Read KapsikiDC Yɛ Ŋgaɗe ghə 1 Bible Online

Yɛ Ŋgaɗe ghə 1 - KapsikiDC bible

Yɛ Ŋgaɗe ghə 1

¹Amaga! Nahe nde kenza kewəfə wəfə, meleme nya se nya mbeli kwele kwele mbe gɛ wa! Nahe nde kenza kala wede, ghenta nya kese wəbake hwa pɛtɛa hwelefefi. Ma ghenta nya kawəzha ta meghe hwa yɛ sla ta hɛɗi ne, wa nya nde kakwatera gɛ!

²Kanehwene nde hwencɛke ncɛke, nahe kema ta nta kenza bətə mbe nehwene. Ma hwa pɛtɛa ka meghwateshia ŋkɛ ne, wəndə shɛ kezha gweɗakwe ŋkɛ we. Nahe pɛtɛa ka mcɛhɛ nta kewəfəyite ŋkɛ, nahe hɛ kezhɛrenji kaka ghema ta nta.

³Nahe pɛtɛa ka Zhəwda kefəhwe geva, yaka yasa hɛ va dzawea slene mava. Nahe hɛ kenza hwa kweci hwelefefi, ama kekemave ŋkwa kenza hɛ we. Nahe ka keka hɛ kefiyi hɛ kwelɛ ŋkwa.

⁴Nehwene ya te yɛ hweŋkwa ta Siyon, wəndə shɛ kazhɛne kase yitea yɛ gəsəkə we, shaka shaka yɛ ŋkwa kebeke ta ŋkɛ. Kaŋələvə ka dzeghe Shala nyi mbe, keyirə yirə ŋwalea kwɛa ŋkɛ. Nahe Siyon le ghəa ŋkɛ kenza mbe ndiremi.

⁵Nahe ka ghema ta ŋkɛ kese berete ma, nahe ka jaga ta ŋkɛ kenza gwezlayɛ. Kwa nza ŋkɛ Mahwətə nde sa nda yaka va kwele kwele ta fete ta ŋkɛ. Nahe ŋwalea ŋkɛ keslə kaka mavashi va ka ghema.

⁶Kanewe newe zləvəa ŋkɛ meleme ta Siyon kaslə. Nahe mbelia ŋkɛ nyi te ghə kenza kala yɛ le nyi kesləyima gwəzə kezeme. Kahwɛ hɛ kedene dene va nde zlɛaŋezlɛa.

⁷Ma mbe hɛ nyi ndeŋe ba'a nyi sa yaka Zhɛrəzalɛm ne, wəshi ganjia ŋkɛ nyi vəashi yazəzə ŋkɛ. Ma vəa ŋkwa nya dzembe dzeve ta ka ghema mbelia ŋkɛ, nda ɗema wəndə shɛ kezha kemane hɛ ne, katenewe ŋkɛ ka jaga ta nta le ntsə ba'a kateŋ'wəshi hɛ va nya zanyɛ sebe te.

⁸Nahe Zhɛrəzalɛm kemenete fete nyi dzawe dzawe, vatse zhɛre nda nde kakəsə. Kaɓelama ŋkɛ pɛtɛa mbeli nyi kese kahawe ve, va nya newe zeweve ta nta hɛ we. Ma ghenta ne, kaŋələvə nde ba'a kazhɛne geva nde dzeyi te sebe.

⁹Nza wale walea nta ya dzeyi te rewebea nta. Kese nde kazəzə wəsə nya ketemene geva we. Nahe nde kenza benake va teɗe ta nta, wəndə shɛ kezha gweɗakwe ŋkɛ we. Ma ke gezete: «Mahwətə yawe, newema ɗa nya te 'ya, newema tsema tsema kele ghə nde jaga ta ɗa.»

¹⁰Nahe nde ghema kefəhwe pɛtɛa wəshi ganjia nta. Nahe nde kenakɛ kweci hwelefefi kadzembe ŋkwa ŋkɛ nya keveyi geva tekeleke. Ndagwara nahe na, gha Shala kefɛake hɛ kedzehwa tsene ta mbelia ŋa.

¹¹Pɛtɛ mbeli nyi mbe kaŋələvə, kazele wəsə kezeme hɛ. Kafə nda wəshi ganjia nci hɛ ke mbeli kezha kemave wəsə kezeme, yitea ŋ'we berete. Ma ke Zhɛrəzalɛm gezete: «Mahwətə yawe, newevema ba'a marevema tsema tsema ɗema zləvə te 'ya.»

