Read KapsikiDC Ɛzɛkiyɛl 13 Bible Online

Ɛzɛkiyɛl 13 - KapsikiDC bible

Ɛzɛkiyɛl 13

¹Ma ke Mahwətə sha 'ya:

²«Wəndə ŋelɛ, gezete nda ghena ta ɗa ke mbeli nyi keveyi ghəa nci nyi kaka mɛ ŋkwa hwa ka Israyɛl ba'a nyi geze ghena nyi keshave mbe ghəa nci nyi. Gezave nda ke hɛ kafa ghena nyi geze 'ya, 'ya Mahwətə.

³Wa nya ghena nya geze 'ya, 'ya Shala Mahwətə nya: Ɗa ya te ka gezhia kɛfia ka mɛ ŋkwa nyi kekele zəzə ta nci nyi kaɗema hɛ kenakɛ kwete wəsə.

⁴Ka Israyɛl, kala kelɛ gamba nyi kendeŋe dzeyi hwa kwəfi ka mɛ ŋkwa ta ŋayɛ.

⁵Kese hɛ kasekawe ŋzla nyi te zli we, kese hɛ kaŋa zli kezha ya ghəa nci va mpa nya te vecia Mahwətə we.

⁶Wəshi tseŋwə ba'a ghena ghwete ŋkwa ya va hɛ. ‹Wa nya ghena nya geze Mahwətə nya› ke hɛ sha geze kaɗema 'ya Mahwətə keghwenakɛ hɛ. Ma zəzə hɛ ne, kateve ghə 'ya te ghena ta nci.

⁷Ashɛ wəshi tseŋwə ba'a yɛ ghena ghwete ŋkwa yageze yɛ wəka? Ghena nyi kese va Mahwətə yageze n'yɛ pe yɛ, ndagwara kaɗema 'ya kegezete ŋayɛ ghena.

⁸Vatse gɛ ne, wa nya ghena nya geze 'ya, 'ya Shala Mahwətə nya: Ma va nya pesleyi tseŋwə ba'a nya gegezeyi ghena ghwete ŋkwa yɛ ne, kateme 'ya kənəa gheyɛ. Nya ya kaghena nya geze ŋayɛ 'ya, 'ya Shala Mahwətə.

⁹Kateme 'ya kənəa ka mɛ ŋkwa nyi kenewe wəshi tseŋwə nyi ba'a nyi kegeze ghena ghwete ŋkwa nyi. Ŋkwa kenza ta nci shɛ hwa mbelia ɗa we, katenza sləa nci mbe palepa ta sləa ka Israyɛl ba'a katezhɛne geva hɛ kadzete hɛɗia nci we. Ma tsagha, kateɗepete hɛ 'ya ya kaMahwətə Shala.

¹⁰Mbelia ɗa yaghwete ka mɛ ŋkwa shɛhɛ. Ma ke hɛ sha geze: ‹Kwelɛŋe ya shɛ› ke hɛ kaɗema kwelɛŋe shɛ. Mbelia ɗa ka pa zli, ama ghenci ne, deke fi le teɓehwe yave nda ghə hɛ.

¹¹Ma pa na sha mbeli nyi kefi zli nyi le teɓehwe: Kateŋzlanyɛ ŋkɛ! Katese va nya wəba, kabete kwacakelɛ ba'a katevɛ sefə nya wəba.

¹²Ma vəa ŋkwa nya teŋzla ŋkɛ ne, ma te'yɛwe mbeli va gheyɛ: ‹Wa yaketekɛ teɓehwe nya fikɛ nya yɛ le wa?›

¹³Vatse gɛ ne, wa nya ghena nya geze Shala Mahwətə nya: Le wənə le wənə tekele sefə nya wəba 'ya kase. Le wənə le wənə teme va nya wəba ba'a kwacakelɛ nyi ketebeze wəshi 'ya.

¹⁴Kateŋzlamte zli nya fikɛ nya yɛ le teɓehwe 'ya, pa te shihəa ŋkɛ teŋzla 'ya kadzete hɛɗi. Kateŋzla ŋkɛ, mɛke tenza sebe te gheyɛ mbe. Ma tsagha ne, kateɗepete yɛ 'ya ya kaMahwətə.

¹⁵Katepele nda hweŋkwa 'ya ke hwepe ta wənəa ɗa kadzeghəa yɛ zli le mbeli nyi kefikɛ le teɓehwe. Ma tegeze ŋayɛ 'ya: ‹Nahe zli keŋzla. Rayɛ sebe te mbeli nyi kefikɛ le teɓehwe.

¹⁶Nahe ŋa ka mɛ ŋkwa ta ka Israyɛl nyi kegeze ghena nyi te Zhɛrəzalɛm ba'a nyi kegeze nyi kwelɛŋe ya shɛ ke hɛ kaɗema kwelɛŋe shɛ.› 'Ya Shala Mahwətə nde gezete.»

¹⁷«Wəndə ŋelɛ, zhɛrete kema laka mia ka Israyɛl nyi kegeze ghena nyi keshave mbe ghə ta nci shɛ na gezete nda ghena ta ɗa ke hɛ.

¹⁸Ma pa na sha geze: Wa nya ghena nya geze Shala Mahwətə nya: Ɗa ya te gheyɛ mi nyi ketsa wəshi kedzawa pɛtɛa yɛ dzeve ba'a gheyɛ nyi kentsəzlə salabi kaŋa yayata wəndə yitea kema berete le ghwɛ laka kese mpia nci. Gheyɛ ɗe kakekesehwe mpia mbelia ɗa mbe ya ŋa ŋayɛ yɛ na?

¹⁹Nahe yɛ kekelemte zləvə te 'ya kwa kema ta mbelia ɗa kezha kemave megi demake mbe dzeve ba'a kwetiɓəa ɗafa. Nda mpə yampə mbeli nyi kehitema geva kampə yɛ, ama pa yɛ sərəakɛ nyi gare mpə teghweme. Tsagha ne, mbelia ɗa nyi keyɛ ghena ta ŋayɛ yaghwete yɛ.

²⁰Vatse gɛ, wa nya ghena nya geze 'ya, 'ya Shala Mahwətə nya: Nahe 'ya keɗema ŋgwedɛba ta ŋayɛ nyi kese mpia mbeli nyi yɛ le. Kateseɗemte ŋgwedɛba nyi 'ya same kwa dzeve va gheyɛ kezha mpə ba'a katembelemte mpi nyi kesehwe nyi yɛ 'ya.

²¹Kateŋkwahe salabia ŋayɛ 'ya ba'a katembeleke mbelia ɗa 'ya shave mbe dzeve ta ŋayɛ. Katezhɛne hɛ kateɗe kadzembe dzeve ta ŋayɛ we. Ma tsagha, kateɗepete yɛ 'ya ya kaMahwətə.

²²Nahe yɛ ketazemte mehele ta mbeli nyi tiɗiɗi le tseŋwəa ŋayɛ, ndagwara kegha 'ya kabezemte nda mehele ke hɛ we, va nya mtsehete nda berete yɛ ke ka 'yaghwa mehele yitea ntsə geva mbe dzeghwa kwa ndiremi nya keza mpia nci.

²³Vatse gɛ ne, kazhɛne yɛ kanewe wəshi tseŋwə ba'a kageze ghena ghwete ŋkwa we. Katembelemte mbelia ɗa 'ya shave mbe dzeve ta ŋayɛ. Tsagha ne, kateɗepete yɛ 'ya ya kaMahwətə.»