Read KapsikiDC Zhɛrɛmi 7 Bible Online

Zhɛrɛmi 7 - KapsikiDC bible

Zhɛrɛmi 7

¹Ghena nya gezete nda Mahwətə ke Zhɛrɛmi:

²Ghereŋe ŋa kwelɛ mɛ degha ta ghɛa Mahwətə kezha zlape ghena nya: Gheyɛ ka Zhəwda nyi kedzeki kwa mɛ degha nya pɛtɛ kezha gwəɗəŋə kwa kema ta Mahwətə, fate mə ghena ta Mahwətə.

³Wa nya ghena nya geze Mahwətə nde berete, Shala ta ka Israyɛl nya: Hite mə hweŋkwa ta ŋayɛ ba'a mene mə slene kala nya kehi. Ma tsagha ne, katesərə ŋayɛ 'ya kanza te hɛɗi nya.

⁴Mba yɛ keve mehele ta ŋayɛ te ghena tseŋwə nyi kegeze: Nya ya kaghɛa Mahwətə, nya ya kaghɛa Mahwətə, nya ya kaghɛa Mahwətə, ke hɛ.

⁵Hite mə hweŋkwa ta ŋayɛ ba'a mene mə slene kala nya kehi: neghate mə fete tiɗiɗi kwelɛ mbeli nyi te ghwə,

⁶mba yɛ keŋwasle ka se se, ka mezhɛtiti keɗema ka wedidi, mba yɛ kempə mbeli nyi kemenetema fete te ŋkwa nya. Mba yɛ kehwɛ kwa sebe ta kweci shala nyi keve ndiremi kadzete gheyɛ.

⁷Ma tsagha, katesərə ŋayɛ 'ya kanza teke te hɛɗi nya ndeke nda nya 'ya ke ka shihɛ ŋayɛ vəashi ba'a kaghala ghala.

⁸Ama pa yɛ vate ghə te ghena tseŋwə nyi ɗema deme te.

⁹Tsema nza yɛ kaghərə, kampə ŋkwa, kavale tahe, kazeme fela tseŋwə, kadzeghe nda melɛ ke Ba'al, kahwɛ kwa sebe ta kweci shala nyi ɗepema yɛ,

¹⁰kwa sebe ta ŋkɛ, kase yɛ kadzawa kema ta ɗa ki ghɛ nya keveyi ɗa geva tekeleke, kageze: Nahe ghen'yɛ kembele!, pe yɛ, zhɛne, ntake yɛ kamene wəshi nyi ɗema ghə te wa?

¹¹Gheyɛ ɗe kazhɛrete ghɛ nya keveyi ɗa geva nya tekeleke kazlera ta ka ghərəa kɛfi na? 'Ya le ŋa ɗa ne, tsagha newe 'ya, wa'a ke Mahwətə.

¹²«Kwiɗi mə kadzete ŋkwa nya keveyi ɗa geva tekeleke mbe Silo, nya se ghɛa ɗa mbe vəashi, neweve mə tsema tsema menete nda 'ya va 'yaghwa mehele ta ka Israyɛl, mbelia ɗa.»

¹³Ma ke Mahwətə: «Ma tsetsenya kwa menete wəshi nyi yɛ pɛtɛ, kwa se 'ya leɓakwe va geze ŋayɛ shaŋe yɛ kafa. Kwa se 'ya kaheka ŋayɛ kaɗema yɛ kese kazhɛne gɛ,

¹⁴ma ghɛa ɗa nya keveyi geva nya tekeleke, nya vate ghə nya yɛ te, ŋkwa nya ndeke nda nya 'ya ke ka shihɛ ŋayɛ ba'a ke gheyɛ ne, katemene nda 'ya kala nya menete nda 'ya ke Silo.

¹⁵Cakeɗake le 'ya tebete ŋayɛ 'ya, kala nya betakɛ hwelefe ta Ɛfrayim, ka menəhɛ ŋayɛ 'ya.»

¹⁶Gha Zhɛrɛmi, səkwəma ghə na kezha mbeli nyi ma, mpi ɗa ma dzeve na kezha hɛ ma, leɓema ghəa ŋa na ma, kwa nza ŋkɛ katefa 'ya we.

¹⁷Ashɛ na kanewe wəshi nyi mene hɛ mbe yɛ meleme ta ka Zhəwda ba'a dzeyi kwa hweŋkwa nyi mbe Zhɛrəzalɛm wəka?

¹⁸Kapa sheghwə ŋwale, kameha ghwə ka yitehɛ nci, kahwaɗe hə mi kezha ta nda gatewe ke Meghe nya kamale pelɛ ghweme[1]. Wənəa ɗa yabeze ɗa hɛ kwa ɓasle nda tɛ hɛ ke kweci shala.

¹⁹Ma ke Mahwətə: «Ke 'ya menete ɗa fete hɛ na? Ewə, ke ghəa nci, kahawe nya te hɛ ŋkɛ.»

