Read KapsikiDC Ɛzɛkiyɛl 15 Bible Online

Ɛzɛkiyɛl 15 - KapsikiDC bible

Ɛzɛkiyɛl 15

¹Ma ke Mahwətə sha 'ya:

²«Wəndə ŋelɛ, le wa nza zləvə za ma te sheghwəa rɛzɛŋe ke kweci wəfe nyi mbe ghɛa wəfe wa? Zləvə ma te yɛ dzeve ta ŋkɛ ke ŋa kweci wəfe na?

³Katsasleve sheghwə mbeli te kezha feɗe wəshi na? Katsasleve mbeli kamɓe mbe dewe kezha seɗe wəshi te na?

⁴Ewə, deke meha ghwə yanza ŋkɛ kaketekɛ ŋkwa le. Ma ketsemte mɛa ŋkɛ nyi bake ghwə, tsagha tepe ta ŋkɛ ne, le wa nza ŋkɛ mba kaketekɛ ŋkwa wa?

⁵Ma mba ŋkɛ zake, wəsə shɛ kamenete mbeli le we. Vəa ŋkwa nya terenyɛ ŋkɛ ba'a nya tsenyɛ ŋkɛ nza ŋkɛ kamenete kwete wəsə gɛ na?

⁶Vatse gɛ ne, wa nya ghena nya geze Shala Mahwətə nya: Kala nya veyi sheghwəa rɛzɛŋe 'ya mɛa ghwə za ma ke sheghwə nyi mbe ghɛa wəfe ne, tsagha tetere mbeli nyi mbe Zhɛrəzalɛm 'ya.

⁷Kateme 'ya kənəa hɛ. Ma zəzə hɛ ne, pələsə hɛ kembelenji va ghwə, ama ghwə nde tere hɛ. Ma tsagha, kateɗepete yɛ 'ya ya kaMahwətə vəa ŋkwa nya teme 'ya kənəa hɛ.

⁸Katezhɛre hɛɗia nci 'ya kaɓerama va nya sema hɛ dɛŋe dɛŋe te ghena ta ɗa. 'Ya Shala Mahwətə nde gezete.»