Read KapsikiDC Yɛ Ŋgaɗe ghə 3 Bible Online

Yɛ Ŋgaɗe ghə 3 - KapsikiDC bible

Yɛ Ŋgaɗe ghə 3

¹Nahe 'ya kenza kawəndə nya kesahwe yaka va ɗa ta Shala nya le wənə le wənə.

²Nahe ŋkɛ keveyi ɗa te kema ta ŋkɛ, nahe ŋkɛ kese kadzeghwa le 'ya mbe ŋkwesle, kaɗema mbe waŋe.

³Kaganda ne, nahe ŋkɛ kevaghe dzeve ta ŋkɛ kənəa 'ya, kənəa 'ya kwetɛŋe ɗa keveci keveci.

⁴Nahe ŋkɛ kedenemte ɗa slə kwa ghə hwa'a kwa seɗa, nahe ŋkɛ kempəmte yɛ 'yɛ'yɛa ɗa.

⁵Nahe ŋkɛ kedzaslete ɗa kwa wəsəa kwamasa ba'a kwa yaka kala zli.

⁶Nahe ŋkɛ keveyi ɗa hwa ŋkwesle kala mbeli nyi kempənji nyi vəashi.

⁷Nahe ŋkɛ kedzaslete ɗa le zli kezha ɗema 'ya kashave, nahe ŋkɛ ketseyi ɗa kwa zewe lɛ.

⁸Nahe 'ya kese katsa lewela kezha kemane, nahe ŋkɛ kedəpəte sleme ta ŋkɛ va səkwə ta ɗa.

⁹Nahe ŋkɛ kefɛake ɗa hweŋkwa le pelɛ nyi jama jama ba'a keveyi ɗa kwa hweŋkwa nya ndiremi.

¹⁰Kezha 'ya ne, nahe ŋkɛ kese kala mtsekwele nya te ghweɓe, kala nivɛrə nya tewəfərə.

¹¹Nahe ŋkɛ kezamte ɗa hweŋkwa ta ɗa, nahe ŋkɛ keŋkwahemte ɗa ba'a keslekwemte ɗa.

¹²Nahe ŋkɛ penakete rəgia ŋkɛ ba'a keveyi ɗa kawəsə keɗeke ta ŋkɛ le have.

¹³Nahe ŋkɛ kehehame pɛtɛa have ta ŋkɛ mbe dəŋəa ɗa.

¹⁴'Ya yaŋ'wəshi pɛtɛa hwelefe ta ɗa, 'ya yagha hɛ kwa cimə keveci keveci.

¹⁵Nahe ŋkɛ kebehekɛ ɗa le mandalɛake, nahe ŋkɛ keghwəyimte ɗa le cɛana.

¹⁶Nahe ŋkɛ keŋkeyite ɗa yitea mpeɗe ndɛghwɛɗɛ, nahe ŋkɛ keŋkeɗeyi ɗa hwa keləwə.

¹⁷Nahe ŋkɛ kekelehwe kwelɛŋe va 'ya, nahe 'ya kezaghəyite zeɗe nza.

¹⁸Tagha gɛ, ma 'ya gezete: mba jive mbe kema va 'ya we, wəsə shɛ mba 'ya kaneghe va Mahwətə we.

¹⁹Nahe 'ya kenza mbe ndiremi ba'a kawəndə nya kendeŋe. Nahe zəzə ndiremia ɗa kenza kawəsəa kwamasa nya ndɛalɛa sha 'ya.

²⁰Nda zəzə yazəzə 'ya kevə kevə, tagha gɛ, nahe 'ya kenza kedene dene.

²¹Ama wa nya wəsə nya zəzə 'ya, nya kegwəfə ɗa ghə nya:

²²Kekiɗinyɛ ganyɛa Mahwətə we, kenahenyɛ ɗe ta ŋkɛ we.

²³Nahe ŋkɛ kenza kamɛnɛfɛ kala kiɗi ta ŋkwa. Kaganda ne, nahe ganyɛa ŋa kenza wəbake!

²⁴Ma 'ya gezete: «Mahwətə ya kaŋa ɗa wəsə.» Vatse gɛ, kateve nda ghəa ɗa 'ya.

²⁵Nahe Mahwətə kenza ganyɛke laka wəndə nya keve nda ghəa ŋkɛ, laka wəndə nya kezele ŋkɛ.

²⁶Nahe ŋkɛ kenza kawəsə ganyɛ kaneghe mbele ta Mahwətə le gweɗakwe.

²⁷Nahe ŋkɛ kenza kawəsə ganyɛ sha wəndə ŋelɛ kahawe va wəshi nyi kehi se kawəzege.

²⁸Ma kenza Mahwətə kasa nda yaka ne, nzanyɛ ŋkɛ pelɛ ŋwela ba'a tikə tikə.

²⁹Gwəɗəŋənyɛ ŋkɛ le kema hwa keləwə, ya kwete katekemane ŋkɛ Shala!

³⁰Zhɛrave nda sleme ŋkɛ ke nde mpa ŋkɛ ba'a nza ŋkɛ behe va yɛ ŋele.

³¹Kwa nza ŋkɛ ma Shala ne, kanegha ŋkwa ŋkɛ kaghala ghala we.

