Read KapsikiDC Ɛzɛkiyɛl 28 Bible Online

Ɛzɛkiyɛl 28 - KapsikiDC bible

Ɛzɛkiyɛl 28

¹Ma ke Mahwətə sha 'ya:

²«Wəndə ŋelɛ, ma pa na sha meghea ka Tir: Wa nya ghena ta Shala Mahwətə nya: Nahe na keveyi kele ghə kwa wənəa ŋa, ma pa na sha geze: ‹shala 'ya. Ŋkwa nya kehi va yɛ shala yanza 'ya te te tepe ta ndərə.› Kala shala newe ghəa ŋa na, ama deke wəndə ŋelɛ na, kaɗema kashala.

³Ɗepe ma wəshi na ke Daniyɛl newe ghəa ŋa na. Wərə na kafave zeweve ta wəshi meŋele zəzə na.

⁴Te zlaɓa ta ntsehwelea ŋa ba'a ɗepe wəshi ŋa kemave mcɛlə na. Nahe na ketsenete mze kwa tere tere ba'a mze kwa tɛawetɛa.

⁵Te zlaɓa ta wəba ta ɗepe wəshia ŋa laka ghena ta zhɛre dzeve mbakete mcɛləa ŋa na. Pa mcɛləa shɛ ndeke ŋa kele ghə.

⁶Vatse gɛ ne, wa nya ghena nya geze Shala Mahwətə nya: Ma va nya veyi ghəa ŋa na kala shala ne,

⁷'ya kateghwene mbeli nyi ghazlənə mbeli va hɛ za ma hwa kweci hwelefefi kadzeghəa gha. Katenzenzere wəshi ganji nyi menete na le ntsehwelea ŋa hɛ ba'a katentsehe zləvəa ŋa hɛ dzate hwa hɛɗi.

⁸Katepesle ŋa hɛ ba'a katemte na le ntsə mbe ghə te tepe ta ndərə.

⁹Kwa kema ta mbeli nyi ketepesle ŋa ne, kagezete na: ‹'Ya ya kashala› pa na? Wəndə ŋelɛ tenza na, kaɗema kashala mbe dzeve ta mbeli nyi ketepesle ŋa.

¹⁰Kala kelɛ temte na mbe dzeve ta kweci hwelefefi. 'Ya Shala Mahwətə nde gezete.»

¹¹Ma ke Mahwətə sha 'ya zhɛkwa:

¹²«Wəndə ŋelɛ, gha nehwene kənəa meghea ka Tir. Ma pa na sha tegeze nda: Wa nya ghena nya geze Shala Mahwətə nya: Nahe na kese kawəndə nya ɗema ŋele te laka wəba ta ntsehwelea ŋa ba'a zlahea ganyɛa ŋa.

¹³Kwa Ɛdɛn nya kantsa ta Shala se na kanza ba'a dzasle se na kwa mama ta pelɛ nyi nza zləvə te hɛ: pelɛ kwa ghɛmɛ, pelɛ kwa rəghwə rəghwə, kwacaregesla, pelɛ kwa gatawəfa gatawəfa, pelɛ kwa jiɓe jiɓe, pelɛ kwa lɛa lɛa ghweme, pelɛ kwa gheme ba'a pelɛ kwa mede mede. Mama ta wəshi kepesa geva mze kwa tere tere nyi kehite geva te veci nya pate geva na ya te geva ta ŋa.

¹⁴Kashɛrəbɛŋe nya keya ŋkwa, nya nza yɛ bidzəa ŋkɛ pelake veyi ŋa 'ya. Pelɛ ghweme nya keveyi ɗa geva tekeleke se na kanza ba'a hwa pelɛ nyi ketse kala ghwə se na kadzeghwa.

¹⁵Megela se dzeghwa ta ŋa ghala pate geva na pa te və nya ncanyɛ wəsə kwa ndiremi mbe gha.

