Read KapsikiDC Ɛzɛkiyɛl 19 Bible Online

Ɛzɛkiyɛl 19 - KapsikiDC bible

Ɛzɛkiyɛl 19

¹Ma ke Mahwətə gezete ɗa kagha nehwene kwa mberate ghə te mbeli nyi te ghə nyi mbe Israyɛl:

²«Ŋemalea nivɛrə nya meɓelahe hwa ŋezhilia nivɛrə meyɛ ŋayɛ! Te tepe ta ŋwalea nivɛrə nza nde kezha kele ŋwalea nta.

³Pa ŋkɛ kelete kwete tekeleke hwa ŋwalea nta nya kezhɛrenyɛ kakatsala nivɛrə. Pa ŋkɛ tekeve slekwe wəsə nya keseve ŋkɛ ba'a pa mpempeɗehwe mbeli.

⁴Pa kweci hwelefefi fate ghena ta nta. Pa ŋkɛ teɗenyɛ kwa ki nya late nda hɛ. Mpahwe hɛ sha dzara mbe ŋshi ve kezha kele kadzawa Ɛzhipte.

⁵Ma kwa nakɛ ŋemalea nivɛrə nahe nde kedene, kaɗema zəzə kembele shɛ ve ne, pa kelete kwete hwa ŋwalea nta, pa kelete ŋkɛ kakatsala nivɛrə.

⁶Te tepe ta ŋezhilia nivɛrə kele ŋkɛ ba'a pa zhɛrenyɛ kakatsala nivɛrə. Pa ŋkɛ tekeve slekwe wəsə nya keseve ŋkɛ ba'a pa mpempeɗehwe mbeli.

⁷Pa ŋkɛ mpempəmte yɛ ghɛ meghea nci ba'a ŋzleŋzlate yɛ meleme ta nci te hɛɗi. Kwele kwele dakenji mbeli nyi te hɛɗi kwa fate ghwəghwə ta ŋkɛ hɛ.

⁸Pa kweci hwelefefi nyi keshave mbe yayata bela tseneyite geva yite. Pa hɛ ŋate nda keleŋa, pa teɗenyɛ kwa ki nya late nda hɛ.

⁹Pa hɛ ntsehame ŋkɛ mbe kweshɛle le dzara ba'a keleghe nda ŋkɛ ke meghea ka Babilone. Pa mbeli keseyi ŋkɛ kwa daŋgayɛ kezha ɗema mbeli kafa ghwəghwə ta ŋkɛ hwa ghweme nyi mbe Israyɛl.

¹⁰Kala wəfe ta rɛzɛŋe nya kemɓete geva mɛa hələ meyɛ ŋayɛ. Kwele kwele se ya ba'a sleke te, va nya nza slərəa ŋkɛ hwa yɛmə.

¹¹Dzeve nyi berete berete nyi kezhɛrenji kageta meghe ka se te. Pa ŋkɛ kelenyɛ biya ma ke kweci wəfe. Pɛtɛ ntsə ta mbeli vate geva te va biya ta ŋkɛ ba'a va yɛkwekwe ta dzeve nyi te.

¹²Ama pa nde nteɗemte geva le wənə le wənə ba'a ŋzleyi geva te hɛɗi. Pa sefə nya kesame kwa ghweme ghwelemte ya ta ŋkɛ nyi kebetenji. Pa yɛ dzeve ta ŋkɛ nyi berete berete ghwelenji, kwa sebe ta ŋkɛ, pa ghwə teremte hɛ.

¹³Ma tsetsenya ne, te ɓerama mɓete geva nde, te hɛɗi nya dɛrɛŋe rɛŋe ba'a nya ɗema yɛmə te.

¹⁴Pa ghwə tsete geva te dəŋwəa ŋkɛ, teremte yɛ dzeve ta ŋkɛ ba'a yɛ ya ta ŋkɛ. Mba dzeve nya berete nya kenza kanzate nza kageta ta meghe te we.» Kanehwene kwa mberate ghə hi mbeli kagha nehwene nya.