Read KapsikiDC Zhɛrɛmi 8 Bible Online

Zhɛrɛmi 8 - KapsikiDC bible

Zhɛrɛmi 8

¹Ma ke Mahwətə: «Ma vəa ŋkwa shɛ ne, katefə 'yɛ'yɛa ka meghea kɛfi, ŋa mbelia jama ta ka Zhəwda, ŋa ka dzeghe Shala, ŋa ka mɛ ŋkwa le ŋa ka Zhɛrəzalɛm mbeli same kwa kwele.

²Katebete hɛ mbeli yitea veci, tere ba'a saseregwa nyi pelɛ ghweme nyi se hɛ kaɗe, kahawe va hɛ, kazele hɛ, ka'yɛwe ghena va hɛ ba'a kagwəɗəŋə kwa kema ta nci. Katezhɛne mbeli katsene 'yɛ'yɛa shɛhɛ kezha zhɛneyi kwa kwele we, ama katezhɛre hɛ kadədə nya te hɛɗi.

³Megela ma mte ke nza teghweme sha ka 'yaghwa mehele nyi ketetene te yayata ŋkwa nya tazeyi hɛ 'ya», wa'a ke Mahwətə nde berete.

⁴«Ma tegeze nda na ke hɛ: Wa nya ghena nya geze Mahwətə nya: Ma keteɗe wəndə ne, ashɛ kasate te ŋkwa wəka? Ma kezave nda za hweŋkwa ke wəndə ne, kazhɛne geva ŋkɛ te sebe wəka?

⁵Wa raberə nda nza ka Zhɛrəzalɛm, nyi kezamte hweŋkwa dɛŋe dɛŋe te fama ghena ta nci wa? Mba hɛ kaɗema nehe le shala tseŋwəa nci, kaɗe hɛ kazhɛne geva kase we.

⁶Nahe 'ya keveyite sleme megela yitea ghena ta nci: ghena ganji ghena nyi geze hɛ we. Wəndə shɛ kazəzə te wəsə kwa ndiremi nya menete ŋkɛ we. Wəndə shɛ ka'yɛwe: ‹Wa nya wəsə nya menete nya 'ya wa?›, ke we. Yayata wəndə kahwɛ hwɛ ta ŋkɛ, kala gədəwə nya kezləgwə ghə kwamte mpa.

⁷Ya kwaghela nya yitea ghweme ne, nahe nde keɗepe və kedzeghwa ta ŋkɛ. Nahe yɛ gheɗepe, ndɛhwepɛ ba'a 'yara keɗepe və kezhɛne geva ta nci. Ama mbelia ɗa ne, keɗepe ghena nyi geze Mahwətə hɛ we.»

⁸Ma pe yɛ: «Kentsehwele ntsehwele ghen'yɛ, kwa nza ŋkɛ va ghen'yɛ wəsə mahalegəa Mahwətə.» Tsema shɛ yɛ geze kala nya wa? Kwa nza ŋkɛ nahe ka rafe wəshi mahalegə nyi kaka tseŋwə kezhɛremte ghena nyi mbe?

⁹Hawe ya te ka ntsehwele ntsehwele. Kwetɛ kwetɛŋe mehele ta nci va ghazlənə, nahe keleŋa kekesehwe hɛ. Ma kwa ɓelama ghena ta Mahwətə hɛ ne, wa kemane nya kemanakɛ hɛ ntsehwelea nci tse gɛ?

¹⁰Ma ke Mahwətə: «Vatse tefə nda mia nci 'ya ke kweci mbeli, yɛ wəvea nci ke mbeli nyi ketefə hɛ. Kwa nza ŋkɛ, se te ŋwalea fəshi hwa'a te mbelia jama ne, ghəa nci yaɗe hɛ. Se te ka mɛ ŋkwa hwa'a te ka dzeghe Shala ne, pɛtɛ hɛ kaka mbəɗəkwə.

¹¹Kaɓela zhi nyi te mbelia ɗa hɛ we, ‹Kwelɛŋe ya shɛ, kwelɛŋe ya shɛ› ke hɛ, ndagwara ndiremi ya shɛ.

¹²Kazhɛ nda hawe ke hɛ va wəshi nyi ndiremi ndiremi kashasha nyi menete nyi hɛ tse na? Ya ɓɛhwɛ! Keɗepete fete ta nci hɛ we. Vatse gɛ, katebete hɛ zlaɓe le kweci mbeli, selekə lekə tenza hɛ te hɛɗi te və nya temeha ghwə 'ya te hɛ.»

¹³Ma ke Mahwətə: «Nahe 'ya kezəzəte kaza sebe te hɛ, kala yɛ wəfe ta rɛzɛŋe le dasekwa nyi keɗema kaya. Pa le sleke nci ketiwɛɗinji. Katefə nda hɛ 'ya ke mbeli nyi keteŋkeɗe hɛ.»

¹⁴Ma ke hɛ: «Yitea wa nza gheɓəmə didivə wa? Tsenete ɓəmə geva, dzembe ɓəmə meleme nyi nza zli yite kaneghe mte ta ɓəmə. Kwa nza ŋkɛ ne, kafɛa ɓəmə Shala Mahwətə ta ɓəmə kegaŋkəɗə, yɛmə nya nza wəsəa kwamasa hwe yasahwe ɓəmə ŋkɛ, kwa nza mə kaka beze nda ghena ke Mahwətə.

¹⁵Kwelɛŋe yaneghe mə, ama wəsə ganyɛ shɛ kase we, vəa mbe ta ɓəmə yaneghe mə, ama ghazlənə nde se.

¹⁶Se te hɛɗia Dan ne, kafefa gafe ta yɛ gədəwəa nde jaga mbeli. Ma kwa tsa yɛyi yɛ gədəwəa ŋkɛ le berete ne, pɛtɛ hɛɗi kagaŋkəɗə. Se yase hɛ kazeme hɛɗi le wəshi nyi te pɛtɛ, yɛ meleme le mbeli nyi mbe.»

¹⁷Ma ke Mahwətə: «'Ya kateghwene ŋayɛ shishi nyi ghyana ghyana. Wəsə shɛ kafɛake hɛ kehale ŋayɛ we, katehale ŋayɛ hɛ.»

¹⁸Ma ke Zhɛrɛmi: «Ghwɛ shɛ kambete ɗa va taze ta mehele ta ɗa we. Pɛtɛ geva ta ɗa kemte mte.

¹⁹Kafefa lewela ta mbelia ɗa mbeli se te hɛɗi nya cakeɗa. ‹Ashɛ mbe Siyon Mahwətə wəka? Mba meghea ŋkɛ mbe wəka?›» Ma ke Mahwətə zhɛnete: «Wa raberə bezemte ɗa wənə hɛ le hawe va yɛ shala tseŋwə nyi kese te kweci hɛɗi wa?»

²⁰Nahe vəa mene wəshi se te wəve, takwa takwa cimə kakiɗi, kenaka n'yɛ kakemave mbele we.

²¹Va zhi nya te mbelia ɗa ne, kwetɛ kwetɛŋe mehele ta ɗa. Teheɗe kema va 'ya, benake 'ya va ghazlənə.

²²Ghwɛ kempi zhi shɛ mbe Gala'ad wəka? Dakwəterə shɛ mbe wəka? Wa raberə ɗema zhia mbelia ɗa kempi wa?

²³Amaga! Ma nda kala ghwa ghəa ɗa, kala ɗasle nya mbe ntsə ta ɗa ne, nza wərə 'ya kanehwene mbelia ɗa nyi kempə veci le viɗi!