¹⁶Pa jive mbe kema ta zhɛre dzeve ta ŋa kesame ŋa mbe mene berete te mbeli ba'a mene jaɗafa. Vatse ŋkamte ŋa 'ya sawa pelɛ ghweme ta ɗa ba'a veyi ŋa 'ya kala kweci mbeli. Kateŋkamte ŋa 'ya shave hwa pelɛ nyi ketse kala ghwə, gha nya kashɛrəbɛŋe nya keya ŋkwa.

¹⁷Nahe ganyɛ kendeke ŋa kele ghə ba'a nahe jive ta ŋa te kema keteŋweslemte ŋa. Vatse negha ŋa 'ya hwa hɛɗi ba'a ncɛ nda ŋa 'ya ke kweci ka meghea kɛfi.

¹⁸Ma mbe zhɛre dzeve ta ŋa ne, kwele kwele menete jaɗafa ba'a mbəɗəkwə na. Tagha, pa na peleyite se yitea ŋkwa nya keveyi ŋa geva tekeleke. Vatse temeha ghwə nya ketetere ŋa 'ya mbe meleme ta ŋa. Katezhɛre ŋa 'ya kapəsəɗə kwa kema ta pɛtɛa mbeli nyi kenewe ŋa.

¹⁹Le kema teheɗe tenza hwelefe nyi keɗepe ŋa tewəmbəreke gha, kwa nza ŋkɛ kawəsə kedake ŋkwa tenza na. Bətə tenza na kaghala ghala.»

²⁰Ma ke Mahwətə sha 'ya:

²¹«Wəndə ŋelɛ, zhɛrete kema laka meleme ta Sidon shɛ na gezete nda ghena ta ɗa ke mbeli nyi mbe.

²²Ma pa na sha tegeze nda: Wa nya ghena nya geze Shala Mahwətə nya: kateme 'ya te gha Sidon! Katencɛ zləvəa ɗa 'ya te tepe ta meleme ta ŋa. Ma tsagha, kateɗepete mbeli 'ya ya kaMahwətə, tewəmbəreke ɗa nya teve 'ya te. Tagha ne, katencɛ 'ya, 'ya ya kaShala nya kaganda.

²³Kateghwene ŋa ba 'ya ba'a katehwɛ mimi dzeyi kwa hweŋkwa nyi mbe gha. Kateha ŋa mpa mbeli shave mbe yayata bela ba'a kwele kwele tempəmte mbelia ŋa mbeli mbe hwəa meleme. Ma tsagha, kateɗepete mbeli 'ya ya kaMahwətə.»

²⁴Ma ke Mahwətə ɓiyitsa: «Katezhɛne kweci hwelefefi nyi dzeyi yitea Israyɛl kateɓelama shinti mbe ghə ve we. Katezhɛne hɛ kanza kala tigə nyi ken'yi ŋkɛ ba'a nyi keŋgwerahe ŋkɛ we. Ma tsagha, kateɗepete mbeli 'ya ya kaMahwətə.

²⁵Wa nya ghena nya geze Shala Mahwətə nya: Katetsene ka Israyɛl 'ya se hwa kweci hwelefefi nyi tazeyi hɛ 'ya. Laka wəsə nya kala nya ne, katencɛ nda 'ya ke kweci hwelefefi 'ya ya kaShala nya kaganda. Katenza hɛ te hɛɗia nci, te hɛɗi nya ndeke nda nya 'ya ke Zhakob, nde mene slene ta ɗa.

²⁶Katenza hɛ gwezlayɛ te, kateŋa yɛ ghɛ hɛ ba'a katemɓe yɛ wəfe ta rɛzɛŋe hɛ. Kwelɛŋe tenza hɛ, kwa nza ŋkɛ kateve ɗa 'ya te hwelefefi nyi dzeyi yite, nyi kesema kaɓela ŋkɛ. Ma tsagha, kateɗepete hɛ 'ya ya kaMahwətə Shala ta nci.»