³²Ya gheŋkɛ nza kasa nda yaka ke wəndə ne, nahe ɗe kenza kwele kwele ve, kwa nza ŋkɛ nahe ganyɛa ŋkɛ kenza wəbake.

³³Kwa nza ŋkɛ kenza le wənə kwetɛŋe shifə ba'a sa nda yaka ŋkɛ ke mbeli we.

³⁴Ma vəa ŋkwa nya ŋkeɗe pɛtɛa ka daŋgayɛ nyi te hɛɗi mbeli,

³⁵ma vəa ŋkwa nya mene wəsə nya kehima mbeli kwa ntsə ta Shala tehwə ghweme,

³⁶ma vəa ŋkwa nya mene mbəɗəkwə mbeli te ghwə ne, ashɛ Shala kanewe wəka?

³⁷Wa nde geze ghena nda mene geva wəsə wa? Ashɛ Shala nde tare yayata wəsə wəka?

³⁸Ashɛ same kwa mɛa Shala tehwə ghweme same ndiremi keɗema zeɗe nza wəka?

³⁹Va wa hi wəndə nya teghweme kaŋgaɗe ghə wa? Ŋgaɗe ghə yayata wəndə va yɛ jaɗafa ta ŋkɛ.

⁴⁰Neweve ɓəmə dzeghwa ta ɓəmə megela ba'a zhɛne ɓəmə geva kase sha Mahwətə.

⁴¹Səkwə ɓəmə ghə le pɛtɛa wənəa ɓəmə laka slete dzeve dzeme laka Shala nya pelɛ ghweme.

⁴²Nahe ghen'yɛ kese kaka mene fete, nahe ghen'yɛ kese kaka fama ghena. Ama gha ne, kekelemte n'yɛ na te wənə we.

⁴³Nahe na kehwepete wənə, nahe na kentsa yitea ghen'yɛ ba'a kempəmte n'yɛ kakwa zhɛma heli.

⁴⁴Nahe na kewəfərə ŋa mbe ləmbə kezha fɛake səkwə ghə ta n'yɛ kentsehe pelɛagha sha gha.

⁴⁵Nahe na kezhɛrete n'yɛ kakəsə, kawəshi nyi ɗema mbeli dzeyi hwa kweci hwelefefi.

⁴⁶Ghena yageze pɛtɛa ka ghema ta n'yɛ te ghen'yɛ.

⁴⁷Ma wəshi nyi keme te ghen'yɛ ne, ghazlənə ba'a medada, ŋzla ba'a ndiremi nya wəba.

⁴⁸Kala ghwa sawa nehwene yitea ntsə ta ŋa va ndiremi nya wəba nya kənəa hwelefe ta ɗa.

⁴⁹Nda nehwene yabete ntsə ta ɗa va nya ɗema zhɛne mpi shɛ,

⁵⁰hwa'a te və nya teyiŋwə geva Mahwətə sawa pelɛ ghweme kezha newe ŋkwa.

⁵¹Kaghwətə ghwətə ɗa yɛ ntsə ta ɗa va newe wəsə nya kemene nda geva ke meleme nyi dzeyi yitea meleme ta ɗa.

⁵²Keka yakeka ɗa ka ɗema ntsə ta ɗa gəmə kala wəsə nya keka 'yɛ hɛ.

⁵³Nahe hɛ keŋzleyi ɗa kwa ki le ntsə, nahe hɛ ketsəkwəyi pelɛ kənəa 'ya.

⁵⁴Nahe ghəa ɗa kenza bətə mbe yɛmə. Tagha gɛ, ma 'ya gezete: «Nahe 'ya keza.»

⁵⁵Same kwa zeweve ta ki ne, kaheka sləa ŋa 'ya Mahwətə.

⁵⁶Nahe na kefate ŋwələa ɗa, ma 'ya: «Zhiɓəma yɛ sleme ta ŋa na va yɛ gafe ba'a yɛ lewela ta ɗa ma.»

⁵⁷Ma kwa hekakɛ ŋa 'ya ne, nahe na kehendeke geva. Tagha gɛ, ma pa na gezete ɗa: «Ghazlənəma na ma!»

⁵⁸Shala yawe, nahe na keyakɛ ɗa, nahe na kembelete mpia ɗa.

⁵⁹Mahwətə, nahe na kenakɛ fete nya menete ɗa mbeli. Ndeke ɗa nza tiɗiɗi gɛ!

⁶⁰Nahe na kenakɛ tsema tsema wa dewa hɛ te 'ya, pɛtɛa wəshi nyi zəzə hɛ te 'ya.

⁶¹Mahwətə yawe, nahe na kefate ŋele ta nci, pɛtɛa zəzə nyi kele hɛ te 'ya.

⁶²Keveci keveci ne, ghena yageze ka jaga ta ɗa te 'ya ba'a wəshi nyi ndiremi ndiremi yazəzə hɛ te 'ya.

⁶³Ya ghenci nza mentishɛ keɗema meslete ne, newema hɛ gi: nahe 'ya kenza kaciməa nci.

⁶⁴Mahwətə yawe, katemene nda na ke hɛ kala wəshi nyi menete ɗa hɛ.

⁶⁵Kateŋzle mehele ta nci na. Katenza bezla ta ŋa kənəa hɛ.

⁶⁶Mahwətə yawe, katekeka hɛ na le wənə le wənə ba'a kateza sebe na te hɛ te hɛɗi.