¹²Gheyɛ pɛtɛa mbeli nyi kedzeghwa, kekwaɗakɛ ŋayɛ ndiremi nya we. Newevema mə ba'a marevema mə: kwete yaka shɛ kala nya te 'ya, kala nya vate Mahwətə te 'ya te vecia ghwə ta hwepe wənəa ŋkɛ we.

¹³Sawa pelɛ ghweme ne, nahe ŋkɛ keghweneke ghwə nya vame ŋkɛ mbe yɛ 'yɛ'yɛa ɗa. Nahe ŋkɛ keŋeyi keleŋa yitea seɗa ta ɗa ba'a keweleyi ɗa te kwa gɛŋkilə. Nahe ŋkɛ kesərəakɛ ɗa shaka shaka, shewə nza 'ya keveci keveci.

¹⁴Nahe ŋkɛ kevate ntsə te yɛ jaɗafa ta ɗa. Nahe hɛ ketseɓeyi geva mbe dzeve ta ŋkɛ. Nahe hɛ kenza təɗəmə te welɛa ɗa. Nahe Shala kedenemte berete ta ɗa, nahe ŋkɛ kevame ɗa mbe dzeve ta mbeli nyi shɛma 'ya ghereŋe kwa kema ta nci.

¹⁵Nahe Shala keŋkamte pɛtɛa ka katsala ka sewajɛ nyi kese va 'ya. Nahe ŋkɛ ketsenete ka sewajɛ yitea 'ya kezha mpə ka mempɛhwetɛtia ɗa. Nahe ŋkɛ keŋkeɗemte ɗa, 'ya Siyon, meleme ta Zhəwda, kala rɛzɛŋe te ŋkwa keŋkeɗe.

¹⁶Vatse nda nehwene 'ya, nda bete nehwene ntsə ta ɗa. Kwa nza ŋkɛ ma nde gweɗakwe ɗa, nde zhɛne kave ɗa mpi ne, nahe ŋkɛ kenza cakeɗake yitea 'ya. Nahe ŋwalea ɗa kezanji, va nya se nde ghema berete ma.

¹⁷Nahe Siyon kese kaha yɛ dzeve, ama wəndə shɛ kezha gweɗakwe ŋkɛ we. Nahe Mahwətə kehave nda mpa ke Zhakob le ka ghema nyi dzeyi yite. Ma te tepe ta nci ne, nahe Zhɛrəzalɛm kezhɛrenyɛ kakəsə.

¹⁸Nahe Mahwətə kenza tiɗiɗi, va nya fate nda ma ghena 'ya. Gheyɛ mbeli pɛtɛ, fama mə ba'a newema mə yaka nya te 'ya. Ma deghelɛshia ɗa ba'a mempɛhwetɛtia ɗa ne, nahe mbeli kefəhwe hɛ.

¹⁹Nahe 'ya kese kaheka ka meghwateshia ɗa, ama ghenci ne, nahe hɛ kepamte ɗa. Nahe ka dzeghe Shala ta ɗa ba'a ka ncɛ ntsehwele ta ɗa kempənji mbe meleme, vəa ŋkwa nya se hɛ kazele wəsə kezeme yitea zhɛne kaŋ'we berete.

²⁰Mahwətə yawe, newema ndiremi nya te 'ya gi! Kawəvaɗe wəvaɗe ŋkwa nya kwa hwəa ɗa. Nahe mehele ta ɗa kenza keyirə yirə, va nya fatema ŋa ghena 'ya tsape tsape. Ma pelɛ te ŋwela ne, nahe kafayɛ kempəmte ŋwalea ɗa, ma ki ghɛ ne, kala wəsə nya ki ghɛa mte mbeli.

²¹Kafefa ɗa mbeli kaŋələvə, ama nde gweɗakwe ɗa shɛ we. Nahe pɛtɛa ka ghema ta ɗa kefate ndiremi nya te 'ya. Kazlama hɛ yitea wəsə nya menete ɗa na. Nahe na kekeleke veci nya gezete na. Nza hɛ kala 'ya perə gi!

²²Vate ntsə te 'yaghwa mehele ta nci ba'a menete nda ke hɛ kala nya menete ɗa na tewəmbəreke pɛtɛa jaɗafa ta ɗa gi! Kwa nza ŋkɛ ne, kwele kwele ŋələvə 'ya ba'a pɛtɛa geva ta ɗa shewə.