Read KapsikiDC Ɛzɛkiyɛl 3 Bible Online

Ɛzɛkiyɛl 3 - KapsikiDC bible

Ɛzɛkiyɛl 3

¹Ma ke sha 'ya: «Wəndə ŋelɛ, zehwe wəsə nya kwa kema ta ŋa nya, zehwe palepa kwa peɗe peɗe nya, kwa sebe ta ŋkɛ kwiɗi kageze nda ghena ke ka Israyɛl.»

²Ghwenakwe 'ya sha mɛ, pa ŋkɛ zehwe ɗa palepa kwa peɗe peɗea shɛ.

³Ma ke sha 'ya: «Wəndə ŋelɛ, behekɛ hwəa ŋa ba'a zemave nda palepa kwa peɗe peɗe nya ve ŋa nya 'ya ke ghəa ŋa.» Ntake 'ya kazeme: kala yɛməa mze ghɛnia ŋkɛ kwa mɛa ɗa.

⁴Ma ke sha 'ya ɓiyitsa: «Wəndə ŋelɛ, kwiɗi sha ka Israyɛl shɛ na gezete nda ghena ta ɗa ke hɛ.

⁵Kaghwene ŋa 'ya sha mbeli nyi fama ghena ta nci dzawe kafa we, ama sha ka Israyɛl.

⁶Ma keghweneghe ŋa 'ya sha kweci hwelefefi nyi kwele kwele nyi fama ghena ta nci na ne, katefa ŋa ghena ta ŋa hɛ.

⁷Ama kateɗe ka Israyɛl kafa ghena ta ŋa we, kwa nza ŋkɛ kaɗe hɛ kafa ghena ta ɗa we. Kaganda ne, ntɛaŋe ntɛaŋe ghə ba'a wənə te hɛ.

⁸Vatse gɛ ne, katezhɛre ŋa 'ya zlere ma ke hɛ, ntɛaŋe ntɛaŋe ma tenza ghəa ŋa ke ŋa nci.

⁹Kala ntɛaŋentɛa kwacaregesla tezhɛre kema ta ŋa 'ya, ntɛaŋentɛa ma ke pelɛ. Ma tsagha ne, kateghazlənə na ba'a katedake na va wəshi nyi mene ka fama ghena shɛhɛ we.»

¹⁰Ma ke sha 'ya zhɛkwa: «Wəndə ŋelɛ, ghwenemte yɛ wənəa ŋa le sleme ta ŋa yitea ghena nyi geze 'ya pɛtɛ.

¹¹Kwa sebe ta ŋkɛ, kwiɗi sha kaka hwelefefia ŋa nyi fəhwe mbeli kaka mavashi kase teke. Ma pa na sha ghena ke hɛ: ‹Wa nya ghena ta Shala Mahwətə nya.› Gezete nda ke hɛ, ya hɛ nza kafa ya hɛ ɗema kafa.»

¹²Tagha gɛ, pa sefə Shala kesakate ɗa sate te ŋkwa, ma fa 'ya ne, kagaka lewela le berete kwa sebe ta ɗa: «Nza zləvə te Mahwətə te ŋkwa nya ncɛ kwelea ŋkɛ ŋkɛ!»

¹³Pa 'ya fate gaka ta bidzəa wəshi nyi nza nyi mpi hwe kwa kwekwaɗe ghəa nci hɛ, tsagha ŋa wəshi nyi kala seɗa ta wəmata nyighɛ vare bela ta nci, kewəba gakate gaka hɛ.

¹⁴Pa sefəa Shala nya kekesakate ɗa nyagha te hɛɗi hendemte ɗa cakeɗake. Pa berete ta Mahwətə dzeghənyɛ kənəa 'ya, ntəŋə le wənə kehwepe wepe ba'a kebeze beze.

¹⁵Hwa'a 'ya mbe Tɛl-Abib sha mbeli nyi fəhwe mbeli kaka mavashi mɛa hələa Kɛbar. Hɛ mberefaŋe menete 'ya hwa hɛ le mehele ketaze taze.

¹⁶Ma kwa sebe ta hɛ mberefaŋe ne, ma ke Mahwətə sha 'ya:

¹⁷«Wəndə ŋelɛ, nahe 'ya keveyi ŋa kawəndə nya mɛa ghweme kezha ka Israyɛl. Katefa ghena ta ɗa na ba'a kategeze nda hɛ na ke ka Israyɛl.

¹⁸Ma katemte na kegezete nda 'ya ke nde 'yaghwa mehele nda ɗema na kese kageze nda kezha zhɛre nza ta ŋkɛ yitea nza ŋkɛ teghweme ne, katemte nde 'yaghwa mehelea shɛ va fete ta ŋkɛ, ama kwa ghəa ŋa teve mte ta ŋkɛ 'ya.

¹⁹Ama kegezete nda na ke nde 'yaghwa mehele nda ɗema ŋkɛ kesərəakɛ 'yaghwa mehele ta ŋkɛ ba'a wəsə kwa ndiremia ŋkɛ ne, katemte ŋkɛ va fete nyi menete ŋkɛ, ama gha ne, pələsə tenza mpia ŋa.

²⁰Ma kesərəakɛ mene wəsə ganyɛ wəndə nya tiɗiɗi kezha mene wəsə nya ndiremi ne, katewele ŋkɛ 'ya ba'a katemte ŋkɛ. Ma kemtenyɛ ŋkɛ kaɗema na kegezete nda ghena ne, kazhɛne mbeli kaɓela wəshi ganji nyi menete ŋkɛ we, ama kwa ghə ŋa teve mte ta ŋkɛ 'ya.

²¹Ama kegezete nda na ke wəndə nya tiɗiɗi kezha ɗema kamene jaɗafa nda nzanyɛ ŋkɛ kemene ne, katenza ŋkɛ teghweme te zlaɓa ta ghena nyi gezete nda na, gha perə ne, pələsə tenza mpia ŋa.»

²²Pa berete ta Mahwətə dzeghənyɛ kənəa tagha zhɛkwa. Ma ke sha 'ya: «Sate kadzawa zlərə, kwagha tegeze ŋa ghena 'ya.»

²³Cape 'ya kwa hweŋkwa kadzawa zlərə. Ma kwagha ne, pa 'ya nakɛ zləvəa Mahwətə kala nya ghate 'ya kanakɛ mɛa hələa Kɛbar. Tagha ne, gwəɗəŋə 'ya ntiŋə ghə mbe hɛɗi.

²⁴Pa sefəa Shala dzembenyɛ mbe 'ya ba'a kesakate ɗa meslete. Ma ke sha 'ya: «Kwiɗi ŋzleyi ghəa ŋa mbe cɛa ŋa.

²⁵Wəndə ŋelɛ, fate! Kateve zewe mbeli kwa gha ba'a katehwepe ŋa mbeli. Ma tsagha gɛ, katezhɛne na kashave te ŋwela kanza hwa hɛ.

²⁶Katefɛa ghɛnia ŋa 'ya kegeze ghena ba'a katenza na kaɓeɓə, kezha shɛma na ŋele mbeli nyi ntɛaŋentɛa ghə nyi.

²⁷Ama te veci nya tegeze ghena 'ya laka gha ne, katepele ŋa hweŋkwa 'ya kageze ghena. Ma pa na sha tegeze nda ke hɛ: ‹Wa nya ghena nya geze Shala Mahwətə nya.› Fave mbeli nyi keɗe kafa, nzanji mbeli nyi keɗema kaɗe kafa, kwa nza ŋkɛ ne, ka fama ghena mbeli nyi.»