Read KapsikiDC Yɛ Ŋgaɗe ghə 5 Bible Online

Yɛ Ŋgaɗe ghə 5 - KapsikiDC bible

Yɛ Ŋgaɗe ghə 5

¹Mahwətə yawe, zəzəte wəsə nya kemenete n'yɛ geva gi! Newema ba'a marevema tsema tsema ŋele n'yɛ mbeli gi!

²Nahe hɛɗia n'yɛ kenza mbe dzeve ta kweci mbeli ba'a ghɛa n'yɛ va mbeli nyi ɗepema ghen'yɛ.

³Nahe n'yɛ kenza kaka mezhɛtiti, kaɗema yita shɛ, nahe yɛ meyɛ n'yɛ kenza kaka wedidi.

⁴Te cɛdɛ pa yɛmə kesa ghen'yɛ, te kwaba pa sheghwə kemeha ghwə ghen'yɛ.

⁵Nahe ka sa n'yɛ yaka kenza te welɛ va ghen'yɛ, kedene dene n'yɛ, zhɛne mpi shɛ va ghen'yɛ we.

⁶Kaha nda dzeve ghen'yɛ ke ka Ɛzhipte ba'a ka Asiri kezha ŋ'we wəsə kezeme wərə zeme ta n'yɛ.

⁷Nahe ka yitehɛ n'yɛ kemenete jaɗafa, mba hɛ teke we, ama kənəa ghen'yɛ ɗaŋeɗa ta fete ta nci.

⁸Ka mavashi ya kaka sleke n'yɛ, wəndə shɛ kezha zləgwə n'yɛ shave mbe dzeve ta nci we.

⁹Ma va ka mefətekwə nyi te ɓerama ne, mbasa kempə nza ghen'yɛ kezha fə wəshi kezeme ta n'yɛ kase.

¹⁰Nahe hweta ta n'yɛ kenza kenefe nefe kala wəsə nya nza ghen'yɛ kwa reghwetɛ va zhɛ n'yɛ ta ma.

¹¹Kaɓelahe ka jaga ta n'yɛ kaberete le mi mbe Siyon ba'a le ŋwalea kwɛ mbe meleme nyi mbe Zhəwda.

¹²Nahe hɛ kempəmte mbeli nyi te ghəa n'yɛ ŋalawe te sheghwə, kese hɛ kahawe va ka meha mehɛɗi we.

¹³Vena yakele ka mempɛhwetɛti, katsepe tsepe ŋwale tezhili va ɗaŋeɗa ta sheghwə.

¹⁴Kazhɛne ka meha mehɛɗi kantishɛ mɛa mɛ degha ta meleme we, kezhɛne ka mempɛhwetɛti kagha cimə we.

¹⁵Nahe zlama kezanyɛ kwa wənəa n'yɛ, nahe yɛ wetse ta n'yɛ kezhɛrenji kanehwene.

¹⁶Nahe derə meghe kefelaŋe sawa mbe ghəa n'yɛ. Wa nya ndiremi te ghen'yɛ va nya menete jaɗafa ghen'yɛ gɛ!

¹⁷Vatse nza pɛtɛa geva ta n'yɛ shewə, vatse nza ntsə ta n'yɛ mbe ŋkwesle:

¹⁸tewəmbəreke ghweme ta Siyon nya kaɓerama ba'a nya kezhɛrenyɛ kaŋkwa kenza ta yɛ mbeyiga.

¹⁹Ma gha, gha Mahwətə ne, meghe nya kaghala ghala na, katenza pasla ta ŋa keshi keshi.

²⁰Va wa tezaghəyite n'yɛ na kaghala ghala wa? Va wa tewəfəyite n'yɛ na kandimə ndimə wa?

²¹Zhɛne n'yɛ kase sha gha Mahwətə, tagha gɛ, katezhɛne geva n'yɛ kase. Zhɛrete nza ta n'yɛ kala nya vəashi.

²²Nahe na keneghamte n'yɛ kaghala ghala na? Nahe na kehwepete wənə kwele kwele va ghen'yɛ na?