²⁰Vatse gɛ, wa nya ghena nya geze Shala Mahwətə nya: «Kateve ghwə ta hwepe wənəa ɗa 'ya kənəa meleme nya, kənəa yɛ mbeli le wəshi keseɗa, kənəa yɛ wəfe nyi hwa gamba le wəshi kwa wəza wəza. Kala ghwə nya keɗema kamte tenza hwepe ta wənəa shɛ.»

²¹Wa nya ghena nya geze Mahwətə nde berete, Shala ta ka Israyɛl nya: «Jikəaghe mə yɛ melɛ kwa tere tere ta ŋayɛ kənəa kweci melɛa ŋayɛ, zehwe mə slia nci.

²²Ma kwa fəakave ka shihɛ ŋayɛ 'ya shave mbe Ɛzhipte ne, kese 'ya kageze nda kwete ghena ke hɛ we, kese 'ya ka'yɛwe melɛ kwa tere tere keɗema kweci melɛ va hɛ we.

²³Ama wa nya ghena nya gezave nda 'ya ke hɛ nya: Fate mə ghena ta ɗa kezha nza 'ya kaShala ta ŋayɛ ba'a kezha nza yɛ kambelia ɗa. Zelete mə hweŋkwa nya ncɛ ŋayɛ 'ya megela, yitea nza yɛ mbe zeɗe nza.

²⁴Ama kese hɛ kafa we, kese hɛ kave sleme yite we, pa hɛ menete kwalɛ zəzə nyi ndiremia nci, pa hɛ zhɛrave ɗa wəmbə kaɗema zhɛre ɗa kema.

²⁵Ma ghala shave ka shihɛ ŋayɛ mbe Ɛzhipte pa ɓeshi ne, kenza ɗa 'ya keghwene ŋayɛ ka mene slene ta ɗa nyi kaka mɛ ŋkwa keveci keveci we.

²⁶Ama kese yɛ kafa ɗa ghena we, kese yɛ kave sleme yite we, ntɛaŋe ntɛaŋe ghə te gheyɛ, za ma 'yaghwa mehele ta ŋayɛ ke ŋa ka shihɛ ŋayɛ.»

²⁷Gha Zhɛrɛmi, pɛtɛ tegeze nda ghena nyi na ke hɛ, ama katefa hɛ we. Kateheka hɛ na, ama katezhɛne ŋa hɛ we.

²⁸Ma pa na sha hɛ gɛ: «Hwelefe ta ka fama ghena ta Shala Mahwətə ta nci ba'a ka ɗema ghena nyi gezeke ŋkɛ gheyɛ. Mba kaganda kwa mɛa ŋayɛ we, nahe ŋkɛ kezamte geva mbe mehele ta ŋayɛ.»

²⁹Ma ke Mahwətə: «Ka Zhəwda, ŋsəmte mə wəvea nyi keveyi ŋayɛ tekeleke shɛ yɛ betakɛ. Ŋgaɗe mə ghə pelɛ ghəa wəmbə nyi dɛrɛŋe rɛŋe. Hwelefe nya kehwepete ɗa wənəa ɗa yɛ, Kazhɛne 'ya kaɗe ŋayɛ we, 'ya kanegha ŋayɛ.»

³⁰Ma ke Mahwətə: «Nahe ka Zhəwda kemenete wəsə nya ɗema 'ya, Nahe hɛ beteyi wəshi nyi ndiremi ndiremi kashasha nyi feɗete hɛ ki ghɛa ɗa nya keveyi geva tekeleke, kazhɛremte wale wale.

³¹Kwa zlərəa Hinom ne, nahe hɛ kehite ŋkwa kedzeghe melɛ nya heka mbeli kaTofɛt, kezha tere ŋwale tezhilia nci ba'a ŋwale kwɛ kamelɛ. Ndagwara kegha 'ya ka'yɛwe nyagha wəsə va hɛ we, kegha kanza mbe zəzə ta ɗa tɛape we.»

³²Vatse geze Mahwətə: «Katese kwete və nya ɗema mbeli kateheka ŋkwa nya ‹kaTofɛt› keɗema ‹kazlərəa Hinom›, ama ‹kazlərə kempə ŋkwa›. Kwagha tela mbeli nyi kempə mbeli, kwa ɗema ŋkwa shɛ te kwete ŋkwa.

³³Ma mbeli kempə mpəa mbeli nyighɛ ne, yɛ zleŋa le yɛ kelɛ gamba ka tezeme hɛ, wəndə shɛ kateŋka hɛ kənəa hɛ we.

³⁴Ma mbe yɛ meleme ta Zhəwda ba'a dzeyi kwa hweŋkwa nyi mbe Zhɛrəzalɛm ne, katefɛamte yɛ zlewezla nyi hwa gəsəkə, yɛ cimə zlama ba'a yɛ ciməa makwa 'ya, kwa nza ŋkɛ kakwəfi tenza hɛɗia shɛ.»