gwəzə nya kezəŋwə kala 'wərdə nya kese te hɛɗi nya cakeɗa wa? Kaɗe melɛ kwa tere terea ŋayɛ 'ya we, zeɗehwe ɗa wəshi melɛa ŋayɛ we.

²¹Wa nya ghena nya geze Mahwətə nya gɛ: 'Ya kave tehene te kema ta mbelia shɛhɛ kezha tsa hɛ: kanya kwetɛŋe tempə yɛ yita le wəzege, yɛ ka ghedəkwə le ka mcɛhɛ.»

²²Wa nya ghena nya geze Mahwətə nya: «Kweci mbeli kasawa laka bela kwa gwela, hwelefe nya wəba kwa hweŋkwa kase te mendɛkwe ta hɛɗi.

²³Yɛ gwecɛ le megha ya yitea dzeve va hɛ, 'yaghwake mehele ta nci ba'a kazhɛ heli hɛ yitea wəndə we, kala gaka ta ndərə gaka hɛ. Pelɛ gədəwə hɛ ba'a nahe hɛ kepate geva megela kezha mpa le gha, Zhɛrəzalɛm.»

²⁴«Ma kwa fate ghena shɛ ghen'yɛ ne, benake ghen'yɛ, kwetɛ kwetɛŋe mehele ta n'yɛ kala male nya keheha va ya.

²⁵Mba yɛ kedzemte, mba yɛ kedzawa hweŋkwa, kwa nza ŋkɛ tagha ka jaga kampə ŋkwa. Ghazlənə ya shɛ te yayata ŋkwa.»

²⁶«Gheyɛ hwelefe ta ɗa, hwepahwe mə wəsə hwa hwə, devələ mə geva hwa keləwə, nehwene mə kala wəsə nya mene mbeli yitea wəzege kwetɛ, nehwene mə nehwene kwa pesle ghə, kwa nza ŋkɛ vəkə tedzeghəa gha nde mpə ŋkwa.»

²⁷«Zhɛrɛmi, 'ya veyi ŋa kande newe ŋkwa hwa mbelia ɗa, kezha dzeghe nza ta nci na. Gha nde tenewe ba'a tedzeghe dzeghwa ta nci.»

²⁸Pɛtɛ hɛ kaka fama ghena ba'a kaka ŋwashɛ ŋwashɛ, kala mze kwa tɛawetɛa keɗema kala lɛ ntɛaŋentɛa nci. Pɛtɛ hɛ kaka beze beze.

²⁹Ma katsa vɛsə nde gezla wəshi mbe gezla ne, nahe ŋkɛ kehi karɛɗɛ reɗa ta lɛ va ghwə. Ama gəmə leɓe ghəa ŋkɛ nde vɛsə mze: kaslə wale wale te we.

³⁰“Kamze kwa ghwə ghwə nya ɗema zləvə te”, heka hɛ mbeli, kwa ɓelama hɛ Mahwətə.