Read KapsikiDC Ɛzɛkiyɛl 29 Bible Online

Ɛzɛkiyɛl 29 - KapsikiDC bible

Ɛzɛkiyɛl 29

¹Ma mbe kwa meŋe ta va, te hɛ kwa meŋe bakeghəmbe mbe kwa meŋe ta tere, kwa sebe ta nya fəhwe ŋkwa mbeli ne, ma ke Mahwətə sha 'ya:

²«Wəndə ŋelɛ, zhɛrete kema laka Farawon, meghea ka Ɛzhipte shɛ na gezete ghena ta ɗa te ghəa ŋkɛ ba'a te ghəa pɛtɛa hɛɗia Ɛzhipte.

³Ma pa na sha geze: Wa nya ghena geze Mahwətə nya Shala nya: Kateme 'ya te gha Farawon, meghea ka Ɛzhipte. Kala kele nya wəba, nya meɓelahe mɛa hələ Nil na. Ma pa na sha geze: ‹Ŋa ɗa hələ nya, 'ya le ghəa ɗa nde menete ŋkɛ.›

⁴Yawa, wa nya 'ya nya kateve dzara mbe mɛ va gha ba'a katendeɓe kelepe nyi kwa hələa ŋa te jɛpəlia ŋa. Katentsehe ŋa 'ya same kwa Nil le pɛtɛa kelepe nyi ndendeɓe te yɛ jɛpəlia ŋa.

⁵Kanegha ŋa 'ya kwamte te ɓerama, gha ba'a pɛtɛa kelepe shɛhɛ. Kateme geva ta ŋa te hɛɗi kaɗema wəndə shɛ katekele ŋa ba'a katela ŋa. Kateve nda ŋa 'ya ke wəshi keseɗa nyi hwa gamba ba'a yɛ zleŋa kawəsə kezeme.

⁶Ma tsagha, kateɗepete ka Ɛzhipte pɛtɛ 'ya ya kaMahwətə. Kaselə cafecɛge se na kezha ka Israyɛl.

⁷Ma kwa dɛŋate geva hɛ te gha ne, pa na ɓele ŋa. Mpahwe na n'yimte hɛ mbe bazla ba'a gwenate na tamte geva ta nci.

⁸Vatse gɛ ne, wa nya ghena nya geze 'ya, 'ya Shala Mahwətə nya: Kateghwene ŋa mpa 'ya ba'a kateza sebe 'ya te mbeli ba'a wəshi keseɗa te hɛɗia ŋa.

⁹Katenza hɛɗia Ɛzhipte kebeze beze ba'a kaɓerama. Ma tsagha, kateɗepete mbeli 'ya ya kaMahwətə, kwa nza ŋkɛ ma ke: ‹Ŋa ɗa hələa Nil, 'ya nde menete ŋkɛ.›

¹⁰Vatse gɛ ne, kateme 'ya te gha ba'a te hələa ŋa. Katezhɛre hɛɗia Ɛzhipte 'ya kakwəfi, kaɓerama se mbe meleme ta Migdol nya laka bela kwa gwela hwa'a mbe meleme ta Asəwan ba'a kwa ghala ta Ɛtiyopi nya laka bela kwa zeme.

¹¹Wəndə ŋelɛ keɗema wəsə keseɗa shɛ katedzeghwa te we, va wəfaɗemsə temene ŋkɛ kaɗema mbeli mbe.

¹²Katezhɛre hɛɗia Ɛzhipte 'ya kaɓerama nya ndiremi ma hwa kweci ɓerama pɛtɛ, kakwəfi tenza yɛ meleme ta ŋkɛ za ma ke kweci meleme. Kava wəfaɗemsə ne, katetaze ka Ɛzhipte kwetɛ kwetɛŋe dzeyi hwa kweci hwelefefi nyi te kweci hɛɗi.

¹³Wa nya ghena nya geze 'ya Shala Mahwətə nya: Ma kwa sebe ta va wəfaɗemsə ne, katetsene ka Ɛzhipte 'ya se hwa kweci hwelefefi nyi tazeyi hɛ 'ya.

¹⁴Katezhɛne ka Ɛzhipte 'ya te ŋkwa nci, katefə hɛ 'ya kasawa hɛɗi nya laka bela kwa zeme. Kwagha ne, katenza hɛ mbe dzeve ta meghe nya ɗema berete va hɛɗia ŋkɛ.

¹⁵Hɛɗia shɛ nde tenza kahɛɗi nya ɗema berete ve hwa kweci hɛɗi, katezhɛne ŋkɛ kanza kənəa kweci hwelefefi we. Katentamte mbeli 'ya seyi yite kezha ɗema ŋkɛ mba kasleke kweci hwelefefi.

¹⁶Katezhɛne ka Israyɛl kave ghə te hɛ we, katezhɛne hɛ kamene jaɗafa laka zhɛre nda kema ke ka Ɛzhipte we. Ma tsagha ne, kateɗepete mbeli 'ya ya kaMahwətə.»

¹⁷Ma te kwa bakemsə mberefaŋeghəmbe ta va, te kwa ghate ta hɛ mbe tere kwa ghate kwa sebe ta nya fəhwe ŋkwa mbeli ne, ma ke Mahwətə sha 'ya:

¹⁸«Wəndə ŋelɛ, nahe Nabəkodonozor, meghea ka Babilone kendeke nda slene nya dzawe ke ka sewajɛa ŋkɛ le meleme ta Tir. Kedəhwə dəhwə ghəa ka sewajɛa ŋkɛ ba'a kesenate senate bazla ta nci, ama kekemave zhɛme yɛ meghe le ka sewajɛa ŋkɛ mbe wəsə nya menete nda hɛ ke ka Tir we.

¹⁹Vatse gɛ ne, wa nya ghena nya geze 'ya, 'ya Shala Mahwətə nya: Kateve nda Ɛzhipte 'ya ke Nabəkodonozor, meghea ka Babilone. Katefə mcɛlə nyi mbe ŋkɛ ba'a katetaze ŋkɛ. Katefə wəshi nyi mbe ŋkɛ hwa mpa kezha nehe nda hɛ kazhɛme ke ka sewajɛa ŋkɛ.

²⁰Kateve nda hɛɗia Ɛzhipte 'ya kawəsə keŋki nda slene ta ŋkɛ, kwa nza ŋkɛ ke 'ya menete ɗa slene hɛ le ka sewajɛa ŋkɛ. 'Ya Shala Mahwətə nde gezete.

²¹Ma vəa ŋkwa shɛ ne, katemtsehe nda berete 'ya ke ka Israyɛl. Ma gha le ŋa ŋa gɛ Ɛzɛkiyɛl, kateve ŋa berete kegeze nda ghena ke hɛ 'ya. Ma tsagha, kateɗepete hɛ 'ya ya kaMahwətə.»